Úkimette EKSJ boıynsha artta qalǵan ákimdikterge eskertý jasaldy
ASTANA. KAZINFORM — Búgin Úkimette Premer-mınıstrdiń orynbasary Qanat Bozymbaevtyń tóraǵalyǵymen «Energetıkalyq jáne kommýnaldyq sektorlardy jańǵyrtý» jónindegi ulttyq jobany (EKSJ) júzege asyrý boıynsha Jobalyq keńseniń otyrysy ótti.
Búginde 2026 jylǵa arnalǵan TKSh salasyndaǵy ınvestıtsııalardyń jalpy kólemi 1,2 trln teńge boldy. Bul rette ulttyq joba tetigi boıynsha — 634 mlrd teńge, al ınvestıtsııalyq baǵdarlamalar aıasynda taǵy 542 mlrd teńge qamtylǵan.
EKSJ elektrondy platformasy arqyly konkýrstyq rásimderdi ótkizýge daıyn 482 mlrd teńge somasyna 206 joba eskerilgen. Onyń ishinde 168 joba boıynsha belsendi jumystar júrip jatyr.
Infraqurylymnyń tozýyn tómendetýge baǵyttalǵan tıisti jospardyń tolyqtaı oryndalýyna qaramastan, birqatar óńirde 2026 jyl boıynsha Ulttyq jobany iske asyrýdyń bekitilgen kestesinen aıtarlyqtaı artta qalýy jaǵdaıy anyqtaldy:
— Jylýmen jabdyqtaý salasynda Mańǵystaý, Soltústik Qazaqstan, Shyǵys Qazaqstan, Jambyl, Almaty jáne Abaı oblystary kesteden artta qalyp otyr.
— Elektr energııasymen qamtamasyz etý salasynda: Abaı, Soltústik Qazaqstan, Qyzylorda, Qaraǵandy, Pavlodar, Batys Qazaqstan oblystary.
— Sýmen jabdyqtaý salasynda: Batys Qazaqstan, Qyzylorda, Pavlodar oblystarynda, Astana, Almaty, Shymkent qalalarynda.
— Sý burý salasynda: Batys Qazaqstan, Mańǵystaý, Aqmola, Soltústik Qazaqstan, Abaı oblystarynda jáne Astana qalasynda.
Sonymen qatar keler jylǵa ótinim berý kezinde óńirlerdiń belsendiligi tómen ekeni málim boldy.
Vıtse-premer 2027 jylǵa qaraı ákimdikter TKSh salasynda «qyzyl aımaq» deńgeıinde turǵan nysandardyń jaǵdaıyn tolyqtaı durystaýy kerek ekenin atap ótti. Sáýir aıynyń sońyna deıin EKSJ platformasyna barlyq qolda bar jobalar boıynsha ótinimder berýdi qamtamasyz etý tapsyryldy, birinshi kezekte — «qyzyl aımaqtaǵy» kásiporyndar eskerilýi tıis. Eger bekitilgen merzimde iske aspasa jáne sapasyz oryndalǵan jaǵdaıda, jaýapkershiliktiń jekeleı sharalary qabyldanady.
Jobalardy qarjylandyrý men TKSh-ny tsıfrlandyrý
Atap aıtqanda, otyrys barysynda qarjylandyrý máseleleri de qaraldy. Ulttyq joba aıasynda «Báıterek» holdıngi 1500-den astam ótinimdi pysyqtady, onyń ishinde ekinshi kezeńde 520,6 mlrd teńge somasyna 231 ótinim kelisildi. Qarjylandyrý «Qazaqstannyń Damý banki» AQ jáne ekinshi deńgeıdegi bankter jelisi boıynsha tikeleı kredıtteý arqyly, sondaı-aq ákimdikterdiń memlekettik baǵaly qaǵazdaryn satyp alý tetigi boıynsha qarastyrylǵan.
Búginde 231 jobanyń 37- sine qatysty jobalyq-smetalyq qujattama ázirlendi, ıaǵnı bul jobalar iske asyrýǵa daıyn.
Otyrys kún tártibiniń jeke blogy salany tsıfrlandyrýǵa arnaldy. TKSh-da derekterdi jınaý, berý jáne taldaýdyń kóp deńgeıli júıesin qalyptastyrý qajet ekeni atap ótildi. Mundaı júıe «tómennen joǵary» qaǵıdaty boıynsha jumys isteýi tıis — tutynýshylardan kommýnaldyq kásiporyndarǵa deıin. Bul derekter EnergyTech jáne WaterTech platformalaryna ıntegratsııalanady jáne Smart Turmys júıesimen úılestirilmek.
Sondyqtan Energetıka, Ónerkásip jáne qurylys mınıstrlikterine, sondaı-aq «Qazaqstandyq turǵyn úı-kommýnaldyq sharýashylyqty jańǵyrtý jáne damytý ortalyǵy» AQ-ǵa tıisti tapsyrmalar berildi.
Aıta keteıik, jaqynda eldegi 10 JEO «qyzyl aımaqta» turǵany habarlandy.
Buǵan deıin 2026 jyly Smart Turmys biryńǵaı kommýnaldyq qyzmet platformasy iske qosylatynyn jazǵan edik.
