Úkimet jeke derekterdi qorǵaý talabyn jańartatyn qujatty bekitti

ASTANA. KAZINFORM – Premer-mınıstrdiń orynbasary – Jasandy ıntellekt jáne tsıfrlyq damý mınıstri jeke derekterdi qorǵaý qaǵıdalaryn ózgertetin buıryqqa qol qoıdy.

Buıryq 2026 jylǵy 6 qańtardan bastap kúshine enedi.

Qujat 2023 jylǵy jeke derekterdiń qaýipsizdigin retteıtin buıryqty túzetýge arnalǵan. Jańa redaktsııada shekteýli derektermen jumys isteýge jeke kóńil bólingen.

Endi menshik ıeleri men operatorlar derbes derekterdi óńdeýdiń maqsattaryn, qol jetkizý tártibin, derekterdi taratý men buǵattaý tártibin naqty aıqyndaýǵa mindetti bolmaq.

Aqparattyq qaýipsizdik sharalarynyń tizbesi de keńeıtilgen.

Atap aıtqanda:

shekteýli qoljetimdi derekterge ruqsaty bar adamdardyń aıasyn aıqyndaý;

aqparattyq qaýipsizdik ıntsıdentteri jáne zańsyz qol jetkizý faktileri týraly ýákiletti organǵa mindetti túrde habarlaý;

aqparatty qorǵaý quraldaryn jáne baǵdarlamalyq qamtamasyz etýdi ornatý, olardy turaqty túrde jańartyp otyrý;

derekter bazasyndaǵy oqıǵalar men paıdalanýshylar áreketteriniń jýrnalyn júrgizý;

jeke derekterdiń tutastyǵyn baqylaý;

derekterdi tek qorǵalǵan baılanys arnalary arqyly nemese shıfrlaý arqyly, sondaı-aq sýbektiniń kelisimi bolǵan jaǵdaıda berý (eger zańda ózgeshe kózdelmese);

derekterdi saqtaý kezinde krıptografııalyq qorǵaý quraldaryn qoldaný;

quramynda 100 myńnan astam jazbasy bar derekter bazasyna paıdalanýshylardy sáıkestendirý jáne aýtentıfıkatsııa quraldaryn qoldaný talap etiledi.

Buǵan deıin derbes derekterdi qorǵaý talabyn buzǵandar 12 mln teńgeden asa aıyppul tóledi.