Úkimetaralyq keńes: Qazaqstan men Qyrǵyzstan arasyndaǵy taýar aınalymy 8 aıda 21%-ǵa ósken
ASTANA. KAZINFORM - Qazaqstan Respýblıkasynyń Premer-mınıstri Oljas Bektenov pen Astanaǵa jumys saparymen kelgen Qyrǵyz Respýblıkasy Mınıstrler kabınetiniń tóraǵasy – Prezıdent Ákimshiliginiń basshysy Adylbek Kasymalıev qazaq-qyrǵyz Úkimetaralyq keńesiniń 13-shi otyrysy sheńberinde saýda-ekonomıkalyq yntymaqtastyqty damytý máselelerin talqylady.
Taraptar saýda-ekonomıkalyq baılanystardy keńeıtý áleýetine toqtaldy. Saýda, ónerkásip kooperatsııasy, ınvestıtsııa, energetıka, sý salasy, AÓK, kólik-logıstıka, týrızm jáne taǵy basqa da salalardaǵy ózara is-qımylǵa nazar aýdaryldy.
Qazaqstan men Qyrǵyzstan arasyndaǵy taýar aınalymy osy jyldyń 8 aıynda 21%-ǵa ósip, $1,4 mlrd-ty qurady.
- Qazaqstan Respýblıkasynyń Prezıdenti Qasym-Jomart Toqaev pen Qyrǵyz Respýblıkasynyń Prezıdenti Sadyr Japarovtyń jeke qoldaýy men saıası erik-jigeriniń arqasynda sońǵy jyldary qazaq-qyrǵyz strategııalyq áriptestigi jańa serpinge ıe boldy. Bul turǵyda, bizdiń ortaq maqsatymyz – eki el kóshbasshylarynyń bergen tapsyrmalaryn tolyq oryndaý jáne kópqyrly yqpaldastyqty odan ári keńeıtý. Qyrǵyzstan – biz úshin tatý kórshi, baýyrlas el ǵana emes, sonymen qatar mańyzdy saýda-ekonomıkalyq seriktes memleket. Qazaqstan Úkimeti ortaq múddelerimizge saı keletin maqsattarǵa birlesip atsalysýǵa daıyn, — dep atap ótti Oljas Bektenov.
- Memleketter basshylarynyń birlesken kúsh-jigeri Qyrǵyzstan men Qazaqstan arasyndaǵy strategııalyq áriptestikti sapaly jańa deńgeıge kóterdi. Ekijaqty baılanystardy damytýǵa Qyrǵyz Respýblıkasynyń Prezıdenti Sadyr Japarovtyń Astanaǵa jáne Qazaqstan Respýblıkasynyń Prezıdenti Qasym-Jomart Toqaevtyń Bishkekke resmı saparlary barysynda qol jetkizilgen mańyzdy kelisimder yqpal etti. Úkimet alǵa qoıǵan maqsattarǵa qol jetkizý úshin bar kúsh-jigerin salady, — dep atap ótti Qyrǵyz Respýblıkasy Mınıstrler kabınetiniń tóraǵasy – Prezıdent Ákimshiliginiń basshysy Adylbek Kasymalıev.
Otyrysqa qatysýshylar Úkimetaralyq keńestiń aldyńǵy otyrysynda qabyldanǵan birlesken sharalardyń júzege asyrylý barysyn qarady. Energetıka jáne sýmen jabdyqtaý salalaryndaǵy ózara tıimdi yntymaqtastyqqa, sondaı-aq ınvestıtsııalyq ózara is-qımylǵa nazar aýdaryldy.
AÓK salasyndaǵy ósýdiń jańa baǵyttary belgilendi. Bıylǵy 8 aıda aýyl sharýashylyǵy ónimderiniń saýda kólemi 42%-ǵa ósip, $326 mln-dy qurady, onyń 80%-dan astamy – Qazaqstannan shyǵatyn aýyl sharýashylyǵy ónimderiniń eksporty.
Taý týrızmi – yntymaqtastyqtyń keleshegi zor baǵyttarynyń biri. Eki el aýmaǵynda ornalasqan Han Táńiri shyńynda taý týrızmi baǵyttaryn jandandyrý máseleleri talqylandy.
Bıyl Bishkekte mádenı-gýmanıtarlyq ózara is-qımyl aıasynda birqatar is-shara ótti, onyń ishinde Qazaqstandyq kıno kúnderi, QR halyq ártisi, kompozıtor, dırıjer Nurǵısa Tilendıevtiń týǵanyna 100 jyl tolýyna arnalǵan kontsert jáne taǵy basqa da is-sharalar bar. Kórnekti jazýshylar Muhtar Áýezov pen Shyńǵys Aıtmatovqa arnalǵan «Qazaq-qyrǵyz dostyǵynyń altyn kópiri» eskertkishi mádenıetaralyq dıalogtiń sımvolyna aınaldy.
Qazaqstan men Qyrǵyzstan úkimetteri yntymaqtastyqtyń barlyq negizgi baǵyty boıynsha ekijaqty qarym-qatynastardy odan ári tereńdetýge nıetti ekenin rastady.
Jıyn sońynda qazaq-qyrǵyz Úkimetaralyq keńesiniń 13-shi otyrysy hattamasyna qol qoıyldy.
Osyǵan deıin Almaty men Qyrǵyzstannyń Qarakóli arasynda tikeleı reıs ashylǵany týraly jazdyq.