Úkimette «G4 City» jobasyn iske asyrý máselesi talqylandy

Úkimette Premer-Mınıstr Álıhan Smaıylovtyń tóraǵalyǵymen ótken keńeste Almaty oblysynda «G4 City» jobasyn iske asyrý máseleleri talqylandy, dep habarlaıdy QazAqparat. 

Júrgizilip jatqan jumystar týraly Ulttyq ekonomıka mınıstri Álibek Qýantyrov pen Almaty oblysynyń ákimi Marat Sultanǵazıev baıandama jasady.Úkimettiń baspasóz qyzmeti málimetinshe,talqylaý qorytyndysy boıynsha Premer-Mınıstr ýákiletti memlekettik organǵa birqatar tapsyrma berdi.

Eske sala keteıik, tujyrymdamaǵa sáıkes Almaty jáne Qonaev qalalarynyń aralyǵyndaǵy ıntegratsııalanǵan G4 City qalasy tórt aýdannan turatyn bolady:

Gate – iskerlik jáne qarjylyq ortalyq;

Golden – bilim berý jáne medıtsına salalary boıynsha habtar;

Growing – ónerkásiptik jáne logıstıkalyq habtar;

Green – týrıstik klaster.

Bıyl kóktemde Almaty oblysynda 2048 jylǵa deıin jalpy aýdany 30 myń ga bolatyn «G4 City» arnaıy ekonomıkalyq aımaǵy quryldy. Bul ıntegratsııalanǵan qalany qurýǵa otandyq jáne sheteldik ınvestıtsııa tartý úshin qolaıly klımatty qamtamasyz etedi.