Premer-mınıstr mereke kúnderi qoǵamdyq qaýipsizdikti kúsheıtýdi tapsyrdy
ASTANA. KAZINFORM — Oljas Bektenov mereke kúnderi quqyq buzýshylyqtyń aldyn alý jáne qaýipsizdik sharalary jónindegi vedomstvoaralyq komıssııa otyrysyn ótkizdi. Bul týraly Úkimettiń baspasóz qyzmeti málim etti.
Jıynda mereke kúnderindegi qaýipsizdik sharalary, jańartylǵan tıisti zańnama normalaryn engizý, sondaı-aq 2026 jylǵa arnalǵan jospar jáne Prezıdenttiń «Zań men tártip» tujyrymdamasy sheńberinde atqarylǵan jumystardyń nátıjeleri qaraldy.
Tótenshe jaǵdaılar mınıstri — Shyńǵys Árinov, oqý-aǵartý mınıstri — Juldyz Súleımenova, eńbek jáne halyqty áleýmettik qorǵaý mınıstri — Svetlana Jaqypova, ishki ister mınıstriniń orynbasary Igor Lepeha, Bas prokýratýra, Ulttyq qaýipsizdik komıteti jáne Qarjy monıtorıngi agenttiginiń ókilderi qatysty. Sondaı-aq jıynda Túrkistan oblysy men Astana qalasy ákimdikteri basshylyǵynyń baıandamasy tyńdaldy.
Mereke kúnderi Qazaqstanda qoǵamdyq tártipti qorǵaý jáne órt qaýipsizdigin baqylaý kúsheıtilip, rezervtik kúshter daıyndyqqa keltirildi. Іshki ister mınıstriniń orynbasary Igor Lepeha kóshelerdegi polıtsııa patrýlderi tyǵyzdyǵynyń artýy jáne strategııalyq nysandarda, azamattar kóp jınalatyn oryndarda táýlik boıy kezekshilik uıymdastyrý týraly baıandady.
El óńirlerinde barlyǵy 1 myńnan astam buqaralyq is-shara josparlanǵan, olardyń basym bóligi balalardyń qatysýymen ótedi. Osyǵan baılanysty Premer-mınıstr Іshki ister mınıstrligine Tótenshe jaǵdaılar mınıstrligimen birlese otyryp, josparlanǵan is-sharalardyń qaýipsiz ótkizilýin qamtamasyz etý úshin barlyq qajetti sharalardy qabyldaýdy jáne táýlik boıy patrýldik jáne kezekshi quramnyń jumysyn uıymdastyrýdy tapsyrdy.
— Bizdiń mindet — is-sharalar ótetin jerlerde quqyq buzýshylyqtar men qylmystardyń aldyn alý jumystaryn qamtamasyz etý. Kósheler men qoǵamdyq oryndarda qylmystardyń profılaktıkasynyń tıimdi júıesin qurǵan jón. Jaǵdaıdy baqylaýǵa alyp, onyń ishinde beınekameralar arqyly vızýaldy baqylaý uıymdastyrý qajet. Qajet bolǵan jaǵdaıda oqıǵalarǵa shuǵyl áreket etý sharalaryn qamtamasyz etińizder. Sondaı-aq, adamdar kóp jınalatyn nysandarda lańkestik shabýyldardyń aldyn alý úshin keshendi profılaktıkalyq sharalar qabyldansyn. ІІM men TJM-ǵa kúsheıtilgen rejımde jumys isteý tártibine kóshýdi tapsyramyn, — dep tapsyrdy Premer-mınıstr.
Mereke kúnderi órt qaýipsizdigin qamtamasyz etý máselesine de kóńil aýdaryldy. Іs-sharalardyń basym bóligi adamdar kóp jınalatyn nysandarda, sondaı-aq oıyn-saýyq jáne qoǵamdyq oryndarda ótedi. Onyń ishinde pırotehnıkalyq ónimder de qoldanylady. Búginde aınalymnan 700-den astam pırotehnıka jáne 97 qorap sertıfıkattalmaǵan túri alyndy. Mereke qarsańynda taǵy bir márte «Quqyqtyq tártip» profılaktıkalyq is-sharalaryn ótkizý tapsyryldy. Onyń aıasynda pırotehnıkalyq ónimderdi saqtaý jáne satý oryndaryna reıdter uıymdastyrylatyn bolady.
