Úkimet Jezqazǵanda jańa ınjenerlik jelilerdi salýǵa 4,8 mlrd teńgeden astam qarajat bóledi

ASTANA. KAZINFORM –  Memleket basshysynyń turǵyn úı-kommýnaldyq ınfraqurylymyn jańǵyrtý jónindegi tapsyrmalaryn oryndaý maqsatynda QR Premer-Mınıstri Oljas Bektenov Jezqazǵanda tıisti jumystardy oryndaýǵa qosymsha qarajat bólý týraly qaýlyǵa qol qoıdy. Bul týraly Úkimettiń baspasóz qyzmeti habarlady.

Atap aıtqanda, Ulytaý oblysynyń ákimdigine Jezqazǵan qalasynyń Batys aýdanynyń jańa yqsham aýdanyna káriz jelilerin, magıstraldy sý qubyry men magıstraldy jylý jelisin salý úshin QR Úkimetiniń rezervinen 4,8 mlrd teńgeden astam qarajat aýdarylady. Oblys ortalyǵy mártebesin alǵannan keıin qalada Batys aýdany qarqyndy túrde damı bastady. Onda jańa turǵyn úıler men birqatar áleýmettik nysan, onyń ishinde 1200 orynǵa arnalǵan mektep qurylysy bastaldy (2024 jyldyń sońyna deıin paıdalanýǵa berý josparda bar).

Qajetti ınjenerlik kommýnıkatsııalardy ýaqytyly júrgizý barlyq belgilengen obektilerdiń tolyqqandy iske qosylýyn qamtamasyz etýge múmkindik beredi.

Aıta ketý kerek, jalpy Ulytaý oblysynda kommýnaldyq jelilerdiń tozý deńgeıin azaıtý jáne rekonstrýktsııalaý boıynsha josparly jumystar júrgizilip jatyr. Sońǵy kezde mynadaı nátıjelerge qol jetkizildi: uzyndyǵy 1314 shaqyrymnan asatyn sý qubyry jelileri boıynsha tozý deńgeıi 56,5-ten 51,2%-ǵa, sý burý jelileri boıynsha (539 km) – 74,6-dan 71,2%-ǵa, jylýmen jabdyqtaý jelileri boıynsha (639 km) – 60-tan 58%-ǵa deıin tómendedi.

Turǵyn úı-kommýnaldyq sektordy saýyqtyrý boıynsha keshendi jumys respýblıkanyń barlyq óńirinde júrgiziledi jáne QR Úkimeti basshylyǵynyń tikeleı baqylaýynda.