Úkimet ıadrolyq synaqtan zardap shekkenderdi áleýmettik qorǵaýdyń jańa tásilderin zerdeleýi tıis — KS
ASTANA. KAZINFORM — Úkimet ıadrolyq synaqtardan zardap shekken azamattardy áleýmettik qorǵaý máseleleri boıynsha jańa qaǵıdattar men tásilderdi zerdeleýi qajet. Bul týraly Parlament palatalarynyń birlesken otyrysynda Konstıtýtsııalyq sot tóraǵasy Elvıra Ázimova aıtty.
«Qoldanystaǵy zańdardyń Konstıtýtsııalyq sot túsindirme bergen normalaryna zań shyǵarýshy barynsha tıimdi normatıvtik quqyqtyq retteýdi ázirleý bóliginde nazar aýdarýy qajet. Máselen, Semeı ıadrolyq synaq polıgonyndaǵy ıadrolyq synaqtardan zardap shekken azamattardy áleýmettik qorǵaý máseleleri boıynsha Úkimetke zaqymdalǵan aýmaqtardaǵy qazirgi radıoekologııalyq ahýaldy, sondaı-aq áleýmettik, ekologııalyq, demografııalyq, medıtsınalyq jáne ózge de faktorlardy eskere otyryp, jańa qaǵıdattar men tásilderdi zerdeleý qajet», — dedi Konstıtýtsııalyq sot tóraǵasy.
Onyń atap ótýinshe, saralanýy ártúrli is-áreketter úshin biryńǵaı qylmystyq sanktsııalardy kózdeıtin Qylmystyq kodekstiń normalary zań shyǵarýshynyń nazaryn talap etedi.
«Qylmystyq jáne ákimshilik jaýapkershilik týraly normalarda aktsızdeletin taýarlar aınalymy kezinde azamatqa keltirilgen iri zalal men eleýli mólsherdiń anyqtamalaryn ózara úılestirý qajet», — dedi Elvıra Ázimova.
