Úkimette kásipkerlerdi alańdatyp otyrǵan máseleler talqylandy
ASTANA. KAZINFORM – Úkimette Premer-Mınıstrdiń orynbasary – ulttyq ekonomıka mınıstri Nurlan Baıbazarovtyń tóraǵalyǵymen bıznestiń ózekti máselelerin qaraý boıynsha kezekti keńes ótti, dep habarlaıdy Úkimettiń resmı saıty.
Keńeste «Atameken» Ulttyq Kásipkerler palatasy men bıznes ókilderi sóz sóılep, elektr energetıkasy salasyn odan ári damytýǵa, energııa únemdeýge jáne energııa tıimdiligin arttyrýǵa qatysty máseleler týraly aıtty.
Sondaı-aq mektepke deıingi uıymdarǵa qoıylatyn sanıtarlyq-epıdemıologııalyq talaptardy jáne jeke balabaqshalar ornalasqan jer ýchaskeleriniń nysanaly maqsatyn ózgertý tásilderin qaıta qaraý máseleleri talqylandy.
Kásipkerler jergilikti atqarýshy organdardyń sheshimderi negizinde buryn jasalǵan aýyl sharýashylyǵy maqsatyndaǵy jer telimderin jalǵa berý sharttaryn jappaı jaramsyz dep taný problemasyn kóterdi.
Vıtse-premer barlyq aıtylǵan máseleni tyńdap, tıisti memlekettik organdarǵa olardy sheshý úshin jedel sharalar qabyldaý týraly naqty tapsyrma berdi. Ol shaǵyn jáne orta kásipkerlikti qoldaý boıynsha júrgizilip jatqan jumystyń mańyzyn atap ótip, Úkimettiń bıznesti júrgizý úshin qolaıly jaǵdaı jasaýǵa bar kúsh-jigerdi jumsaýǵa nıetti ekenin jetkizdi.