Órt qaýipsizdiginiń tıisti deńgeıin qamtamasyz etýge basa nazar aýdaryldy. TJM kúshteri adamdar kóp jınalatyn 7 myńnan astam nysanǵa tekserý júrgizdi jáne órt qaýipsizdigi boıynsha anyqtalǵan zańbuzýshylyqtar joıyldy. Jańa jyldyq is-sharalar ótkiziletin oryndar tekserilip, paıdalanýǵa ruqsat berildi. Halyqtyń áleýmettik osal sanatyndaǵy azamattar turatyn turǵyn úılerde órtke qarsy datchıkterdi montajdaý jalǵasyp jatyr. Qazir 36 myńnan astam qorǵanys qurylǵylary ornatylǵan.
Premer-mınıstr is-sharalar ótkiziletin nysandardaǵy qaýipsizdiktiń tıisti deńgeıin qamtamasyz etýdi tapsyrdy. Osy maqsatta nysandarda aldyn ala tekserý, qyzmetkerlerge tıisti nusqaýlar berý, oqý-jattyǵý jumystaryn júrgizý qajettigine nazar aýdardy. Ásirese órt sóndirý quraldary men gıdranttardyń jaramdylyǵyn tekserý qajet. Aýa raıyna qaramastan, adamdar kóp jınalatyn nysandarǵa baratyn joldar táýlik boıy ashyq bolýy kerek. TJM men ІІM birlesip, tıisti sharalar qabyldaýy tıis. Sonymen qatar adamdardy shuǵyl evakýatsııalaý boıynsha is-qımyldardy pysyqtap, qajet bolsa, qosymsha oqý-jattyǵýlaryn ótkizý qajet.
Mereke kúnderi qala ishinde de, shyǵaberis joldarynda da avtomobıl trafıgi artýyna baılanysty avtomobıl joldarynda erekshe baqylaý ornatyldy. Qutqarýshylar aýa raıynyń nasharlaýyna daıyn: avtojoldarda jylytý pýnktteri jabdyqtalǵan, arnaıy tehnıka men avıatsııa jedel den qoıý rejımine aýystyryldy. ІІM Kólik mınıstrligimen birlesip, avtomobıl joldaryndaǵy qaýipsizdik sharalaryn kúsheıtedi. Jol qozǵalysy erejeleriniń saqtalýyn, avtojoldardyń jaı-kúıin, sondaı-aq júktemesi úlken jáne týrıstik baǵyttarda qaýipsiz jol qozǵalysyn uıymdastyrýdy baqylaýǵa alady. Óńirlerde balalardy tasymaldaýda mindetti túrde polıtsııa qyzmetkerleri birge erip júrýge tıis. Ákimderge bul máseleni erekshe baqylaýǵa alý tapsyryldy.
Qysqy demalys jáne jańa jyldyq mereke kúnderi mektep jasyndaǵy balalardyń bos ýaqytyn qyzyqty sharalarmen tolyqqandy qamtamasyz etý mańyzdy. Oqý-aǵartý mınıstrligine qaýipsizdik sharalary, sonyń ishinde qys mezgilindegi qaýipsizdik sharalaryn túsindire otyryp, qosymsha ata-analar jınalystaryn ótkizý tapsyryldy. Múddeli memlekettik organdarmen birlesip, mereke kúnderi qaýipsizdik sharalary týraly halyqty keńinen habardar etýdi uıymdastyrý qajet.
— Óńir ákimdikterine aldaǵy merekelerdi qaýipsiz ótkizý boıynsha keshendi profılaktıkalyq sharalardy qabyldaýdy tapsyramyn. Energetıka mınıstrligi ákimdiktermen birlesip, energetıkalyq obektilerde qaýipsizdikti jáne olardyń aqaýlarsyz jumys isteýin qamtamasyz etsin. Jylytý jáne sýmen jabdyqtaý júıeleriniń barlyq parametrin saqtap, jedel áreket etý úshin jóndeý brıgadalarynyń kezekshilik kestesin jasaý qajet. Jalpy alǵanda barlyq memlekettik organdar men qurylymdar mereke kúnderin sátti jáne tynysh ótkizý úshin jan-jaqty sharalar qabyldaýy kerek, — dep atap ótti Oljas Bektenov.
Jıyn barysynda turmystyq zorlyq-zombylyq, balalardy qaraýsyz qaldyrý jáne retsıdıvtik qylmysqa qarsy kúres jónindegi normalardy biriktiretin Parlament qabyldaǵan «Quqyq buzýshylyq profılaktıkasy týraly» jańa biryńǵaı zańdy júzege asyrýǵa nazar aýdaryldy.
