Úkimet jumysy Parlamentke zań jobasyn engizýmen aıaqtalmaıdy – Erlan Qoshanov
ASTANA. KAZINFORM – Parlamenttiń 2-sessııasynyń jabylý rásiminde Májilis tóraǵasy Erlan Qoshanov zań jobalaryn ázirleý kezindegi kemshilikterdi atady.
«Zań jobalaryn ázirleý kezindegi kemshilikter jylda qaıtalanyp otyr. Normalar jetkilikti pysyqtalmaıdy, sapasy tómen. Bul týraly biz jylda aıtamyz. Sonyń aıqyn mysaly — Sý kodeksi jobasy. Bul týraly tek depýtattar ǵana emes, sarapshylar da aıtyp júr. Munyń bári kodeks jobasynyń Parlamentte qaralýyn qıyndatyp, uzaqqa sozylýyna áser etedi. Qurylys kodeksiniń jobasy da osyǵan uqsas. Bul jaıt barshaǵa belgili. Zań jobasy múlde «shıki» kúıde kelip tústi. Depýtattar ony taǵy pysyqtap, qaıta jazyp shyǵýǵa májbúr. Májiliske zań jobasyn engizý merzimi — erekshe nazar aýdarýǵa turarlyq másele», — dedi Májilis spıkeri.
Onyń atap ótýinshe, jobalardy engizý merzimi de jıi keshiktiriledi.
«Mysaly, jańaǵy aıtqan Sý kodeksi byltyr naýryz aıynda engizilýi kerek edi. Alaıda, ol bir jylǵa taıaý ýaqyt shegerilip, kesh engizildi. Mańyzdy zań jobasynyń biri Salyq kodeksi áli engizilgen joq. Sonyń saldarynan depýtattardyń onymen sapaly jumys isteýine ýaqyt óte tyǵyz bolǵaly tur. Qurmetti Úkimet músheleri, sizderdiń jumystaryńyz Parlamentke zań jobasyn engizýmen aıaqtalmaıdy. Kerisinshe jumys sol ýaqytta bastalady. Sony eskergenderińiz jón», — dedi Erlan Qoshanov.
Palata tóraǵasy depýtattardyń túzetýlerine qorytyndy berý merzimniń ózi bólek másele ekendigine toqtaldy.
«Ol da uzaqqa sozylyp ketip jatady. Memlekettik organdar bul ádetten áli aryla almaı keledi. Mysaly, densaýlyq saqtaý máseleleri jónindegi zań jobasy boıynsha Úkimettiń qorytyndysyn 8 aıǵa deıin kútýge týra keldi. Áskerı-patrıottyq týraly zań jobasy boıynsha qorytyndyny kelisý 7 aıǵa deıin sozylyp ketti. Taǵy bir másele bizge ratıfıkatsııalaýǵa túsetin kelisimder men sharttar mátinderiniń ózara sáıkestigine qatysty. Kelissóz júrgizilip, elimiz úshin mańyzdy halyqaralyq, memleketaralyq kelisimderge qol qoıylady. Alaıda, zań jobalaryn qaraý merzimi memlekettik organdardyń nemquraıly, salǵyrt qaraýynan memlekettik tildegi qatelerge baılanysty keıinge shegeriledi. Sol sebepti seriktes eldermen kelisim uzaqqa sozylyp, eldiń ımıdjine teris áser etedi. Sondyqtan árbir memlekettik organnyń osy máselege erekshe nazar aýdarýyn suraımyn», — dedi ol.
