Úkimet jumysshy mamandyqtar daıyndaýda qandaı tyń tásilder usynbaq
ASTANA. KAZINFORM – Búgin Quryltaı saılaýynan keıin jańadan jasaqtalǵan Úkimettiń alǵashqy otyrysy ótedi. Onda Mınıstrler kabınetiniń músheleri elimizdiń ekonomıkasy úshin mańyzdy taqyryptardyń birin talqyǵa salmaq.
Sonymen Úkimet otyrysynyń kún tártibine jumysshy mamandyqtary boıynda kadrlar daıyndaýdaǵy jańa tásilder taqyryby shyǵarylyp otyr. Kún tártibine shyǵarylǵan másele qaralyp bolǵannan keıin BAQ ókilderine arnaıy baspasóz máslıhaty uıymdastyrylady.
Onyń barysynda Oqý-aǵartý mınıstri Juldyz Súleımenova, Ǵylym jáne joǵary bilim vıtse-mınıstri Gúlzat Kóbenova, Aýyl sharýashylyǵy vıtse-mınıstri Azat Sultanov tilshiler tarapynan týyndaǵan saýaldarǵa jaýap beredi.
Aıta keterligi, Memleket basshysy Qasym-Jomart Toqaevtyń Ulttyq quryltaıdyń IV otyrysynda bergen tasyrmasyna oraı ótken jyl Jumysshy mamandyqtar jyly aıasynda ótti. Jumysshy mamandyqtar jylyn iske asyrý aıasynda memlekettik organdar jumysshy mamandyqtardyń qoǵamdyq mártebesin arttyrýǵa, olardyń eldiń turaqty áleýmettik-ekonomıkalyq damýyndaǵy negizgi rólin aıshyqtaýǵa jáne qoǵamda eńbek qundylyqtaryn nyǵaıtýǵa baǵyttalǵan keshendi júıelik sharalar uıymdastyryldy.
2025 jyly jumysshy mamandyqtarǵa arnalǵan jańa memlekettik nagradalardyń paıda bolýy erekshe mańyzǵa ıe boldy. Bul - eńbekti memlekettik yntalandyrý júıesindegi buryn-sońdy bolmaǵan qadam. «Eńbek sińirgen geolog», «Qazaqstannyń eńbek sińirgen qurylysshysy», «Qazaqstannyń eńbek sińirgen kenshisi», «Qazaqstannyń eńbek sińirgen ónerkásip qaıratkeri» qurmetti ataqtary alǵash ret engizildi. Ol jumysshy mamandyqtar ókilderiniń eldiń ónerkásiptik damýy men baǵalaıtynyn kórsetti.
2025 jyly jalpy 26 kásibı mereke atap ótildi, onyń aıasynda memlekettik jáne vedomstvolyq nagradalarmen 7,5 myńnan astam adam marapattaldy. Budan bólek, jumysshy mamandyqtardyń mártebesin kóterý jáne oqýshylar men stýdentter tarapynan olarǵa degen turaqty qyzyǵýshylyqty qalyptastyrý maqsatynda kásiporyndarda ashyq esik kúnderin jáne jumys berýshilerdiń qatysýmen bos oryndar jármeńkesin ótkizýdi qamtıtyn kásiptik baǵdarlaýdyń keshendi is-sharalary uıymdastyryldy. Ashyq esik kúnderi aıasynda jalpy bilim beretin mektepterdiń oqýshylary metallýrgııa, mashına jasaý, qurylys jáne jeńil ónerkásip kásiporyndarynyń, sondaı-aq qurylys materıaldaryn shyǵarý, shyny, polıgrafııa men aǵash óńdeý salalaryndaǵy uıymdardyń óndiristik protsesterimen jáne eńbek jaǵdaılarymen tikeleı tanysýǵa múmkindik aldy.
2025 jyldyń qorytyndysy boıynsha 27 myń jumys berýshiniń qatysýymen 1,9 myń bos jumys orny jármeńkesi ótkizildi, sondaı-aq 4 347 kásiporyn «ashyq esik kúnderin» uıymdastyrdy. Bos oryndar jármeńkeleri men ashyq esik kúnderine barlyǵy 250 myńǵa jýyq oqýshy men stýdent qatysty. Qosymsha «Seniń mansaptyq bastamań: «Elektrondyq eńbek bırjasyn qalaı paıdalanýǵa bolady» onlaın kýrsymen 527,7 myń oqýshy men stýdent qamtyldy, taǵy 100,7 myń oqýshy kásiptik dıagnostıkadan ótti. Sonymen birge, salalyq memlekettik organdar jumysshy mamandyqtar boıynsha bilim berý júıesin eńbek naryǵymen sınhrondaýdy qamtamasyz etetin 100 kásiptik standartty ázirledi.
Kadrlyq áleýetti turaqty damytý jáne eńbek etýge laıyqty jaǵdaı jasaý memleket úshin negizgi basymdyqtardyń biri bolyp qala beredi. Tehnıkalyq jáne kásiptik bilim berý júıesin jańǵyrtý qarqyndy túrde jalǵasady. Jasandy ıntellekt engizilip jatqan joǵary tehnologııalyq óndiristerge mamandar daıarlaý basty nazarda bolady. Kolledjderge qabyldaýdy odan ári ulǵaıtý, kásiporyndar óndirisi boıynsha kadrlardy maqsatty daıarlaý turaqty jáne úzdiksiz túrde memleket tarapynan qoldaý tabady.
Jastardyń jumysshy mamandyqtarǵa qyzyǵýshylyǵyn arttyrý úshin mektepten bastap aýqymdy kásiptik baǵdarlaý jumysy jalǵasady. Dýaldy oqytý deńgeıin damytý jáne arttyrý, bıznespen áriptestikti nyǵaıtý da júrgizile beredi. Kadrlar daıarlaýdyń halyqaralyq standartyn engizý, stýdentter men pedagogterdiń akademııalyq mobıldigin arttyrý, qazaqstandyq kolledjder bazasynda halyqaralyq kásiptik bilim berý uıymdarynyń jańa fılıaldaryn ashý jalǵasady.
Esterińizge sala ketsek, Quryltaı saılaýynan keıin jańadan jasaqtalǵan Úkimet quramy aıtarlyqtaı ózgere qoıǵan joq. Naqtyraq aıtqanda 4 mınıstr ǵana oryn aýystyrdy. Máselen, Syrtqy ister mınıstri laýazymyna Qazaqstannyń Aýstrııa Respýblıkasyndaǵy Tótenshe jáne Ókiletti Elshisi, Qazaqstannyń Vena qalasyndaǵy halyqaralyq uıymdar janyndaǵy Turaqty ókili bolǵan Muhtar Tileýberdi taǵaıyndaldy. Ol buǵan deıin de Syrtqy ister mınıstriniń birinshi orynbasary, Syrtqy ister mınıstri bolyp jumys istegen edi.
Al Ekologııa jáne tabıǵı resýrstar mınıstri laýazymyna Álibek Qýantyrov kelse, Murat Muhanov Tótenshe jaǵdaılar mınıstrliginiń tizginin ustady.
Elimizde jańadan bekitilgen Qaýipsizdik Keńesi tóraǵasynyń orynbasary laýazymyna joǵarylaǵan Aıda Balaevanyń oryna Mádenıet jáne aqparat mınıstri bolyp Arman Qyryqbaev taǵaıyndaldy.
