Úkimette «Aýylda densaýlyq saqtaýdy jańǵyrtý» ulttyq jobasynyń júzege asyrylý barysy talqylandy

ASTANA. KAZINFORM - Úkimette «Aýylda densaýlyq saqtaýdy jańǵyrtý» ulttyq jobasynyń júzege asý barysy talqylandy, dep habarlaıdy Úkimettiń baspasóz qyzmeti.

QR Premer-Mınıstriniń orynbasary Tamara Dúısenovanyń tóraǵalyǵymen ótken keńeske múddeli ortalyq memlekettik organ ókilderimen birge, oblys ákimderiniń orynbasarlary qatysty.

Ulttyq joba aıasynda jalpy sany 655 alǵashqy medıtsınalyq-sanıtarııalyq kómek berý nysanyn salý kózdelgen bolatyn.

Byltyrdan beri júzege asyp kele jatqan baǵdarlama sheńberinde 95 nysan paıdalanýǵa berilgen. Joba aıasynda atqarylyp jatqan sharalar týraly densaýlyq saqtaý vıtse-mınıstri Jandos Búrkitbaev baıandady.

Onyń sózinshe, búginde 483 nysan boıynsha jobalyq-smetalyq qujat daıyn. 355-ine qatysty tıisti qarjy bólindi.

«Qazirde óńirlerde qurylys jumystary júrip jatyr. Sonymen qatar biz qalǵan nysandarǵa qatysty jobalyq qujattardy bekitý, avtorlyq, tehnıkalyq baqylaý boıynsha kelisimsharttardy jasaý úrdisin de baqylap otyrmyz», — dedi Jandos Búrkitbaev.

Ulttyq joba aýyldaǵy aǵaıynnyń medıtsınalyq kómekke qoljetimdiligin arttyrýdy kózdeıdi. Onyń azamattar úshin mańyzy asa joǵary ekenin atap ótken vıtse-premer birqatar tapsyrma berdi.

«Qurylysy júrýi tıis nysandardyń qatary kóp ekenin eskersek, bul másele turaqty ári jan-jaqty qadaǵalaýdy qajet etedi. Jumystardyń sapasyna basa mán berilýi tıis. Jobanyń halyq úshin áleýmettik mańyzy zor, sáıkesinshe artylar jaýapkershilik te joǵary. Sol sebepti barlyq múddeli memlekettik organdar, oblys ákimdikteri jumyla otyryp, baqylaýdy kúsheıtýi qajet», — dep atap ótti Tamara Dúısenova.

Aıta keteıik, jobanyń júzege asý barysyna qatysty esep vıtse-premer deńgeıinde apta saıyn qarastyrylyp otyrmaq.