Úkimette Innovatsııalardy damytý jónindegi keńestiń alǵashqy otyrysy ótti
ASTANA. KAZINFORM – Premer-mınıstrdiń orynbasary – Mádenıet jáne aqparat mınıstri Aıda Balaevanyń tóraǵalyǵymen Innovatsııalardy damytý jónindegi keńestiń (Innovatsııalyq shtab) alǵashqy otyrysy ótti. Jıynǵa Ǵylym jáne joǵary bilim mınıstri Saıasat Nurbek, oblystar men qalalar ákimderiniń orynbasarlary, memlekettik organdardyń, sondaı-aq bıznes qaýymdastyq ókilderi qatysty. Bul týraly Úkimettiń baspasóz qyzmeti habarlady.
Innovatsııalyq shtab Premer-mınıstrdiń tapsyrmasy boıynsha quryldy. Onyń negizgi mindeti – ınnovatsııalyq qyzmet salasyndaǵy vedomstvoaralyq úılestirýdi qamtamasyz etý jáne eldiń tehnologııalyq basymdyqtaryn aıqyndaý.
Otyrysta Qazaqstan Respýblıkasynda ınnovatsııalardy damytýdyń tujyrymdamalyq máseleleri qaraldy. Atap aıtqanda, memlekettik qoldaý quraldaryn jetildirý, óńirlik ınnovatsııalyq júıelerdi damytý jáne kadrlyq áleýetti kúsheıtýge baǵyttalǵan sharalar talqylandy.
Bul jumys nátıjesinde ınnovatsııalyq belsendilikti arttyrýǵa, Qazaqstannyń Jahandyq ınnovatsııalar ındeksindegi ornyn nyǵaıtýǵa, jańa salalardy damytýǵa, joǵary tehnologııalyq jumys oryndaryn qurýǵa jáne qosylǵan quny joǵary ónim eksportyn ulǵaıtýǵa múmkindik beretin basqarylatyn ınnovatsııalyq júıe qalyptastyrý kózdelip otyr.
Jańa modeldiń negizgi ıdeologııalyq ózegi – «Innovatsııany ǵylym arqyly damytý» tásilinen «Ǵylymdy ınnovatsııa arqyly damytý» qaǵıdatyna kóshý. Onyń máni – daıyn ozyq tehnologııalardy ıgerip, el jaǵdaıyna beıimdeý jáne osy negizde otandyq ǵylymdy damytý. ıAǵnı memleket protsestiń ózine emes, naqty nátıjege qarjy baǵyttaıdy.
Jıyn qorytyndysy boıynsha Innovatsııalardy damytý tujyrymdamasynyń negizgi tásilderi maquldanyp, memlekettik organdarǵa, ákimdikterge jáne bıznes-sektor ókilderine qujat jobasyna naqty usynystar engizý jóninde tıisti tapsyrmalar berildi.
Sonymen qatar barlyq óńirde múddeli taraptardyń qatysýymen ǵylymı-tehnologııalyq sessııalar ótkizý kestesin bekitý tapsyryldy. Bul sessııalar bıznestiń naqty tehnologııalyq suranysyn aıqyndaýǵa baǵyttalmaq.
Aıta keteıik, Qazaqstan men Qytaı ınnovatsııalyq qalalardy damytý baǵytynda yntymaqtastyqty kúsheıtedi.
