Úkimet jyl saıyn 100-den astam ınvestıtsııalyq jobany iske qosady
ASTANA. KAZINFORM – Aldaǵy 3 jylda óńdeý ónerkásibi men agroónerkásiptik keshende jyl saıyn 100-den astam ınvestıtsııalyq jobany iske qosý josparlanyp otyr. Bul týraly Úkimet otyrysynda makroekonomıkalyq turaqtandyrý jáne halyqtyń ál-aýqatyn arttyrý jónindegi birlesken is-qımyl baǵdarlamasyn tanystyrǵan Premer-mınıstrdiń orynbasary – Ulttyq ekonomıka mınıstri Serik Jumanǵarın aıtty.
- Sizdiń qaraýyńyzǵa Úkimettiń, Ulttyq banktiń jáne Qarjy naryǵyn retteý jáne damytý agenttiginiń Makroekonomıkalyq turaqtandyrý jáne halyqtyń ál-aýqatyn arttyrý jónindegi 2026 – 2028 jyldarǵa arnalǵan birlesken is-qımyl baǵdarlamasynyń jobasy shyǵaryldy. Baǵdarlamanyń basymdyǵy - ekonomıkanyń sapaly jáne ornyqty ósýin qamtamasyz etý jáne ınflıatsııany tómendetý esebinen halyqtyń naqty tabysyn arttyrý. Ol úshin baǵdarlamada ekonomıkalyq saıasattyń negizgi baǵyttarynyń sharalary men quraldarynyń jıyntyǵy qarastyrylǵan, - dedi ol Úkimet basshysyna qarata.
Onyń dereginshe, ekonomıkanyń sapaly ósýi bıyl da jalǵasty. Osy jyldyń 10 aıynyń qorytyndysy boıynsha ekonomıkanyń ósýi 6,4 paıyzdy qurady. Naqty sektordaǵy ósim - 8,2, qyzmetter óndirisi 5,3 paıyzǵa ósti. Salalar arasynda kólik qyzmetteri, qurylys jáne taý-ken ónerkásibi eń joǵary ósimdi kórsetedi. Saýda – 9, óńdeý ónerkásibi 5,8, aýyl sharýashylyǵy 5,4 paıyzǵa artty. Óńdeý ónerkásibinde mashına jasaýda óńdiristiń 11,5 paıyzǵa, onyń ishinde avtomobıl jasaýda – 13,3, tamaq ónimderinde – 9,1, sýsyndarda – 8,7, hımııa ónerkásibinde – 10,9, munaı óńdeýde – 6,3, metall buıymdarynda – 14,1 paıyz ósimi qamtamasyz etildi.
- Sapaly ekonomıkalyq ósýdi qamtamasyz etý úshin shıkizatqa jatpaıtyn sektorlardy damytýǵa, eńbek ónimdiligin arttyrýǵa, ekonomıkany tehnologııalyq jańartýǵa jáne tsıfrlandyrýǵa basa nazar aýdarylatyn bolady. Jyl saıyn óńdeý ónerkásibi men agroónerkásiptik kesheninde 100-den astam ınvestıtsııalyq jobany iske qosý josparlanýda. Metallýrgııa, mashına jasaý, munaı-gaz hımııasy jáne agroónerkásiptik keshende joǵary deńgeıde óńdeýdiń 17 iri jobasyn iske asyrý jalǵasady. 2029 jylǵa deıingi ulttyq ınfraqurylymdyq jospardy iske asyrý mańyzdy ról atqarady. Energetıkalyq jáne kommýnaldyq sektorlardy jańǵyrtý jónindegi ulttyq jobany iske asyrý belsendi kezeńge enedi. 2026-2028 jyldary ekonomıka jylyna orta eseppen 5 paıyzdan tómen emes deńgeıde ósetin bolady, - dedi Serik Jumanǵarın.
Aıta keteıik, Mınıstrler kabınetiniń músheleri halyqtyń ál-aýqatyn arttyrý jónindegi birlesken is-qımyl baǵdarlamasyn talqyǵa salyp jatyr.