Úkimette «Báıterek» holdıngi jańa qurylymynyń jobasy qaraldy
ASTANA. KAZINFORM — Úkimette Premer-mınıstrdiń orynbasary – ulttyq ekonomıka mınıstri Serik Jumanǵarınniń tóraǵalyǵymen ótken keńeste «Báıterek» holdıngi jańa qurylymynyń jobasy qaraldy. Bul týraly Úkimettiń baspasóz qyzmeti málim etti.
Transformatsııanyń negizgi maqsaty – holdıngti ınvestıtsııa tartýdyń basty draıverine jáne elimizdiń ishki jalpy ónimin 2029 jylǵa qaraı eki ese arttyrýǵa baǵyttalǵan proaktıvti ekonomıkalyq ósý saıasatyn iske asyratyn negizgi quralǵa aınaldyrý.
Elimizdiń jańa ekonomıkalyq ósý saıasaty ınvestıtsııaǵa baǵyttalǵan maqsatty kózqarasymen – memlekettiń naqty qajettilikterine negizdelgen «jobaǵa tapsyrys» qaǵıdaty arqyly erekshelenedi.
Bul modeldi júzege asyrýda basty ról «Báıterek» holdıngine júkteledi. Aldaǵy tórt jylda memleket jyl saıyn holdıngtiń kapıtalyn 1 trln teńgege arttyryp otyrady, al «Báıterek» jylyna 8 trln teńgege deıin syrtqy qaryz qarajattaryn tartyp, basym jobalardy qarjylandyrady.
Qazirgi basqarýshy holdıng retindegi qurylym jańa ınvestıtsııalyq mıssııanyń aýqymy men mindetterine saı jańǵyrtylady.
Negizgi basymdyq – ınvestıtsııaǵa shoǵyrlaný, salalyq mamandaný men naryqtyq taldaýdy kúsheıtý.
Sońǵy 30 jyldaǵy ekonomıkanyń qurylymyn taldaý nátıjesi eń joǵary qosylǵan qun metallýrgııa, mashına jasaý, hımııa, agroónerkásip jáne tamaq ónerkásibinde qalyptasatynyn kórsetti.
Bul salalar strategııalyq baǵyttar bolyp qala beredi. Sonymen birge, saýda, qarjy jáne qurylys salalary da jańa basymdyqtar qataryna engiziledi.
Osy salalar negizinde ınvestıtsııalyq holdıngtiń quramynda jeti Investment Board (ınvestıtsııalyq qyzmetter) qurylady. Olar naqty sektordyń ósý núktelerine aınalyp, joǵary qosylǵan qun qalyptastyratyn jańa jobalardy ázirleý men iske asyrýǵa qatysady. Sondaı-aq bıznes tarapynan túsken jobalyq usynystardy ekonomıkalyq ósim mindetterine sáıkestigi turǵysynan saraptaıdy.
«Báıterektiń» ınvestıtsııalyq holdıng retindegi damýynyń negizgi baǵyttary:
• Óńirlik keńeıý – otandyq óndirýshilerdiń pozıtsııasyn nyǵaıtý jáne óńiraralyq saýdany damytý;
• Shekara mańy keńeıýi – qazaqstandyq bıznespen birlesip ınvestıtsııalyq qyzmetti syrtqy naryqtarǵa shyǵarý;
• Salalyq damý – ulttyq ekonomıkanyń tabystylyǵyn arttyrý maqsatynda holdıngtiń ókilettigin keńeıtý.
— Investıtsııalyq jobalardyń bolashaǵy – eksportta. Biz aýyl sharýashylyǵyn qoldaýdyń naqty nátıjesin kórip otyrmyz: ónimdiliktiń artýy men ınvestıtsııalar esebinen sheteldik kompanııalar qazaqstandyq AÓK-tiń áleýetine qyzyǵýshylyq tanytyp, óz tehnologııalaryn engizýde. «Báıterek» eksportqa baǵyttalǵan kásiporyndar ekojúıesin qalyptastyryp, olardyń ónim ótkizý naryǵyn keńeıtýine, qosylǵan qun tizbegin qurýyna jáne syrtqy naryqtarǵa shyǵýyna yqpal etedi, — dedi holdıng basqarmasynyń tóraǵasy Rýstam Qaraǵoıshın.
Іshki naryqty keń tutyný taýarlarymen qamtamasyz etý maqsatynda, búginde kóbisi ımportqa táýeldi taýarlar boıynsha, «Investıtsııaǵa tapsyrys» baǵdarlamasy iske qosylady.
Bul baǵdarlama sheńberinde memleket ózi basym jobalar men olardyń ornalasatyn óńirlerin aıqyndap, bıznesten olardy júzege asyrýdy usynady.
Baǵdarlama aýyl sharýashylyǵy salasynda daıyndalǵan, endi osyndaı tásilder turmystyq hımııa, azyq-túlik jáne basqa da baǵyttar úshin engizilmek.
Sonymen qatar Dırektorlar keńesiniń quramy keńeıtilip, táýelsiz músheler qataryna jetekshi halyqaralyq salalar men óńirlerden ınvestıtsııalyq keńesshiler tartylady. Bul sheshimderdiń ashyqtyǵyn, táýekelderdi keshendi baǵalaýdy jáne jobalardyń tabysyna áser etetin barlyq faktordy eskerýdi qamtamasyz etedi.
Holdıngti transformatsııalaý jónindegi rásimderdiń barlyǵy jyl sońyna deıin aıaqtalyp, kelesi jyldyń basynda Qazaqstannyń proaktıvti ekonomıkalyq ósim baǵdarlamasyn iske asyrý jumystary bastalady.
Aıta keteıik, «Báıterek» holdınginiń 2033 jylǵa deıingi damý josparyna ózgerister engizildi.