Úkimette avtomobıl jáne temir joldardy damytý jónindegi ınvestıtsııalyq jobalar qaraldy
ASTANA. KAZINFORM – Úkimette Premer-mınıstrdiń orynbasary – Ulttyq ekonomıka mınıstri Serik Jumanǵarınniń tóraǵalyǵymen ótken ekonomıkalyq ósýdi qamtamasyz etý jónindegi shtab otyrysynda avtomobıl jáne temirjoldardy damytý jónindegi ınvestıtsııalyq jobalar qaraldy.
Úkimettiń baspasóz qyzmeti habarlaǵandaı, bıyl jalpy qarjylandyrý somasy 781,2 mlrd teńgege 8,8 myń shaqyrym avtojol túrli jóndeý túrimen qamtylady. Onyń ishinde 2,1 myń shaqyrym qaıta jańartylsa, 459,6 shaqyrymǵa kúrdeli jóndeý júrgizilip, 6,3 myń shaqyrymǵa ortasha jóndeý jasalady. Sondaı-aq bıyl «Qaraǵandy – Jezqazǵan», «Aqtóbe – Ulǵaısyn», «Atyraý – Dossor», Qyzylorda, Rýdnyı, Saryaǵash, Petropavl qalalarynyń aınalma joly sekildi 1 myń shaqyrym avtojol salý men rekonstrýktsııalaý boıynsha 7 jańa joba iske qosylady.
«QazAvtoJol» UK» AQ basshysy Darhan Imanashev shekaralyq aımaqtar arqyly tıimdi jáne qaýipsiz tranzıtti qamtamasyz etý sharasy týraly habardar etti. Ol úshin avtomobıl ótkizý pýnktterin (AÓP) kezeń-kezeńimen qaıta qurý júrgiziledi. Qazaqstan shekarasy boıynda jumys istep turǵan 52 AÓP-tiń 2030 jylǵa deıin 36-sy qaıta jańartylady.
– 2025 jylǵy jobalarǵa 644 mlrd teńge, jańa jobalarǵa 3,05 trln teńge ınvestıtsııa salǵan kezde 2048 jylǵa qaraı 6,4 trln teńgege deıin ekonomıkalyq nátıje bolady degen oıdamyz, - dedi ol.
2025 jylǵy 1 sáýirdegi jaǵdaı boıynsha Qazaqstanda jalpy uzyndyǵy 3,9 myń shaqyrym 20 aqyly avtojol ýchaskesi jumys istep tur. 2025 jylǵy jospar boıynsha jalpy uzyndyǵy 5,5 myń shaqyrym taǵy 26 aqyly ýchaske iske qosylady. 2024 jylǵy tólemaqy alýdan túsken tabys 48,4 mlrd teńge.
«QTJ» UK» AQ osy jylǵy shildede ekinshi joldardyń qurylysy boıynsha negizgi jumysty aıaqtap, uzyndyǵy 836 shaqyrym «Dostyq – Moıynty» ýchaskesi boıynsha poıyz qozǵalysyn iske qosýdy josparlap otyr. Іske asyrylýy 3 jyl júrgizilgen jobanyń quny – 542,8 mlrd teńge. Sondaı-aq bıyl negizgi jolynyń uzyndyǵy 75 shaqyrym bolatyn 123 shaqyrym «Almaty aınalma joly» t/j jelisiniń qurylysy aıaqtalmaq. Joba quny – 151,7 mlrd teńge.
Kelesi jyly ınvestıtsııa kólemi 720,4 mlrd teńge bolatyn «Qyzyljar – Moıynty» temirjol magıstraliniń qurylysyn aıaqtaý men «Altynkól – Jetigen» ýchaskesin jańǵyrtý (107,8 mlrd teńge) josparlanyp otyr. Jumys jospar boıynsha júrgizilip jatyr.
Shtab otyrysynyń qorytyndysynda vıtse-premer ulttyq kompanııalarǵa barlyq ınfraqurylymdyq jobany belgilengen merzimde aıaqtaýdy tapsyrdy. Memlekettik organdar jobalardy ýaqytyly iske asyrýǵa kedergi keltiretin bıýrokratııalyq kidiristerdi sheshý úshin turaqty baqylaý júrgizip, tolyq járdem kórsetýi tıis.
Aıta keteıik, SQO joldarynda polıtseıler dron paıdalana bastady.