Úkimette elde elektromobıl shyǵarý jospary talqylandy
ASTANA. KAZINFORM — Oljas Bektenov Proton Holdings basshysy Chýnrong Lımen Qazaqstanda elektromobıl shyǵarý josparyn talqylady. Bul týraly Úkimettiń baspasóz qyzmeti habarlady.
Qazaqstan Respýblıkasynyń Premer-mınıstri Oljas Bektenov malaızııalyq Proton Holdings Berhad kompanııasynyń bas dırektory Chýnrong Lımen kezdesý ótkizdi. Onda avtomobıl ónerkásibindegi yntymaqtastyq máseleleri, onyń ishinde Qazaqstanda jańa óndiris ornyn ashý perspektıvalary talqylandy.
Taraptar Proton Holdings kompanııasynyń Qazaqstanda elektromobılder shyǵarý josparyn talqylady. Kompanııa — Malaızııa naryǵynda mashına jasaý salasyndaǵy kóshbasshy. Proton avtokólikteri, onyń ishinde ishten janý qozǵaltqyshtary bar úlgiler de, elektromobılder de 26-dan astam elge eksporttalady. Sonymen qatar óndirýshiniń transmıssııalar men avtokólikterdi ázirleý, jobalaý jáne ınjenerlik zertteý ortalyǵy bar.
Oljas Bektenov Qazaqstan Respýblıkasynyń Prezıdenti zamanaýı tehnologııalardy engizý arqyly óndiristerdi lokalızatsııalaý jáne jańa jumys oryndaryn ashý, mashına jasaý salasyn damytý mindetin qoıǵanyn atap ótti. Investıtsııa tartý jáne jańa óndiris oryndaryn ashý Qazaqstan ekonomıkasyn ártaraptandyrý jáne ornyqty ósýi úshin mańyzdy mánge ıe. Osy jyldyń birinshi toqsanynda atalǵan salaǵa 55 mlrd teńge ınvestıtsııa tartyldy. 2024 jyly ınvestıtsııa kólemi 2 esege — 282 mlrd teńgege jetti.
Jıynda Úkimettiń jobany júzege asyrýǵa jan-jaqty qoldaý kórsetýge daıyn ekeni aıtyldy. Elimizdiń ǵylymı-tehnıkalyq áleýetin damytý úshin ǵylymı-zertteý jáne tájirıbelik-konstrýktorlyq jumystar salasyndaǵy yntymaqtastyq pen tájirıbe almasýdyń keleshegi zor.
Proton Holdings bas dırektory Chýnrong Lı ınvestorlar úshin jasalǵan jaǵdaıdyń tartymdylyǵyna baılanysty Qazaqstan naryǵyna shyǵýǵa qyzyǵýshylyq tanytty.
Kezdesý sońynda taraptar jobany júzege asyrý úshin ózara tıimdi yntymaqtastyqty damytýǵa nıetti ekenderin jetkizdi. Ónerkásip jáne qurylys mınıstrligine tıisti Jol kartasyn ázirleý tapsyryldy.
Aıta ketelik Bektenov Qaraǵandy oblysyndaǵy ónerkásip pen AÓK-ti damytý barysyn tekserdi.