Úkimet jospar bekitti: Drondar óndirisi damytylyp, ushqyshsyz júk tasymaly synalady
ASTANA. KAZINFORM – Elimizde 2026-2029 jyldarǵa arnalǵan ushqyshsyz júıelerdi damytý jónindegi keshendi jospar bekitildi. Qujat otandyq óndiristi damytýǵa, drondardy ekonomıkanyń túrli salasyna engizýge jáne 1 000 maman daıarlaýǵa baǵyttalǵan.
Úkimettiń 2026 jylǵy 13 qazandaǵy qaýlysyna sáıkes, jospar aıasynda ushqyshsyz avıatsııalyq júıelerdiń biryńǵaı tsıfrlyq platformasy men áýe qozǵalysyn avtomattandyrylǵan basqarý júıesi engiziledi. Bul ushý apparattaryn tirkeý, ótinim berý jáne ushý marshrýttaryn kelisý rásimderin tsıfrlandyrýǵa múmkindik beredi.
Sonymen qatar otandyq apparattyq komponentter men baǵdarlamalyq qamtamasyz etý óndirisin damytý, keminde eki ǵylymı-zertteý ortalyǵyn qurý jáne jańa býynnyń 1 000-nan astam mamanyn daıarlaý kózdelgen.
Jospardy iske asyrýǵa 18 memlekettik organ, ákimdikter, damý ınstıtýttary men kvazımemlekettik sektor uıymdary qatysady. Úılestirý mindeti Jasandy ıntellekt jáne tsıfrlyq damý mınıstrligine júktelgen.
Qujatta drondardy paıdalaný salasyndaǵy baqylaýdy kúsheıtý, operatorlardy sertıfıkattaý, ıeleriniń jaýapkershiligin mindetti saqtandyrý jáne baılanys arnalarynyń kıberqaýipsizdigine qoıylatyn talaptardy retteý máseleleri de qamtylǵan.
Ushqyshsyz tehnologııalardy aýyl sharýashylyǵy, energetıka, taý-ken metallýrgııasy, logıstıka, kommýnaldyq sharýashylyq jáne ekologııalyq monıtorıng salalarynda qoldaný josparlanyp otyr. Budan bólek, 2027–2028 jyldary ushqyshsyz júk tasymaldaryn synaqtan ótkizýge arnalǵan pılottyq joba iske qosylmaq.
Sondaı-aq dron-porttar, vertıporttar, avtomattandyrylǵan zarıadtaý stantsııalary men spýtnıktik baılanys ınfraqurylymyn damytý kózdelgen.
Buǵan deıin astanalyq stýdent aýylsharýashylyq dronyn oılap tapqanyn jazǵan edik.
