Úkimette búgin kóshi-qon saıasaty talqylanady
ASTANA. KAZINFORM – Búgingi Úkimet otyrysynda taý-ken ónerkásibin damytý jáne tsıfrlandyrý, kóshi-qon saıasatyn jetildirý máseleleri qaralady.
Úkimettiń resmı málimeti boıynsha, 2024 jyly taý-ken metallýrgııa kesheniniń el ekonomıkasyna qosqan úlesi 6,9% bolǵan. Salada 110 myńnan astam adam jumys isteıdi.
Al bıylǵy 6 aıda taý-ken ónerkásibi joǵary ósý qarqynyn saqtap qalǵan. Ósim qarqyny – 8,4%. Al metall kenderin óndirý tek 0,3% ǵana ósken.
Ekonomıkanyń barlyq salasy sııaqty taý-ken ónerkásibin tsıfrlandyrý da mańyzdy basym baǵytqa aınalyp otyr. Bul óndiristegi eńbek qaýipsizdigin jetildirip qana qoımaı, túrli kóleńkeli shemalardyń jolyn kesýge, saladaǵy eńbek ónimdiligin arttyrýǵa jol ashatyn tetik bolyp esepteledi.
Úkimet otyrysynda qaralatyn ekinshi másele – kóshi-qon saıasaty. Eńbek jáne halyqty áleýmettik qorǵaý mınıstri Svetlana Jaqypovanyń aıtýynsha, 2025 jyly sheteldik jumys kúshin tartýǵa arnalǵan kvota 16,5 myń kóleminde belgilenip, 6 aıda sonyń 14,2 myńy ıgerilgen.
Ulttyq statıstıka bıýrosynyń málimeti boıynsha, jyldyń 5 aıynda Qazaqstan halqy 69,8 myń adammen tolyqqan. Onyń 6,3 myńy kóshi-qon esebinen kelgen.
Halyq sanynyń eń joǵary ósý qarqyny elordada tirkelip otyr. Jyl basynan beri 29,7 myń adam astanalyq atanǵan. Onyń 78,3%-y kóshi-qon esebinen.
Jalpy bıyl kóshi-qonnyń oń saldosy Almaty jáne Mańǵystaý oblystarynda, Astana, Almaty, Shymkent qalalarynda baıqalǵan.
Premer-mınıstrdiń birinshi orynbasary Roman Sklıar buǵan deıingi baspasóz máslıhatynda Qazaqstannyń iri qalalaryna avtokólikterdiń kirýin shekteý ázirge josparlanyp otyrmaǵanyn aıtqan edi.
Otyrys qorytyndysy boıynsha Ónerkásip jáne qurylys vıtse-mınıstri Oljas Saparbekovtiń qatysýymen baspasóz máslıhaty ótedi.
Baspasóz máslıhaty Úkimettiń YouTube resmı arnasy men Facebook áleýmettik jelisinde tikeleı efırde kórsetiledi.
Buǵan deıin Kazinform sırek metall Qazaqstan úshin ekinshi munaı bolýy múmkin degen dámeli boljamdarǵa taldaý jasaǵan bolatyn.