— Jańa profılaktıka júıesi Prezıdent memleket pen qoǵam jumysynyń myzǵymas ustanymdarynyń biri retinde aıqyndaǵan «Zań men Tártip» qaǵıdatyn qamtamasyz etýge baǵyttalǵan. Zańnyń jańalyqtarynyń biri — azamattar men jergilikti qoǵamdastyqty quqyq buzýshylyqtardyń aldyn alý jumystaryna tartý jáne olardy yntalandyrý. Bul degenimiz — barlyǵy profılaktıkany júzege asyrady degen sóz. Mundaı tájirıbe barlyq elde tıimdi qoldanylyp keledi. Ony tıimdi iske asyrý qajet. Sonymen qatar zańda óskeleń urpaqty tárbıeleý boıynsha jańa tásilder qaralǵan, bul — qazir óte ózekti másele. Jasandy ıntellektini paıdalaný quqyq buzýshylyqtardyń profılaktıasy boıynsha jedel sharalardy aldyn ala boljaýǵa jáne ázirleýge múmkindik beredi, — dep atap ótti Premer-mınıstr.
Zańda retsıdıvtik qylmystyń aldyn alý jónindegi normalar, sondaı-aq barlyq memlekettik organ úshin jalpy quzyret kózdelgen. Aldyn alý tek quqyq qorǵaý organdary úshin ǵana emes, búkil memlekettik apparat úshin mindet ekeni atap ótildi. Barlyq qurylym quqyqbuzýshylyqtardyń azaıýy úshin jumys isteýi kerek.
Memlekettik organdarǵa zańdy júzege asyrýǵa baǵyttalǵan barlyq normatıvtik quqyqtyq aktilerdi ázirleýdi jáne qabyldaýdy jedeldetý tapsyryldy. Ákimder jergilikti deńgeıde quqyqbuzýshylyqtardyń aldyn alý júıesin qurýdy jáne onyń jumys isteýin qamtamasyz etýge, azamattardy quqyqtyq tárbıeleýge erekshe nazar aýdarýy tıis.
Premer-mınıstr kámeletke tolmaǵandar jasaǵan quqyq buzýshylyqtardyń sanyn azaıtý maqsatynda birqatar tapsyrma berdi. Іshki ister mınıstrligine túngi ýaqytta patrýlder men reıdter júrgizý sheńberinde kámeletke tolmaǵandardyń eresekterdiń qaraýynsyz bolý faktileriniń jolyn kesý tapsyryldy. Óńirlerdiń ákimderi — ásirese ishki ister organdarynda esepte turǵan balalardy bos ýaqytymen qamtýdy ulǵaıtý qajet.
Eńbek jáne halyqty áleýmettik qorǵaý mınıstri Svetlana Jaqypova áleýmettik kómek áleýmettik táýeldilik pen quqyq buzýshylyqtyń aldyn alýmen tikeleı baılanysty ekenin aıtty. «Bir tereze» qaǵıdaty boıynsha qyzmet kórsetetin 153 otbasyn qoldaý ortalyǵy jumys isteıdi. Osy jyldyń basynan beri ortalyq mamandary 76 myń azamatqa 111 myńnan astam qyzmet kórsetti, bul qıyn ómirlik jaǵdaıda otbasylardy keshendi súıemeldeýdiń tıimdiligin kórsetedi.
Budan bólek, buryn sottalǵan adamdar tarapynan qylmystarǵa jol bermeý jónindegi sharalar qaraldy. Osylaısha, jańa zań barlyq bosatylǵan azamattar úshin oıyn-saýyq oryndaryna barýǵa jáne túngi ýaqytty ótkizýge shekteýler bar ákimshilik qadaǵalaýdy engizedi. Elimizde 2402 tósek-orynǵa arnalǵan 27 áleýmettik beıimdeý ortalyǵy bar. Jelini keńeıtý, sondaı-aq jumys berýshilerdi azamattardyń osy sanatyn jumysqa ornalastyrýǵa yntalandyrý jóninde usynystar engizildi. Eńbek jáne halyqty áleýmettik qorǵaý mınıstrligi otbasynyń tsıfrlyq kartasy jáne FSM Social platformasy arqyly belsendi qyzmet kórsetý jáne jumyspen qamtýǵa járdemdesý boıynsha jumys júrgizip jatyr.
Bıyl Memleket basshysynyń tapsyrmasy boıynsha ýákiletti memlekettik organdar óńirlik komıssııalardyń jumysyna taldaý júrgizdi. Ákimdikterge komıssııanyń jumys tártibin jańa tásilderdi eskere otyryp qaıta formattaý tapsyryldy.
Otyrys qorytyndysy boıynsha qoǵamdyq qaýipsizdikti, kóshi-qon jaǵdaıyn jáne taǵy basqalardy qamtamasyz etý tujyrymdamasyn júzege asyrý máselelerin qamtıtyn vedomstvoaralyq komıssııanyń 2026 jylǵa arnalǵan jumys jospary bekitildi.
Aıta keteıik, Oljas Bektenov aldaǵy merekede ishki ister organdaryna qoǵamdyq tártipti qorǵaýdy tapsyrdy.
