Úkimette Almaty áýejaıyn jańǵyrtý jumystarynyń barysy qaraldy
ASTANA. KAZINFORM — Premer-mınıstr Oljas Bektenov Memleket basshysynyń halyqaralyq avıatsııalyq hab qurý jónindegi tapsyrmalaryn júzege asyrý sheńberinde Almaty qalasynyń áýejaıyn damytý máseleleri boıynsha keńes ótkizdi. Bul týraly Úkimettiń baspasóz qyzmeti habarlady.
TAV Airports Holding bas dırektory Serkan Kaptan men Almaty halyqaralyq áýejaıynyń prezıdenti Góker Kóse Horizon kompanııasynyń 2050 jylǵa deıingi strategııalyq damý baǵdarlamasyn júzege asyrý barysy týraly baıandady. Qazirgi tańda ishki reıster termınalyn rekonstrýktsııalaý, muzdan tazartatyn zamanaýı platformasyn qurý, jaqyn mańdaǵy turǵyn úılerdi shýdan oqshaýlaý jáne basqa da jumystar júrgizilip jatyr.
Jalpy, tujyrymdamada negizgi jolaqty tolyq rekonstrýktsııalaý arqyly úsh ushý-qoný jolaǵynan turatyn júıe qurý, júk perronynyń qurylysy, logıstıkalyq jáne qoıma keshenderin, jolaýshylarǵa arnalǵan zamanaýı ınfraqurylymdy salý jáne taǵy da basqalar kózdelgen. Jańǵyrtý jumystary 2050 jylǵa qaraı áýejaıdyń jyl saıynǵy ótkizý qabiletin 55 mln jolaýshyǵa jáne 500 myń tonna júkke deıin ulǵaıtýǵa múmkindik beredi. Búgingi tańda áýe aılaǵy jylyna 12 mln-nan astam jolaýshyǵa qyzmet kórsetip, QR-da avıatasymaldaý kóleminiń 70%-yn qamtamasyz etedi.
TAV Airports Holding basshylyǵy búgingi kúnge deıin $260 mln ınvestıtsııalanǵanyn habarlady jáne jobanyń barlyq kezeńiniń jedel oryndalýy úshin áýejaı paıdasyn odan ári qaıta ınvestıtsııalaýǵa daıyn ekenin rastady.
Oljas Bektenov Almaty qalasynyń áýejaıy Prezıdent tapsyrmasymen elimizdiń alty qalasynda qurylyp jatqan birtutas ekojúıe tizbegine kiretinin atap ótti. Jańa deńgeıdegi ınfraqurylymdy qurý jáne áýe aılaǵynyń ótkizý qabiletin arttyrý úshin barlyq jumysty ýaqtyly aıaqtaýdyń mańyzdylyǵyn aıtty.
Nysannyń qoljetimdiligi máselelerin sheshý jáne azamattarǵa qolaılylyqty qamtamasyz etý úshin áýejaı aýmaǵyn aınalyp ótetin, qalalyq avtomagıstraldy, Úlken Almaty aınalma avtojolyn, júk keshenin jáne áýejaıǵa negizgi kireberisti jyldam shyǵý múmkindigimen baılanystyratyn aınalma jol salý máseleleri qaraldy. Avıaotyndy jetkizý men saqtaýdyń turaqty jaǵdaılaryn qamtamasyz etýge nazar aýdaryldy.
Jıyn qorytyndysy boıynsha Premer-mınıstr salalyq mınıstrlikter men Almaty qalasy ákimdigine rekonstrýktsııalaý jumystarynyń sapaly ári ýaqtyly aıaqtalýyn jiti qadaǵalaýdy tapsyrdy.
Aıta ketelik Úkimet SQO-daǵy qorǵanys bógetin rekonstrýktsııalaýǵa 1,4 mlrd teńge bóldi.