Úkimet jáne ákimder ekonomıkanyń qurylymyn ózgertýge basa nazar aýdarýǵa tıis
ASTANA. KAZINFORM — Úkimet jáne ákimder ekonomıkanyń qurylymyn ózgertýge basa nazar aýdarýǵa tıis. Bul týraly Parlament palatalarynyń birlesken otyrysynda Qazaqstan halqyna Joldaýyn jarııalap jatqan Memleket basshysy Qasym-Jomart Toqaev aıtty.
«Qazaqstan halqy qazir múlde jańa saıası jaǵdaıda ómir súrýde. Sońǵy 5 jylda aýqymdy reformalar jasaldy. Elimizdiń saıası júıesi túbegeıli ózgerdi. Jurttyń sana-seziminde betburys bolyp jatyr. Halyqtyń quqyqtyq mádenıeti artyp keledi. Azamattardyń boıynda jańa ádetter, daǵdylar qalyptasyp, jańa qundylyqtar ornyǵýda. Saıası jáne qoǵamdyq bolmysymyz, mentalıtetimiz jáne mádenı kodymyz ózgere bastady. Bir sózben aıtsaq, Ádiletti Qazaqstan qurylyp jatyr. Munyń bári, eń aldymen, halyqtyń qalaýymen jasalýda. Sondyqtan biz alǵan betimizden qaıtpaımyz, baǵytymyzdan taımaımyz. Búgin biz alǵa qoıǵan josparymyzdy pysyqtap, maqsattarymyzdy aıqyndaımyz», - dedi Memleket basshysy.
Prezıdenttiń paıymynsha, qazir jer júzinde geosaıası teketirester beleń alyp tur. Soǵan qaramastan, Qazaqstan beıbit ári evolıýtsııalyq jolmen damyp kele jatyr.
«Biz damýdyń jańa baǵdaryn belgiledik. Ekonomıkany ártaraptandyrý isine tyń serpin berdik. Inflıatsııa baıaýlady, ıaǵnı byltyrǵy eń joǵarǵy deńgeıden 2,5 ese tómendedi. Elimizdiń halyqaralyq rezervi 100 mıllıard dollardan asty. Óńdeý ónerkásibi taý-ken salasymen salystyrǵanda jyldam ósip jatyr. Biz osy qarqyndy joǵaltpaýymyz kerek. Buǵan deıin jasalǵan qolaıly jaǵdaıdy tıimdi paıdalanyp, jańa ınvestıtsııalyq kezeńdi bastaýymyz qajet. Úkimet jáne ákimder ekonomıkanyń qurylymyn ózgertýge basa nazar aýdarýǵa tıis. Elimizdiń turaqty damýyna múmkindik beretin jańa tetikterdi qarastyrǵan jón. Basty maqsat – azamattardyń tabysyn arttyrý. Jumysty durys úılestire bilsek, bul – qoldan keletin sharýa. Ekonomıka ósken saıyn áleýmettik teńsizdik azaıyp, orta tap (ıaǵnı orta klass) kúsheıe túsýi kerek. Sonda ǵana biz elimizdiń áleýetin kúsheıte alamyz. Ol úshin kez kelgen istiń basty ólshemi tıimdilik bolýǵa tıis. ıAǵnı, árbir sheshim, árbir joba eń aldymen elge paıdaly bolýy qajet», - dedi Qasym-Jomart Toqaev.
