Úkimet jylý energetıkasynda kimderdiń jaýapkershiligi kúsheıetinin naqtylady
Búgin Senattyń jalpy otyrysynda Premer-Mınıstrdiń birinshi orynbasary Roman Sklıar elimizdegi jylý-energetıka júıesin jóndeý nátıjesine qatysty túsinik berdi, dep habarlaıdy Kazinform.
«2029 jylǵa qaraı Úkimettiń aldynda ınjenerlik ınfraqurylym men jylý energııa kózderiniń tozýyn kem degende 15 paıyzǵa tómendetý mindeti tur. Bıyl «Investıtsııa ornyna tarıf» baǵdarlamasy bastaldy. Bizdiń oıymyzsha, bul – eń tıimdi baǵdarlama. 2023 jyly biz osy salaǵa shamamen 220 mlrd teńge jeke ınvestıtsııa tartyp, qysqa daıyndyq barysynda 6 myń shaqyrymǵa jýyq ınjenerlik ınfraqurylym men 77 jylý energııa kózin – JEO, GRES jáne ártúrli qazandyqtardy jóndedik. Sonymen qatar, osy saladaǵy 200 myńǵa jýyq jumysshynyń jalaqysy edáýir ósti. Bul osy nysandardaǵy jumys sapasyn jaqsartýǵa múmkindik beredi», - dedi R. Sklıar senatorlardyń suraǵyna jaýap bere otyryp.
Onyń paıymynsha, bul saladaǵy tsıfrlandyrý mańyzdy aspektige aınaldy
«Bıyl jeltoqsanda jylý elektr energetıkasynyń tsıfrlyq platformasyn iske qosamyz. Onda bizdiń jylý energııa kózderimizdiń barlyq elektrondy tólqujaty (pasporty) ımplementatsııalanady. Bul rejımde ınvestıtsııalyq mindettemelerdiń oryndalýyn baqylaý múmkindigi bolady. Jaýapkershilikti kúsheıtýge kelsek, bul – óte mańyzdy másele. Biz tıisti túzetýler ázirlep jatyrmyz, jaqyn arada olardy Májiliske engizemiz. Olar tabıǵı monopolııalar sýbektisiniń, sondaı-aq ınvestıtsııalyq baǵdarlamalardy oryndaý jáne jabdyqtardy sapaly jóndeýge qatysty birinshi basshynyń jaýapkershiligin kúsheıtýge baǵyttalady», - dedi Roman Sklıar.
