Úkimet jumys istep turǵan sharýa qojalyqtardyń jerin lızıngke satý usynysyn qoldamady
ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Serik Jumanǵarın Májilistegi «Aýyl» partııasynyń fraktsııasy depýtattyq saýal arqyly jasaǵan usynysqa jaýap berdi.
— Fermerler men aýyl sharýashylyǵy kásiporyndary ıeleriniń edáýir bóligi bastalǵan jobalaryn toqtatyp, óz sharýashylyqtaryn satýǵa qoıýda. Saýda alańdarynda mundaı habarlandyrýlar sany kún saıyn artyp keledi. Alaıda satyp alýshylar naryǵy is júzinde turalap qalǵan. Birinshiden, daıyn sharýashylyqty satyp alýǵa nıetti azamattar úshin qoljetimdi qarjylyq quraldar joq. Ekinshiden, bank nesıeleri qatań kepildik talaptaryna, baǵalaýdyń ashyq emestigine nemese ótimdi kepil múlkiniń bolmaýyna baılanysty qoljetimsiz. Tipti memlekettik damý ınstıtýttarynyń ózinde de osy baǵytqa laıyqtalǵan baǵdarlama joq. «Aýyl» partııasy fraktsııasy qoldanystaǵy aýyl sharýashylyǵy sharýashylyqtaryn lızıngke berý baǵdarlamasyn ázirlep, ony QazAgroQarjy arqyly jeńildetilgen mólsherlememen jáne qolaıly merzimge iske asyrýdy usynady, — delingen depýtattyq saýalda.
Úkimet jaýabynda bul usynysty qarastyrýdyń ózi múmkin emestigi aıtylǵan.
— Agroónerkásip kesheniniń jumys istep turǵan kásiporyndary ýaqytsha óteýli jer paıdalaný (ÝÓJP) quqyǵyndaǵy aýyl sharýashylyǵy maqsatyndaǵy jer ýchaskelerin qamtıdy. Jer kodeksine sáıkes, ÝÓJP-ny tikeleı satýǵa bes jyldyq jalǵa alý merzimi ótkennen keıin ǵana jol beriledi, — dep jazady Serik Jumanǵarın.
Sondaı-aq, ol mundaı táýekeli úlken baǵdarlama «QazAgroQarjy» aktsıonerlik qoǵamynyń qarjylyq turaqtylyǵyna zııan keltiretinin aıtqan.
— Jumys istep turǵan sharýashylyqtar úshin jeńildikti lızıng baǵdarlamasy qomaqty bıýdjet qarajatyn talap etedi. Sonymen qatar olardy tıimsiz paıdalaný qaýpi bar. Lızıng sheńberinde nysannyń menshik ıesi lızıng berýshi bolyp qala beredi. Bul uzaq merzimdi turaqtylyqty qoldaý strategııasynsyz alǵashqy jyldary sharýashylyqty barynsha paıdalaný qaýpin týdyrady. Bul QAQ-qa problemalyq aktıvtiń qaıtarylýyna ákep soǵýy múmkin. Atalǵan jaǵdaılar QAQ teńgeriminde kóp mólsherdegi problemalyq aktıvterdiń jınaqtalý qaýpin týdyryp, kompanııanyń qarjylyq turaqtylyǵyna jáne onyń aýyl sharýashylyǵy tehnıkasyn jańartý boıynsha negizgi mıssııasyn oryndaý qabiletine teris áser etedi. Baıandalǵannyń negizinde, qazirgi jaǵdaıda QAQ arqyly jumys istep turǵan aýyl sharýashylyǵy kásiporyndaryn satyp alý jáne lızıngke berý jónindegi usynysty qaraý múmkin emes, — delingen jaýapta.
Buǵan deıin Úkimet atalǵan fraktsııanyń agrobank qurý týraly usynysyn taǵy qoldaýsyz qaldyrǵanyn jazǵan edik.