Úkimet Parlamentke hat jazý arqyly máseleni sheshýdi ádetke aınaldyra bastady – Erlan Qoshanov

ASTANA. KAZINFORM – Úkimet zańǵa bastamashylyq etýdiń ornyna Parlamentke hat jazý arqyly máseleni sheshýdi ádetke aınaldyra bastady. Bul týraly Parlament palatalarynyń birlesken otyrysynda Májilis tóraǵasy Erlan Qoshanov  aıtty.

- Konstıtýtsııa boıynsha, depýtattarmen qatar Úkimettiń de zańǵa bastamashylyq etýge quqy bar. Alaıda zań jobasyn ózderi ázirleý ornyna, mınıstrlikter máseleni depýtattardyń túzetýleri arqyly nemese Parlamentke hat jazý arqyly sheshýdi ádetke aınaldyra bastady. Úkimet reglamenti boıynsha, túzetýlerdi zań jobasyn Májiliste talqylaý kezeńinde engizý týraly norma bar. Biraq mınıstrlikter tarapynan ol normaǵa tym jıi júginý oryn alyp otyr. Keıde ondaı túzetýler tipti jalpy otyrys ótetin kúni kelip túsip jatady, - dedi Májilis spıkeri.

Onyń atap ótýinshe, osy sessııada atalǵan tarmaq boıynsha Úkimetten kelip túsken hattar sany eki ese artty.

- Al bul tarmaq erekshe jaǵdaılarda, Memleket basshysynyń shuǵyl tapsyrmalaryna nemese dereý sheshýdi qajet etetin mańyzdy máselelerge ǵana qoldanylýy kerek. Negizinde mundaı mańyzdy máseleler Úkimet qabyrǵasynda jan-jaqty pysyqtalyp, tereń zerttelip, hat túrinde emes, zań jobasy retinde rásimdelip baryp Parlamentke túsýge tıis. Munyń bári zań jobalarynyń Parlamentten ótýin qıyndatady jáne sapasyn tómendetedi, - dedi Erlan Qoshanov.

Aıta keteıik, búgin Parlament palatalarynyń birlesken otyrysy ótip, onda segizinshi saılanǵan Parlamenttiń úshinshi sessııasy resmı túrde jabyldy.