Úkimette «Derekterdi óńdeý ortalyqtary alqaby» jobasynyń damý barysy qaraldy
ASTANA. KAZINFORM — Premer-mınıstr Oljas Bektenov «Derekterdi óńdeý ortalyqtary alqaby» jobasynyń Ulttyq quryltaıdyń V otyrysynda Prezıdent qoıǵan mindetter sheńberinde júzege asyrylý barysy qaralǵan jıyn ótkizdi. Bul týraly Úkimettiń baspasóz qyzmeti málim etti.
Onda Premer-mınıstrdiń orynbasary – jasandy ıntellekt jáne tsıfrlyq damý mınıstri Jaslan Mádıev, «Qazaqtelekom» AQ basqarma tóraǵasy Baǵdat Mýsın jobanyń bıylǵy qańtar aıynda Pavlodar oblysy Ekibastuz qalasynda iske qosylǵannan bergi atqarylǵan jumystar týraly baıandady.
Ortalyq Azııadaǵy energetıkalyq áleýeti 1 GVt-qa deıin jetetin eń iri kampýsty qurý jónindegi «DÓO alqaby» jobasy búgingi tańda qarqyndy túrde júzege asyrylýda. Úkimet tıisti ınfraqurylymdyq jáne quqyqtyq jaǵdaılardy jasaýda. Atap aıtqanda, jalpy aýdany 1,4 myń gektar jer telimi bólindi. Aýqymdy jobany júzege asyrý úshin qosalqy stansa satyp alý, sondaı-aq ınvestorlar men jobaǵa qatysýshylardy memlekettik qoldaýdyń qosymsha tetikterin ázirleý boıynsha jumystar júrgizilip jatyr.
Qurylatyn ınfraqurylymnyń mańyzdy elementi halyqaralyq seriktesterdi tartýǵa arnalǵan Greenfield aımaǵy bolmaq. Sondaı-aq odan ári keńeıte túsý múmkindigi bar 100 MVt-ǵa deıingi qýattar daıyndalady. Infraqurylym energııa tıimdiligi koeffıtsıenti PUE 1.25 bolatyn Tier III halyqaralyq standartyna sáıkes kelmek.
Telekommýnıkatsııalyq ınfraqurylym salasyndaǵy eń iri hyperscale jáne BigTech kompanııalarynyń talaptaryn qanaǵattandyrý úshin jelilik kidiris 80-nen 57 mıllısekýndqa deıin tómendetiledi, bul – negizgi eýropalyq trafık almasý ortalyqtarymen teń deńgeı.
Budan ári esepteý ınfraqurylymyn kezeń-kezeńmen ulǵaıtý, árqaısysy 50 MVt-tan JI-DÓO-nyń tórt kezeńin salý kózdelgen.
Tutastaı alǵanda, «DÓO alqabyn» iske qosý Qazaqstanda tsıfrlyq ınfraqurylym men esepteý qýattylyǵynyń óńirlik ortalyǵyn qalyptastyrýǵa, ekonomıkaǵa ınvestıtsııalar tartýǵa jáne jańa joǵary bilikti jumys oryndaryn ashýǵa múmkindik beredi.
Jıyn qorytyndysy boıynsha Premer-mınıstr Oljas Bektenov salalyq mınıstrlikter men jaýapty uıymdarǵa jumystyń barlyq kezeńderin ýaqtyly júzege asyrýdy qamtamasyz etýdi jáne qajetti normatıvtik sheshimderdi qabyldaýdy jedeldetýdi tapsyrdy.
Aıta keteıik, buǵan deıin Premer-mınıstr Oljas Bektenov «Samuryq-Qazyna» AQ dırektorlar keńesiniń otyrysyn ótkizdi.