Úkimet jańa KazSat-3R qurýǵa 10 mlrd teńgeden astam qarajat bóldi
ASTANA. KAZINFORM — Úkimet rezervinen KazSat-3R ǵaryshtyq baılanys júıesin qurý jobasyn júzege asyrýǵa 10,4 mlrd teńgeden astam qarjy bólindi. Joba ulttyq spýtnıktik baılanys júıesi men telekommýnıkatsııa salasyn damytýǵa baǵyttalǵan.
QR Premer-mınıstri Oljas Bektenov tıisti qaýlyǵa qol qoıdy.
Úkimettiń baspasóz qyzmetiniń habarlaýynsha, bólingen qarajat qoldanystaǵy KazSat-3 apparatyn almastyratyn jańa KazSat-3R spýtnıktik baılanys júıesin jasaýǵa jumsalady. KazSat-3-tiń josparlanǵan paıdalaný merzimi 2029 jyly aıaqtalady. Jańa apparat ulttyq spýtnıktik baılanys júıesiniń úzdiksiz jumysyn qamtamasyz etedi.
— Jobany júzege asyrý spýtnıktik baılanys jelileri men teleradıo habar taratý júıesiniń turaqty jumysyn qamtamasyz etip, halyq az qonystanǵan jáne shalǵaı eldi mekenderde ınternetke qoljetimdilikti keńeıtýge múmkindik beredi. Sonymen qatar aqparattyq qaýipsizdik deńgeıi artyp, Qazaqstannyń tehnologııalyq egemendigi nyǵaıady, — delingen habarlamada.
Qazirgi tańda KazSat ǵaryshtyq baılanys júıesiniń múmkindikterin elimizdiń iri baılanys operatorlary men memlekettik qurylymdar paıdalanady. Júıe arqyly teleradıo habarlaryn taratý, derekterdi jetkizý, mobıldi baılanys jáne ınternet qyzmetteri kórsetiledi. Júıege 19 baılanys operatory qosylǵan jáne telehabar taratý qyzmetin 2 mln-nan astam abonent paıdalanady.
Sondaı-aq Úkimet Qazaqstanda telekommýnıkatsııa qyzmetteriniń sapasyn arttyrý boıynsha júıeli jumystar júrgizilip jatqanyn málimdedi. Keıingi eki jyldaǵy negizgi nátıjelerdiń biri — joǵary jyldamdyqty ınternetke qoljetimdi halyq úlesi 99%-ǵa jetti. Búginde 4,5 myńnan astam aýyldyq eldi meken joǵary jyldamdyqty ınternetpen qamtamasyz etilgen. Shalǵaı jáne qatynaýy qıyn aýmaqtardy baılanyspen qamtý úshin spýtnıktik tehnologııalar qoldanylady. Sonyń arqasynda jerústi ınfraqurylymyn salý qıyn eldi mekender de ınternetke qol jetkizip jatyr.
— Aýyldyq jerlerde talshyqty-optıkalyq baılanys jelilerin keńeıtý, «Sońǵy mıl» jobasyn iske asyrý, 5G jelisin damytý, avtojoldardy mobıldi baılanyspen qamtý jáne zamanaýı spýtnıktik sheshimderdi engizý sııaqty negizgi jobalardy júzege asyrý arqyly ınfraqurylymdy damytý qamtamasyz etilip jatyr. Sonymen qatar zamanaýı tsıfrlyq qyzmetterge qoljetimdilik te keńeıip keledi: búginde memlekettik qyzmetterdiń 90%-dan astamy onlaın formatta kórsetiledi, Qazaqstanda óz sýperkompıýterlik qýattar men QazTech biryńǵaı tsıfrlyq platformasy iske qosyldy. Bul jasandy ıntellekt pen tsıfrlyq ekonomıkany odan ári damytýǵa negiz qalaıdy, — dep habarlady Úkimettiń baspasóz qyzmeti.
Eske salaıyq, buǵan deıin Qazaqstan 2029 jyly «KazSat-3» spýtnıgin almastyratyn jerserikti ǵaryshqa ushyratynyn habarlaǵanbyz.
