Úkimette birinshi jartyjyldyqtaǵy ınflıatsııa qorytyndysy shyǵaryldy

ASTANA. KAZINFORM — Ótken senbide vıtse-premer – ulttyq ekonomıka mınıstri Serik Jumanǵarınniń tóraǵalyǵymen Úkimette ótken jıynda birinshi jartyjyldyqtaǵy ınflıatsııa qorytyndysy qaraldy. 

Onda aıtylǵandaı, erte pisken ónimdi jappaı jınaý bastalysymen, aldyn ala kútilgendeı, áleýmettik mańyzy bar kókónister baǵasynyń ósýi toqtap qana qoımaı, tómendeı bastaǵan.

—Eger sáýirde áleýmettik ónimderdiń ortasha baǵa ındeksi 1,6%-dy qurasa, mamyrda ósý qarqyny 1%-ǵa, al maýsymda - 0,7%-ǵa tómendedi. Sońǵy aptada ósim nebary 0,1% boldy. Sonymen qatar, úsh apta qatarynan kartop baǵasynyń 1,3%-ǵa tómendeýi baıqaldy. Ótken aptadan sábiz baǵasy 0,9%-ǵa arzandaı bastady. Kúrish, qaraqumyq, jumyrtqa, un men makoron ónimderiniń baǵasy túsip jatyr. Nan men sút baǵasy turaqty bolyp tur, — dedi saýda jáne ıntegratsııa birinshi vıtse-mınıstri Aıjan Bıjanova.

Qazaqstanda otandyq azyq-túlik óndirisi artyp keledi. 2025 jyldyń 5 aıynda onyń kólemi 10,5%-ǵa ósip, 1,5 trln teńgeni qurady. Áleýmettik azyq-túlik taýarlarynyń ishinde eń kóp ósimdi qyzylsha qanty (4,6 myń tonnadan 64 myń tonnaǵa deıin), ósimdik maıy (316,3 myń tonnadan 376,8 myń tonnaǵa deıin), sary maı (13 myń tonnadan 15 myń tonnaǵa deıin), un (1,3 mln tonnadan 1,4 mln tonnaǵa deıin), ashytylǵan sút ónimderi (102 myń tonnadan 106 myń tonnaǵa deıin), óńdelgen sút (264 myń tonnadan 274,6 myń tonnaǵa deıin) jáne taǵy basqalary kórsetti.

Qazaqstan EAEO elderi arasynda áleýmettik azyq-túlikterge eń qoljetimdi baǵaǵa ıe

Jıynda Qazaqstan EAEO elderi arasynda azyq-túliktiń qoljetimdiligi boıynsha jetekshi oryndy saqtap otyrǵany atap ótildi. EAEO elderindegi áleýmettik mańyzǵa ıe azyq-túlik taýarlarynyń naryqtyq baǵasyn salystyrmaly taldaý olardyń Qazaqstanda anaǵurlym qoljetimdi ekenin kórsetti. Atap aıtqanda, Qazaqstanda taýyq jumyrtqasy, un, nan, kúnbaǵys maıy, tuz, kúrish, kartop, qyryqqabat, pııaz, sábiz eń tómen baǵa tirkelgen.

Tórt pozıtsııa boıynsha: qaraqumyq, qant, sıyr eti jáne sút boıynsha Qazaqstandaǵy baǵalar Belarýstegi baǵaǵa jaqyn. Sary maı boıynsha elimiz Belarýs pen Qyrǵyzstannan keıin úshinshi orynda, al qus eti boıynsha Belarýs pen Reseıden keıin.

Kommýnaldyq qyzmeter tarıfi

Aqyly qyzmetter birinshi jartyjyldyqta ınflıatsııa ósiminiń negizgi faktory boldy (16,1%). Osyǵan baılanysty Úkimet kommýnaldyq qyzmetter tarıfiniń ósý qarqynyn retteý týraly sheshim qabyldady. Olardyń ósýin ishinara keıinge qaldyrdy. Bul azamattardyń qarjylyq júktemesin azaıtýǵa jáne ınflıatsııa deńgeıin turaqtandyrýǵa múmkindik beredi.

Eske sala keteıik, búgin Úkimette mal sharýashylyǵyn tsıfrlandyrý máselesi talqylanady.