Úkimet jańa memlekettik josparlaý júıesin ázirlep jatyr
Úkimet neǵurlym yqsham ári ıkemdi bolatyn jańa memlekettik josparlaý júıesin ázirlep jatyr. Bul týraly Premer-Mınıstr Álıhan Smaıylovtyń Májilis depýtattarynyń saýalyna bergen jaýabynda aıtylǵan, dep habarlaıdy QazAqparat tilshisi.
«Memleket basshysynyń tapsyrmasy boıynsha Úkimet neǵurlym yqsham ári ıkemdi bolatyn jańa memlekettik josparlaý júıesin ázirlep jatyr. Jańa júıe aıasynda baǵdarlamalyq qujattardy kóptep bekitý, artyq nysanaly ındıkatorlardy belgileý praktıkasynan bas tartý usynylady. Bul qadam memlekettik apparat qyzmetindegi jedeldikti arttyrýǵa, josparly kórsetkishterge qol jetkizýge qaraılamaı, jumysyn naqty nátıjege qol jetkizýge baǵyttaı otyryp, memorgandardyń birinshi basshylarynyń jaýapkershiligi men derbestigin kúsheıtýge múmkindik beredi. Óz kezeginde Úkimet Memleket basshysynyń Qazaqstan halqyna Joldaýyn iske asyrý maqsatynda jyl saıyn jalpyulttyq is-sharalar josparyn ázirleıdi. Ol Prezıdent Jarlyǵymen bekitiledi. Jalpyulttyq josparda naqty is-sharalar, aıaqtalý nysany, oryndaý merzimi men jaýapty oryndaýshylar qamtylǵan», - dedi Úkimet basshysy jaýabynda.
Onyń atap ótýinshe, Úkimettiń Іs-qımyl baǵdarlamasyn ázirleý týraly normalar 2007 jylǵy konstıtýtsııalyq reforma aıasynda Qazaqstan Respýblıkasynyń Konstıtýtsııasynan alynyp tastalǵan.
«Osyǵan baılanysty jalpyulttyq jospar Memleket basshysynyń Joldaý aıasynda aıtqan, sondaı-aq bıýrokratııadan aryltý maqsatyndaǵy tapsyrmalardy qamtıtynyn eskere otyryp, Úkimettiń jekelegen baǵdarlamasyn ázirleý orynsyz dep paıymdaımyz»,- dedi Álıhan Smaıylov.
