Úkimette 9 aıdaǵy ekonomıka damýynyń aldyn ala qorytyndysy qaraldy
ASTANA. KAZINFORM – Premer-mınıstrdiń orynbasary – Ulttyq ekonomıka mınıstri Serik Jumanǵarınniń tóraǵalyǵymen ótken Ekonomıkalyq ósýdi qamtamasyz etý jónindegi shtab otyrysynda 9 aıdaǵy ekonomıkalyq ósimniń aldyn ala nátıjeleri qaraldy. Bul týraly Úkimettiń baspasóz qyzmeti habarlady.
Jalpy ishki ónimniń ósimine negizgi úlesti qurylys, óńdeý ónerkásibi, kólik jáne qoımaǵa jınaý, saýda jáne aýyl sharýashylyǵy salalary qosyp otyr.
Óńdeý ónerkásibinde qańtar-qyrkúıek aılarynyń qorytyndysy boıynsha naqty kólem ındeksinde oń ósim saqtalady dep josparlanǵan. Ósimdegi negizgi úlesti mashına jasaý jáne hımııa ónerkásibi qamtamasyz etip otyr.
2026 jylǵy 8 aıdyń qorytyndysy boıynsha mashına jasaý salasynda jeńil avtomobıl óndirisi 34,2%-ǵa ósip, 117,2 myń birlikke jetti. Júk jáne arnaıy tehnıka óndirisi 18,5%-ǵa, temirjol platformalaryn shyǵarý 76,6%-ǵa, jolaýshylar vagony óndirisi 40,9%-ǵa ulǵaıdy. Hımııa ónerkásibinde kúkirt qyshqyly óndirisi 4%-ǵa, polıpropılen 24,5%-ǵa, ammofos 10,3%-ǵa ósti.
Bul rette metallýrgııada NKI 97,5% deńgeıinde saqtalyp otyr. Kórsetkishterdi jaqsartý úshin shıkizat bazasyn keńeıtý sharalary qabyldanyp jatyr. El ishinde jáne shetelde áleýetti jetkizýshilermen kelissóz júrgizilip jatyr.
Serik Jumanǵarın Ónerkásip jáne qurylys mınıstrliginiń Saýda jáne ıntegratsııa mınıstrligimen birlesip kásiporyndardy shıkizattyń qosymsha kólemimen qamtamasyz etý boıynsha qabyldap jatqan sharalary týraly aqparatty tyńdady. Talqylaý qorytyndysy boıynsha metallýrgııa salasy úshin shıkizat bazasyn keńeıtý jumysyn jalǵastyrýdy tapsyrdy.
Qurylysta da oń dınamıka saqtalyp otyr. Qańtar-tamyzda qurylys jumystarynyń kólemi 6,1 trln teńge nemese ótken jylǵy sáıkes kezeńmen salystyrǵanda 115,6% boldy. Ósim 18 óńirde baıqaldy. Toǵyz aıdyń qorytyndysy boıynsha qurylys jumystary kóleminiń ulǵaıýy boljanýda. Máselen, turǵyn úı qurylysynda ósim saqtalyp otyr: segiz aıda 11,3 mln sharshy metr turǵyn úı paıdalanýǵa berildi, bul ótken jylǵy kórsetkishten 3,6%-ǵa artyq. Toǵyz aıdyń qorytyndysy boıynsha 12,8 mln sharshy metr turǵyn úı paıdalanýǵa beriledi dep boljanǵan.
Kóliktik-logıstıkalyq sektor oń dınamıkany saqtap otyr. Júk tasymalynyń ósýindegi negizgi úlesti astyq pen kómir temir jol tasymaly qamtamasyz etedi. Astyq tasymaldaý kólemi 3 mln tonnaǵa artyp, 13,6 mln tonnaǵa jetti, kómir 1,1 mln tonnaǵa, temir rýdasy 2,8 mln tonnaǵa ulǵaıdy. Bul qarqyn munaı men gaz tasymaldaý kólemin saqtaý jáne ınfraqurylymdyq jobalardy júzege asyrý arqyly oryndalyp jatyr.
Saýda ekonomıkanyń ósýine aıtarlyqtaı úles qosýdy jalǵastyryp jatyr. Qańtar-tamyzdaǵy saýda salasyndaǵy NKI – 106%. Aınalym 51,5 trln teńgege jetti. Toǵyz aıdyń qorytyndysy boıynsha turaqty ósim boljanyp otyr. Negizgi salymdy kóterme saýda qamtamasyz etýde. Mudaǵy aınalym 34,7 trln teńgege jetti. Ol metallýrgııa ónimi, astyq jáne otyn saýdasynyń ósýi esebinen oryndaldy. Bólshek saýdada aınalym 17 trln teńgege jetip, bul rette azyq-túlik taýary boıynsha eń joǵary qarqyn baıqaldy.
Keńeste óńirlerdegi saýdany damytý máselesi de qaraldy. Vıtse-premer ákimdikterge Premer-mınıstrdiń saýdany damytýdyń óńirlik jol kartalaryn júzege asyrý jónindegi tapsyrmasynyń sapaly oryndalýyn qamtamasyz etýdi tapsyrdy.
Agroónerkásiptik keshende qańtar-qyrkúıek aılarynyń qorytyndysy boıynsha kórsetkishter turaqty ósýi múmkin. Boljam boıynsha oń dınamıka jyl sońyna deıin saqtalady. Bıyl egin jınaý qarqyny byltyrǵydan joǵary. Negizgi úlesti maıly daqyldyń jalpy jınalýynyń ulǵaıýy esebinen egin sharýashylyǵy qamtamasyz etip otyr. Mal sharýashylyǵyndaǵy ósim zamanaýı taýarly sút fermalarynyń jobalyq qýatqa jetýi esebinen sút óndirisiniń artýymen, sondaı-aq bordaqylaý alańdaryn jeńildikpen nesıeleýdiń nátıjesinde et óndirisiniń ósýimen oryndalmaq.
Azyq-túlik ónerkásibi ekonomıkanyń ósýine qosymsha úles qosyp otyr. Qańtar-qyrkúıektiń qorytyndysy boıynsha jańa qýattardy engizý jáne jumys istep turǵan kásiporyndarda óndiristi keńeıtý esebinen óndiriste oń serpin kútiledi.
Serik Jumanǵarın úsh toqsannyń sońynda barlyq negizgi salalar boıynsha boljamdy kórsetkishterdiń oryndalýyn qamtamasyz etý mańyzdy ekenin atap ótti.
– Bizdiń mindetimiz – jyl sońyna deıin qarqyndy jedeldetý emes, bekitilgen jumys kestesin naqty oryndaý. Segiz aıdyń ishinde barlyq negizgi resýrstar taratylyp, qajetti rezervter quryldy. Endigi mindet olardy tıimdi paıdalaný, qarajatty ýaqtyly jáne sapaly ıgerý jáne negizgi salalarda belgilengen jumys kestelerin saqtaý. Basty nazardy óndiristik tizbekterge aýdarý kerek. Bul qurylǵan qýattardy qajetti resýrstarmen jáne jıyntyqtaýyshtarmen (bólshektermen) qamtamasyz etý úshin mańyzdy, - dep túıindedi shtab otyrysyn vıtse-premer.
Arnaıy ekonomıkalyq aımaqtar bólinisindegi basym qyzmet túrleriniń tizbesi bekitilgenin jazǵan edik.
