Úkimette Almaty oblysynda salynyp jatqan tuzdy tiskebasar shyǵaratyn zaýyt máselesi qaraldy
ASTANA. KAZINFORM – Premer-mınıstr Oljas Bektenov jahandyq ınvestıtsııalar jónindegi VIII qazaqstandyq dóńgelek ústelge (KGIR-2025) qatysýshylarmen birqatar kezdesý ótkizdi. Bul týraly Úkimettiń baspasóz qyzmeti habarlady.
Memleket basshysy Qasym-Jomart Toqaev atap ótken jańa ınvestıtsııalyq tsıkldi iske qosý mindetteri aıasynda QR Úkimeti el ekonomıkasyna sheteldik ınvestıtsııa kólemin ulǵaıtý maqsatynda halyqaralyq kompanııalarmen jáne uıymdarmen ózara is-qımyl boıynsha júıeli jumys júrgizip jatyr.
Agroónerkásip kesheni, energetıka, kommýnaldyq sektorlar jáne basqa da salalardaǵy aǵymdaǵy jáne perspektıvalyq jobalar aıasynda ınvestıtsııalyq yntymaqtastyq baǵyttary qaraldy.
Eýropalyq qaıta qurý jáne damý bankiniń vıtse-prezıdenti Matteo Patronemen banktiń Qazaqstan aýmaǵynda ınfraqurylymdyq jobalarǵa qatysý máseleleri talqylandy. Sondaı-aq shaǵyn jáne orta bıznesti damytý baǵyttaryna nazar aýdaryldy.
Reseı, Belarýs, Kavkaz jáne Ortalyq Azııa aımaǵy boıynsha PepsiCo kompanııasynyń prezıdenti Devıd Manzınımen kezdesý barysynda Almaty oblysynda qurylysy aqtalýǵa jaqyn turǵan tuzdy tiskebasarlar shyǵaratyn zaýyt jónindegi jobanyń iske asyrylý barysy qaraldy. Óńir ákimdikterine tıisti memlekettik organdarmen birlesip, ınvestıtsııalyq jobany qajetti ınfraqurylymdyq sheshimdermen qamtamasyz etýge odan ári járdemdesý tapsyryldy.
Fufeng Group dırektorlar keńesiniń tóraǵasy Lı Sıýechýnmen Jambyl oblysynda júgerini tereń óńdeý boıynsha tiginen ıntegratsııalanǵan ónerkásiptik park jobasyn júzege asyrýǵa kóńil bólindi. Óndiris otandyq shıkizatqa negizdeletin bolady. Investor aldaǵy óndiristi iske qosý úshin «jyldam dáliz» tetigi sheńberinde qolaıly bıznes-ortany jáne jasalǵan jaǵdaılardy oń baǵalady.
Kezdesý qorytyndysy boıynsha Oljas Bektenov Qazaqstan Úkimeti ınvestorlarǵa jan-jaqty qoldaý kórsetip jáne bıznes-jobalardy tolyq súıemeldeýge basa nazar aýdara otyryp, qolaıly ınvestıtsııalyq ahýaldy qalyptastyrýdy jalǵastyratynyn atap ótti. Jańa óndiristerdi iske qosý eldiń ónerkásiptik jáne eksporttyq áleýetin nyǵaıtý, sondaı-aq jańa jumys oryndaryn ashý úshin strategııalyq mańyzǵa ıe.
Aıta keteıik, Astana irgesinde tamaq óńdeıtin 20 zaýyt shoǵyrlanady.