Úkimette Investıtsııalyq shtabtyń otyrysy ótti
ASTANA. KAZINFORM – Premer-mınıstrdiń birinshi orynbasary Roman Sklıardyń tóraǵalyǵymen Investıtsııalar tartý jónindegi keńestiń kezekti otyrysy ótti.
Otyrys barysynda qatysýshylar 17 iri jobanyń tiziminen eki jobanyń iske asyrylý mártebesin talqylady. Máselen, Astana qalasynda «Tiryaki Agro» agroónerkásiptik keshenin jáne Pavlodar oblysynda «EGMK» JShS gıdrometallýrgııalyq kombınatyn salý boıynsha birqatar ashyq saýaldar qaraldy. Birinshi joba boıynsha ınvestıtsııalardyń jalpy kólemi shamamen 169,6 mlrd teńgeni quraıdy, al ony iske asyrý 400 jumys ornyn ashý arqyly jyl saıynǵy bıdaı óndirisin 240 myń tonnaǵa ulǵaıtady. Investıtsııa somasy 343,3 mlrd teńge bolatyn «EGMK» JShS jobasy 300 myń tonna altyn mys kontsentratyn qaıta óńdeýdi jáne 500 jumys ornyn asha otyryp, shamamen 15 tonna altyn shyǵarýdy qamtamasyz etedi.
Budan basqa, Aqtóbe oblysynyń ınvestıtsııalyq baǵdarlamasy, atap aıtqanda áýejaı bazasynda AEA qurý jáne «Hromtaý» ındýstrııalyq aımaǵyn damytý talqylandy. Oblystyń 74 ınvestıtsııalyq jobasynyń ishinen 2025 jyly 1,2 myń jumys ornyn ashýmen 490 mlrd teńge somasyna 10 jobany iske asyrý josparlanýda. Olardyń ishinde relsti dánekerleý kásipornynyń keńeıýin, jel elektr stansalarynyń qurylysyn, jún jáne toqyma emes materıaldardy qaıta óńdeý kásipornynyń qurylysyn jáne basqalaryn atap ótýge bolady.
Qatysýshylar sondaı-aq temirjol jáne avıatsııa salalarynda strategııalyq ınfraqurylymdyq jobalardy iske asyrý boıynsha birqatar ashyq máselelerdi talqylady. Memleket basshysynyń tapsyrmasyna sáıkes, transqazaqstandyq temirjol dálizin damytý eldi jahandyq kólik jelilerine kiriktirýdegi basty mindet bolyp sanalady. Bul jobalar ınvestıtsııalar tartýǵa, jumys oryndaryn ashýǵa jáne saýdany ári halyqaralyq áriptestermen baılanysty damytý arqyly turaqty ekonomıkalyq ósýdi qamtamasyz etýge yqpal etedi.
Sonymen qatar ınvestorlardyń ótinishterin taldaý barysynda Kásipkerlik kodekste ekonomıkalyq qyzmetke jáne kásiporyndardyń odan ári keńeıýine kedergi keltiretin norma anyqtaldy. Bul máseleni sheshý úshin múddeli memlekettik organdarǵa tıisti tapsyrmalar berildi.