Úkimette ekologııalyq taza avıaotyn óndiretin zaýyt salý máselesi talqylandy
ASTANA. KAZINFORM — Oljas Bektenov LanzaJet basshylyǵymen elimizde ekologııalyq taza avıaotyn óndiretin zaýyt salý máselesin talqylady. Bul týraly Úkimettiń baspasóz qyzmeti habarlady.
Premer-mınıstr Oljas Bektenov amerıkalyq LanzaJet kompanııasynyń bas atqarýshy dırektory Djımmı Samarıtspen, kommertsııalyq qyzmet jónindegi vıtse-prezıdenti Stefan Tıonmen ónerkásiptik jáne tehnologııalyq seriktestikti damytý máseleleri boıynsha kezdesý ótkizdi.
Ekologııalyq taza avıaotyn óndirý jónindegi birlesken jobany júzege asyrý úshin ozyq tehnologııalardy lokalızatsııalaý perspektıvalary qaraldy. Atap aıtqanda, Qostanaı oblysy Rýdnyı qalasynda avıatsııalyq SAF (Sustainable Aviation Fuel) otynyn óndiretin zaýyt salý jobasy talqylandy.
LanzaJet — shıkizattyń ár túrinen, sonyń ishinde organıkalyq (dán, júgeri, kartop jáne t. b.) zattardan alynǵan etanoldan ekologııalyq taza SAF avıaotynyn óndirý tehnologııasyn ázirlep shyqqan kompanııa. Bolashaq kásiporynnyń qýaty jylyna 54 myń tonna avıaotyn jáne 100 myń tonna bıoetanoldyń qaıta óńdelgen túrlerin óndirýge jetedi. Búgingi tańda zaýyttyń tehnıkalyq-ekonomıkalyq negizdemesin (TEN) ázirleý jumystary aıaqtaldy.
Joba «jasyl» avıatsııany damytýǵa jáne AÓK-te tereńdetip óńdeýge baǵyttalǵan. Bıootyn óndirisi parnıktik gazdar shyǵaryndylaryn azaıtýdy qamtamasyz etedi, bul Qazaqstannyń klımattyq jáne energetıkalyq kún tártibiniń negizgi basymdyqtaryna sáıkes keledi.
— Memleket basshysy Qasym-Jomart Toqaev Qazaqstanda halyqaralyq áýe habyn qurý mindetin qoıdy. Áýejaılardyń áleýetin keńeıtý jáne ınfraqurylym qurýmen qatar, salany sapaly ári ekologııalyq taza avıaotynmen qamtamasyz etý máselesi mańyzdy. Biz yntymaqtastyqty nyǵaıtýǵa daıynbyz. Úkimet bul jobaǵa jan-jaqty qoldaý kórsetedi, — dep atap ótti Oljas Bektenov.
Kezdesýge qatysýshylar Qazaqstandaǵy turaqty avıatsııalyq otyn (SAF) óndirý jónindegi jobanyń negizgi baǵyttaryn egjeı-tegjeıli qarastyrdy. LanzaJet kompanııasynyń basshylyǵy tarapynan jobany birlesip júzege asyrý úshin ıntegratsııalanǵan qurylym qurý múmkindigin qarastyrý usynyldy.
Anyqtama: LanzaJet Chıkagoda (AQSh) bas keńsesi bar jetekshi amerıkalyq LanzaTech bıoınjenerlik kompanııasymen qurylǵan. LanzaTech-pen qatar negizgi ınvestorlar iri transulttyq korporatsııalar sanalady: International Airlines Group, Mitsui & Co., Ltd., Shell, Suncor Energy, British Airways, LanzaTech, Microsoft, Breakthrough Energy, All Nippon Airways (ANA), Airbus, Groupe ADP jáne taǵy basqa kompanııanyń álemdegi eń iri avıakompanııalarmen uzaqmerzimdi ofteık-kelisimderi bar.
Aıta ketelik Oljas Bektenov avıaotyn naryǵyn damytý máseleleri boıynsha keńes ótkizgen edi.