Úkimet: JI engizilgenimen, qyzmetkerlerdi jappaı qysqartý josparlanyp otyrǵan joq
ASTANA. KAZINFORM — JI adamdy almastyrmaıdy, kerisinshe eńbek tıimdiligin arttyrýǵa múmkindik beredi. Úkimet Digital Qazaqstan strategııasynyń júzege asý barysyn tanystyrdy.
JI adamdy almastyrý maqsatynda emes, eńbek tıimdiligin arttyrý úshin engiziledi
Jasandy ıntellekt jáne tsıfrlyq damý vıtse-mınıstri Bahtııar Muhametqalıev jasandy ıntellektiniń maqsaty adamdy almastyrý emes, eńbek tıimdiligin arttyrý ekenin atap ótti. Onyń aıtýynsha, jańa tehnologııalardy belsendi qoldanatyn mamandar eńbek naryǵynda suranysqa ıe bola túsedi.
— Jasandy ıntellektini kásiporyndarǵa tikeleı engizý arqyly elimizdiń ekonomıkasyn damytý mańyzdy. Jasandy ıntellekt adamdy almastyrady dep alańdaýdyń qajeti joq. Zamana kóshinen qalmaı, kerisinshe ozyq júrýge, jańa tehnologııalarǵa beıimdelip qana qoımaı, qajet bolsa olardy ózimiz ázirleı bilýimiz qajet. Aldaǵy ýaqytta qyzmetkerlerdi jappaı almastyrý josparlanyp otyrǵan joq, — dep túsindirdi ol.
Memlekettik qyzmetterdi tsıfrlandyrýǵa qatysty jasandy ıntellekt jáne tsıfrlyq damý birinshi vıtse-mınıstri Rostıslav Konıashkın bul halyqqa qyzmet kórsetý ortalyqtary qyzmetkerlerin jappaı qysqartýdy kózdemeıtinin atap ótti.
— Qazirgi tańda «Azamattarǵa arnalǵan úkimet» memlekettik qyzmet kórsetý salasynda ǵana emes, memleket pen halyq arasyndaǵy kommýnıkatsııalar baǵytyndaǵy da quzyret ortalyǵyna aınalyp keledi. Qyzmetkerlerdiń bir bóligi bıznes-protsesterdi taldaý jáne qaıta jobalaý baǵyttary boıynsha qaıta daıarlanýda. Qyzmetkerlerdi jumystan bosatýdy maqsat etip otyrǵan joqpyz. Sondyqtan bul baǵytta eshqandaı másele týyndamaıdy, — dep túsindirdi ol.
Qazaqstanda azamattardyń derbes derekterin qorǵaý kúsheıtilmek
Jasandy ıntellekt jáne tsıfrlyq damý mınıstrligi derbes derekterdi qorǵaý boıynsha retteýshilik sharalardy qabyldap jatyr. Bul týraly vedomstvonyń Aqparattyq qaýipsizdik komıteti tóraǵasynyń orynbasary Úmitjan Aryqbekova málimdedi.
— Qazirdiń ózinde barlyq memlekettik júıeler qosylǵan derbes derekterge qoljetimdilikti baqylaý servısi jumys isteıdi. Sondaı-aq mıkroqarjy uıymdaryn osy servıske qosý jumystary júrgizilip jatyr. Bul azamattarǵa ózderiniń derbes derekterin qandaı uıymdardyń paıdalanatynyn bilýge múmkindik beredi, — dep atap ótti ol.
Qazaqstan Respýblıkasynyń jańa Konstıtýtsııasynyń 21-babynda azamattardyń derbes derekterin qorǵaý quqyǵy bekitilgen.
Salyqtyq ákimshilendirýdi tsıfrlandyrý
Qarjy vıtse-mınıstri Áset Turysov salyq deklaratsııasy kezinde qosymsha tabys kózderin rastaý tártibin naqtylady. Naqty shyǵystar málimdelgen kiristerden asyp ketken jaǵdaıda, azamattar qarajattyń balama kózderden zańdy túrde túskenin rastaı alady.
— Salyq komıteti aqshalaı qarajat týraly derekterdi salystyrady. Eger sizde basqa kiris kózderi bolsa, salyq eseptiliginiń nysanyn tapsyryp, kiris kózderin kórsetý arqyly aıyrmashylyqty rastaı alasyz. Árıne, eger aıyrmashylyq aıtarlyqtaı bolsa, kiris kózderi kórsetilmese, biraq sonymen qatar jyljymaıtyn múlik, avtokólik jáne basqa da múlik paıda bolsa, suraqtar týyndaıdy,— dep túsindirdi ol.
