Úkimet járdemaqylar tóleý sharttaryn bekitti
ASTANA. KAZINFORM – Úkimet qaýlysymen járdemaqylar tizbesin jáne olardy taǵaıyndaý, tóleýdi toqtata turý, qaıta bastaý jáne toqtatý sharttary, sondaı-aq jerleýge arnalǵan birjolǵy tólemdi taǵaıyndaý sharttary bekitildi.
2027 jylǵy 1 qańtardan bastap qoldanysqa engiziletin qujatqa sáıkes mynadaı járdemaqylar bar:
• bala týýyna baılanysty birjolǵy memlekettik járdemaqy;
• bala bir jarym jasqa tolǵanǵa deıin onyń kútimine baılanysty aı saıynǵy memlekettik járdemaqy;
• jalpy orta, tehnıkalyq jáne kásiptik, orta bilimnen keıingi, joǵary jáne (nemese) joǵary oqý ornynan keıingi bilim berý uıymdarynda jalpy bilim beretin nemese kásiptik baǵdarlamalar boıynsha kúndizgi oqý nysanynda oqyp júrgen balalaryn eskergende tórt jáne odan kóp kámeletke tolmaǵan balasy bar ári olarmen birge turatyn kópbalaly otbasylarǵa beriletin, bala on segiz jasqa tolǵannan keıin bilim berý uıymyn bitiretin ýaqytqa deıin (biraq jıyrma úsh jasqa tolǵanǵa deıin ǵana) beriletin aı saıynǵy memlekettik járdemaqy;
• «Altyn alqa», «Kúmis alqa» alqalarymen nagradtalǵan nemese buryn «Batyr ana» ataǵyn alǵan, I jáne II dárejeli «Ana dańqy» ordenderimen nagradtalǵan kópbalaly analarǵa beriletin aı saıynǵy memlekettik járdemaqy;
• múgedektik boıynsha memlekettik áleýmettik járdemaqy;
• ózderi asyraýynda bolǵan asyraýshysy qaıtys bolsa, eńbekke qabiletsiz otbasy múshelerine asyraýshysynan aıyrylý jaǵdaıy boıynsha beriletin memlekettik áleýmettik járdemaqy;
• arnaýly memlekettik járdemaqy;
• birinshi toptaǵy múgedektigi bar adamǵa kútim jasaıtyn adamdarǵa beriletin memlekettik járdemaqy;
• múgedektigi bar bala (múgedektigi bar balalar) tárbıelep otyrǵan anaǵa nemese ákege, bala asyrap alýshyǵa, qorǵanshyǵa (qamqorshyǵa) taǵaıyndalatyn jáne tólenetin memlekettik járdemaqy.
Otbasynyń (adamnyń) áleýmettik ál-aýqatyn aıqyndaý ádistemesine sáıkes joǵary («A» deńgeıi) jáne aýqatty («V» deńgeıi) áleýmettik ál-aýqat deńgeılerine jatqyzylǵan adamdarǵa járdemaqylardy, sondaı-aq jerleýge arnalǵan birjolǵy tólemdi alý quqyǵy berilmeıdi.
Arnaýly memlekettik járdemaqy:
- arnaýly memlekettik járdemaqy alýshynyń bank shoty boıynsha úsh jáne odan kóp aı boıy shyǵys operatsııalary bolmaǵanda;
- habar-osharsyz ketken adamdardyń izdestirýde bolý faktisi anyqtalǵanda;
- ata-ana quqyqtarynan jáne qorǵanshy (qamqorshy) quqyqtarynan aıyrylǵanda, bosatylǵan jáne shettetilgen qorǵanshylar (qamqorshylar) týraly faktiler anyqtalǵanda;
- arnaýly memlekettik járdemaqy alýshynyń Qazaqstan Respýblıkasynan tys jerge turaqty turýǵa ketkeni anyqtalǵanda;
- Qazaqstan Respýblıkasyndaǵy sheteldiktiń turý yqtııarhatynyń, azamattyǵy joq adam kýáliginiń qoldanylý merzimi ótkende;
- arnaýly memlekettik járdemaqy alýshynyń sot taǵaıyndaǵan bas bostandyǵynan aıyrý túrindegi qylmystyq jazany ótegende;
- kepildendirilgen kólemnen tys arnaýly áleýmettik qyzmet kórsetiletin adamdardy qospaǵanda, arnaýly memlekettik járdemaqy alýshylardyń arnaýly áleýmettik qyzmetter kórsetý ortalyqtarynda statsıonar jaǵdaıynda turǵanda jáne tolyq memlekettik qamsyzdandyrýda bolǵanda;
- medıtsınalyq-áleýmettik saraptamaǵa anyq emes qujat tapsyrý jáne (nemese) saraptamalyq qorytyndyny negizsiz shyǵarý faktisiniń anyqtalýy týraly hattama resimdelgende;
- arnaýly memlekettik járdemaqyny taǵaıyndaý úshin usynylǵan qujattar anyq bolmamaǵanda tólenbeıdi.
Buǵan deıin aýylǵa jumys isteýge barǵan ІT-mamanǵa qandaı áleýmettik qoldaý kórsetiletinin jazǵan edik.
