Úkimette Almaty oblysynda tuzdy taǵamdar óndiretin zaýyt salý máselesi talqylandy
ASTANA. KAZINFORM — Oljas Bektenov PepsiCo kompanııasynyń óńirdegi basshysy Davıd Manzınımen Almaty oblysynda zaýyt salý máselesin talqylady. Bul týraly Úkimettiń baspasóz qyzmeti habarlady.
Premer-mınıstr Oljas Bektenov PepsiCo kompanııasynyń Reseı, Belarýs, Kavkaz jáne Ortalyq Azııa óńiri boıynsha prezıdenti Davıd Manzınımen kezdesý ótkizdi. Almaty oblysynda tuzdy taǵamdar óndiretin zaýyt salý boıynsha jobany iske asyrý máseleleri talqylandy.
Jańa PepsiCo zaýyty Ortalyq Azııadaǵy eń iri zaýyt bolmaq. 2024 jylǵy maýsymda ótken kelissózder qorytyndysy boıynsha ınvestıtsııa kólemi $160 mln bolatyny josparlanǵan. Kartop óńdeýdiń óndiristik qýaty men kólemi úsh esege artyp, 70 myń tonnadan 210 myń tonnaǵa deıin ósedi. Bul jylyna shamamen 70 myń tonna daıyn ónim shyǵarýdy qamtamasyz etedi. Kásiporynda 900-ge jýyq jumys orny ashylady. PepsiCo kompanııasynyń Reseı, Belarýs, Kavkaz jáne Ortalyq Azııa óńiri boıynsha prezıdenti Davıd Manzını jobanyń birinshi kezeńin iske qosý jáne qazaqstandyq ónimniń birinshi partııasyn shyǵarý 2026 jyldyń naýryz aıyna josparlanǵanyn, 2027 jyldyń qyrkúıeginde zaýyttyń tolyq qýatqa shyǵýy boljanyp otyrǵanyn aıtty.
Joba aıasynda jergilikti shıkizatty paıdalaný kózdelýde — kartopty jetkizýge qazaqstandyq fermerlik sharýashylyqtar tartylady. 2035 jylǵa deıin PepsiCo chıp sorttaryn ósirýdi tolyq lokalızatsııaǵa kóshýdi josparlap otyr. Qazirgi ýaqytta baǵdarlamaǵa Pavlodar, Aqmola, Qaraǵandy, Almaty oblystary men Jetisý oblystarynan shamamen 15 sharýashylyq qosylǵan. Sondaı-aq shıkizatty saqtaý bazasyn keńeıtý jáne ónimniń ónimdiligi men sapasyn arttyrýdyń ǵylymı tásilderin damytý kózdelgen.
— Biz joǵary óńdelgen daıyn ónim shyǵarýǵa baǵyttalǵan osyndaı jobalardy tolyq qoldaımyz. Memlekettik organdar eki apta ishinde barlyq qajetti sheshimderdi qabyldaıdy, — dep atap ótti Oljas Bektenov.
— Biz Qazaqstan bıligi tarapynan kórsetilgen qoldaýdy joǵary baǵalaımyz. Sheteldik ınvestor retinde bizge qolaıly jaǵdaılar jasalǵan. Búginde joǵary áleýetti kórip otyrmyz, sondyqtan Qazaqstanǵa ınvestıtsııa kólemin eki esege arttyrý týraly sheshim qabyldadyq, — dep atap ótti Devıd Manzını.
Kezdesý qorytyndysy boıynsha Syrtqy ister mınıstrligine eki apta ishinde Qazaqstan Úkimeti men PepsiCo arasynda Investıtsııalar týraly kelisim daıyndaý tapsyryldy. Osy merzimde Aýyl sharýashylyǵy mınıstrligi ınvestor úshin barynsha qolaıly jaǵdaı jasaý maqsatynda Investıtsııalyq salymdar kezinde agroónerkásip kesheni sýbektisi shyǵystarynyń bir bóligin óteý boıynsha sýbsıdııalaý qaǵıdalaryna qajetti túzetýler engizedi.
Aıta ketelik elde «Qorqyt Ata» jańa arnaıy ekonomıkalyq aımaǵy qurylǵan edi.