Úkimet jol boıyndaǵy servıs stansalaryn salýǵa 180 mlrd teńge ınvestıtsııa tartý jónindegi jobany maquldady
ASTANA. KAZINFORM – Úkimet Memleket basshysy Qasym-Jomart Toqaevtyń kólik-logıstıka ınfraqurylymyn damytý jónindegi tapsyrmalaryn júzege asyrý aıasynda Kólik mınıstrligi men «Car Park Transformer» JShS arasynda jańartylatyn energııa kózderin paıdalana otyryp, jol boıyndaǵy servıs stansalaryn salý jónindegi ınvestıtsııalar týraly kelisimdi maquldady. Tıisti qaýlyǵa Premer-mınıstr qol qoıdy.
Úkimettiń baspasóz qyzmeti habarlaǵandaı, jobaǵa tartylatyn jeke ınvestıtsııanyń jalpy kólemi 179,5 mlrd teńge.
Atalǵan joba halyqaralyq jáne respýblıkalyq mańyzy bar avtojoldar boıyndaǵy qazirgi bar demalys alańdarynda 2030 jylǵa deıin jol boıyndaǵy 250 servıs stansasyn salýdy kózdeıdi. Onyń ishinde alǵashqy 50 nysan bıyl salynyp, paıdalanýǵa beriledi. Jańa stansalar sanıtarııalyq-turmystyq úı-jaılardy, saýda jáne qyzmet kórsetý pýnktterin, elektrli kólikterge arnalǵan qýattaý stansalaryn, kún energııasyn óndiretin qondyrǵylardy qamtıdy. Sonymen qatar jańa stansalar irgeles aýmaqtardy abattandyrý jáne kógaldandyrý jumystary júrgizilgen zamanaýı kópfýnktsıonaldy keshender retinde salynady.
Jobany júzege asyrý halyqaralyq standarttarǵa sáıkes keletin jol boıyndaǵy qyzmet kórsetý nysandary jelisin keńeıtýge, elektromobılder úshin zamanaýı ınfraqurylym qurýǵa jáne kólik salasynda ekologııalyq baǵdarlanǵan sheshimderdi engizýge múmkindik beredi. Sondaı-aq jol boıyndaǵy servıs stansalarynyń qurylysy jaqyn mańdaǵy óńirlerdiń áleýmettik ınfraqurylymyn damytýǵa serpin beredi. Joba aıasynda 2 myń jańa jumys orny ashylady.
Búginde elimizde halyqaralyq jáne respýblıkalyq mańyzy bar avtojoldar boıynda 1 428 servıs nysany jumys isteıdi.
Aıta keteıik, Qazaqstanda avtokólik sany jyl saıyn artyp keledi. Soǵan sáıkes tehnıkalyq qyzmet kórsetýge, jóndeýge jáne qosalqy bólshekterge suranys ta ósip keledi.
Ekonomıkalyq zertteýler ınstıtýtynyń Básekelestik ortany zertteý ortalyǵynyń aǵa sarapshysy Beıbarys Áýbákirov bul úrdisterdiń naryqqa jáne shaǵyn ári orta bıznestiń damýyna qalaı áser etip jatqanyn túsindirdi.
