Úkimetke elimizde jarııalanǵan reformalardy naqty iske asyratyn mamandar kelýi kerek - depýtat

ASTANA. KAZINFORM – Májilis depýtaty Nurlan Áýesbaev Úkimettiń otstavkaǵa ketýine qatysty pikir bildirdi.

«Úkimet túrli esepterdi jarııalap jatyr. Shyn máninde, bizdegi qymbatshylyq órship barady. Elimizde azyq-túlik, janarmaı, avtokólik tym qymbat. Jalpy, osy jaǵdaı halyqqa aýyr tıip otyr. Degenmen, keıbir baǵyttarda ońtaıly ózgerister bar. Atap aıtqanda, Prezıdent Qasym-Jomart Toqaev kópten kútken reformalardy bastady. Osy ózgerister bizdiń ómirimizdi jaqsartýǵa baǵyttalǵan. Tarıhı kezeńdegi osy keremet sheshimderdi tıisti deńgeıde (Úkimettiń) júzege asyrmaýy saldarynan belgili bir qıyndyqtar baıqalyp otyr. Halyqtyń oıyndaǵy túsinbeýshilik osynyń saldarynan bolady. Óıtkeni, iske asyrylyp jatqan aýqymdy reformalar bir jaǵynan durys jetkizilmese, ekinshi jaǵynan – Úkimettiń sózi men isi sáıkes kelmeı tur. Qazirgi jaǵdaı boıynsha geosaıası nemese basqa sebepke siltep jatady, biraq máseleni túpkilikti qaraý kerek», - dedi N. Áýesbaev. 

Sonymen qatar ol Úkimet basshylyǵyna qandaı adam kerek ekenin aıtty. 

«Birinshiden, elin, Otanyn súıetin ultjandy adam kelýi qajet. Ultjandy ári minezdi adam bolýy kerek. Sonymen qatar, onyń uıymdastyrýshylyq qabileti, bilimi, tájirıbeli maman bolýy eskerilýi tıis», - dedi depýtat. 

Budan buryn Prezıdent Úkimetti otstavkaǵa jibergenin jazǵan edik. 

Qazaqstan Respýblıkasy Premer-Mınıstri mindetterin ýaqytsha atqarý Roman Vasılevıch Sklıarǵa júkteldi.