Úkimette kóleńkeli ekonomıkaǵa qarsy is-qımyl jónindegi Keshendi jospardyń jobasy qaraldy
ASTANA. KAZINFORM – Úkimette vıtse-premer – Ulttyq ekonomıka mınıstri Serik Jumanǵarınniń tóraǵalyǵymen 2026-2028 jyldarǵa arnalǵan kóleńkeli ekonomıkaǵa qarsy keshendi is-qımyl josparynyń jobasy qaraldy.
Qujat kóleńkege yǵysý qaýpi joǵary densaýlyq saqtaý jáne áleýmettik qyzmetter, saýda, bilim berý, qurylys jáne aýyl sharýashylyǵy sııaqty bes negizgi salany qamtıdy. Odan da ózge salalar kóp. Ol ekonomıkada jańadan «sur taýashalar» anyqtalǵan jaǵdaıda túzetilýi múmkin. Bul rette jospardy ázirleý kezinde bıznes úshin jańa mindetter engizý nemese retteýdi qatańdatý sharalary alynyp tastaldy.
Boljamdy kórsetkishterge sáıkes, «JІÓ-degi baqylanbaıtyn ekonomıkanyń úlesi» nysanaly ındıkatoryn 2026 jyly 14,5%-ǵa, 2027 jyly 14%-ǵa, 2028 jyly 13,8%-ǵa tómendetý josparlanyp otyr.
Keshendi jospar tórt negizgi bloktan jáne 30 is-sharadan turady. Olar:
- taýar óndirisi;
- qyzmetter óndirisi;
- fıskaldyq ákimshilendirýdi jetildirý;
- zańsyz áreketke qarsy turý.
Saýda salasyndaǵy «sur» ımport kólemin azaıtýǵa erekshe nazar aýdarylyp otyr. Óıtkeni odan naryqqa adal jolmen qatysatyndar zardap shegip jatyr. Saýda jáne ıntegratsııa mınıstrligine bıznes-qoǵamdastyqpen birlesip, «sur» jolmen kóptep ákelinetin taýarlar nomenklatýrasyn aıqyndaý, Memlekettik kirister komıtetimen birlesip, órkenıetti naryqty qorǵaý sharalaryn ázirleý tapsyryldy.
Jospardy júzege asyrýda tsıfrlyq sheshimder men jasandy ıntellekt quraldary mańyzdy rólge ıe bolady. Іs-sharalardyń oryndalýyn baqylaý men monıtorıng jasaý naqty áserdi baǵalaı otyryp, Smart Data Finance AJ-nyń tsıfrlyq platformasy arqyly júzege asyrylýy múmkin. Barlyq aǵymdaǵy sharalardy júzege asyrý tıisti salalardaǵy salyq túsiminiń ósýin qosqanda, tsıfrlandyrýǵa, JI-modelderge, ólshenetin KPI-ǵa basa nazar aýdara otyryp, birlesken jol kartalary men jumys toptary sheńberinde júrgiziledi.
Keshendi jospardyń jobasy maquldandy. Belgilengen rásimder jasalǵannan keıin Úkimet ony odan ári júzege asyrý úshin qabyldaıdy.
Aıta keteıik, Ónerkásip mınıstrligi taýarlardy tańbalaý arqyly kóleńkeli ekonomıkamen kúrespek.