Úkimet jer qoınaýyn zertteýdiń jańa kezeńine kiristi: 240 mlrd teńge bólinedi

ASTANA. KAZINFORM — Qazaqstan Úkimeti bıyl jer qoınaýyn zertteýdiń jańa kezeńine anaǵurlym aýqymdy dárejede kirisip otyr. Bul týraly Úkimettiń baspasóz qyzmeti málim etti.

Ótken jyly 100 myń sharshy shaqyrym jalpy alańda 1:50.000 masshtabty geologııalyq túsirilim júrgizýge 20 joba ázirlendi, odan keıin jyl saıyn 30 myń sharshy shaqyrym bolatyn eń perspektıvaly ýchaskeler qamtyldy. Salystyrý úshin aıtatyn bolsaq, keńes zamanynda jasalǵan kartanyń burynǵy masshtaby 1:200.000 boldy.

— Taıaýdaǵy úsh jylda joǵaryda atalǵan 20 jobany júzege asyrý úshin, sondaı-aq az zerttelgen shógindi basseınder aýmaǵynda seısmıkalyq barlaý jumystaryn júrgizýge, qazirgi zamanǵy geologııalyq ınfraqurylymdy qurýǵa 240 mlrd teńge nemese shamamen $500 mln baǵyttaý josparlanyp otyr, jalpy sońǵy 15 jylda $469 mln salyndy, — delingen habarlamada.

Jobalarǵa Jerdi qashyqtyqtan zondtaý derekterin taldaý, aerogeofızıkalyq jáne geohımııalyq zertteýler, dalalyq jumystar kesheni kiredi.

— Ýchaskeler tizbesin qalyptastyrý kezinde qorlardyń sarqylý faktorlary, jer qoınaýyn paıdalanýshylardyń bolmaýy ne eń az sany jáne paıdaly qazbalardyń basym túrleri boıynsha perspektıvalylyǵy eskerildi. Nátıjesinde mys, altyn, qorǵasyn, myrysh, sırek jer elementteri, barıt, boksıt ken oryndaryn anyqtaý boıynsha áleýeti joǵary alańdar anyqtaldy, — dep habarlady Úkimetten.

Budan bólek, az zerttelgen munaı-gaz perspektıvaly — Soltústik Torǵaı, Shý-Sarysý jáne Syrdarııa basseınderinde seısmıkalyq barlaý jumystaryn júrgizý josparlanǵan. Sondaı-aq zerthanalyq-taldamalyq bazany jańǵyrtý jáne geologııalyq derekterdi tsıfrlandyrý kózdelip otyr.

Osy masshtabta jer qoınaýyn geologııalyq zertteýge kóshý Eýropalyq Odaq, Kanada, Avstralııa, Qytaı elderiniń halyqaralyq tájirıbesine sáıkes keletin geologııalyq boljamdardyń dáldigin edáýir arttyrýǵa múmkindik beredi. Aımaqtyq kartaǵa egjeı-tegjeıli túsirý perspektıvaly aýmaqtardy anyqtaý, geologııalyq jáne ınvestıtsııalyq táýekelderdi azaıtý jáne keıinnen geologııalyq barlaý men paıdaly qazbalardy óndirýge jeke ınvestıtsııalardy tartý úshin bazalyq negiz bolady.

Eske sala keteıik, buǵan deıin Qazaqstannyń geologııalyq derekteriniń 83%-y tsıfrlandyrylǵanyn jazdyq. 

Qazaqstan geologııasyn jańǵyrtatyn hab iske qosyldy.