Úkimet Veterınarııany damytýdyń keshendi josparyn bekitti

Tıisti qaýlyǵa Premer-mınıstr Oljas Bektenov qol qoıdy, dep habarlaıdy QR Úkimetiniń baspasóz qyzmeti.

Keshendi jospar halyq densaýlyǵyn janýarlar men adamǵa ortaq aýrýlardan qorǵaýǵa, sondaı-aq janýarlardy aýrýlardan saqtaý men veterınarııalyq-sanıtarııalyq qaýipsizdikti nyǵaıtýǵa baǵyttalǵan.

-Júıeli sharalardyń nátıjesinde Qazaqstan janýarlardyń asa qaýipti aýrýlarynyń birqatary, sonyń ishinde aýsyl, afrıkalyq jylqy obasy, afrıkalyq jáne klassıkalyq shoshqa obasy boıynsha halyqaralyq mártebege ıe boldy. Bul óz kezeginde otandyq mal sharýashylyǵy ónimderiniń eksporttyq áleýetin keńeıtýge múmkindik berdi, — dep atap ótti aýyl sharýashylyǵy vıtse-mınıstri Amanǵalı Berdalın.

Jospardyń negizgi basymdyqtary retinde janýarlardyń asa qaýipti aýrýlaryna qarsy kúres, veterınarııa mamandarynyń jalaqysyn kóterý, veterınarııalyq uıymdardyń materıaldyq-tehnıkalyq bazasyn jaqsartý, eksporttyq jetkizilimderdi keńeıtý jáne ishki naryqty qorǵaý, zerthanalyq baqylaýdy kúsheıtý, ónimniń ómirlik tsıkiniń barlyq kezeńinde (týǵan sátinen bastap ónimdi ótkizýge deıin) qadaǵalaý, veterınarııa salasyn tsıfrlandyrýdy keńeıtý jáne veterınarııalyq farmatsevtıka tehnologııalaryn damytý máseleleri aıqyndaldy. Qazirgi tańda elimizde veterınarııalyq preparattar óndiretin 21 zaýyt jumys isteıdi.

Qazaqstan aýmaǵyn janýarlardyń asa qaýipti aýrýlarynan qorǵaý, elimizdiń epızootııalyq turaqtylyǵyn saqtaý jáne tehnıkalyq reglamentterine sáıkes kelmeıtin ónimderdiń ishki naryqqa enýine jol bermeý úshin shekara mańyndaǵy aýmaqtarda veterınarııalyq 67 baqylaý beketi jumys isteıdi.

2025 jyly Qazaqstan shekarasy arqyly ımporttyq, eksporttyq jáne tranzıttik operatsııalar barysynda memlekettik veterınarııalyq-sanıtarııalyq ınspektorlar 700 myń tonnadan astam mal sharýashylyǵy ónimin tasymaldaǵan 60 myńǵa jýyq avtokólikti tekserýden ótkizdi.

Protsesterdi tsıfrlandyrý, sondaı-aq derekterdi jınaý men berýdi avtomattandyrý aıasynda «Aýyl sharýashylyǵy janýarlaryn sáıkestendirý» aqparattyq júıesine bastapqy jáne naqty derekterdi aqparattyq júıelerge avtomatty túrde tikeleı joldaýǵa múmkindik beretin jańa fýnktsıonaldar ázirlenip, qoldanysqa engizildi. Olardyń qatarynda ISZH-MOBILE, TortTulik júıeleri bar. Mal sharýashylyǵy ónimderin qadaǵalaýdy «fermadan ústelge deıin» qaǵıdaty boıynsha qamtamasyz etý sheńberinde «Veterınarııalyq-sanıtarııalyq saraptama» modýli júzege asyrylýda. Atalǵan júıege ishki saýda, zerthana, soıý nysandary qosylǵan. Sonymen qatar qoǵamdyq tamaqtaný obektilerin modýlge kezeń-kezeńimen qosý boıynsha jumystar júrgizilip jatyr.

Protsesterdi tsıfrlandyrý jáne avtomattandyrý baǵytyndaǵy barlyq jumys Keshendi jospar sheńberinde aldaǵy ýaqytta da jalǵasady.

Budan bólek, 2030 jylǵa qaraı Aýyl sharýashylyǵy mınıstrliginiń aýmaqtyq bólimsheleri men vedomstvolyq uıymdarynyń materıaldyq-tehnıkalyq jaraqtandyrylýyn 80%-ǵa deıin jańartý jáne tolyqtyrý josparlanyp otyr. Sondaı-aq jergilikti atqarýshy organdarǵa qatysty veterınarııalyq uıymdar qyzmetkerleriniń eńbekaqy tóleý qory 1,5-2,5 esege deıin artady.

Keshendi jospardy júzege asyrý veterınarııalyq-sanıtarııalyq qaýipsizdik deńgeıin arttyrýǵa, turaqty epızootııalyq jaǵdaıdy qamtamasyz etýge, akkredıtteý salasyn keńeıte otyryp, zerthanalyq bazany kúsheıtýge, el aýmaǵyna ákelinetin jáne ishki naryqta ótkiziletin baqylaýdaǵy júkterge memlekettik baqylaýdy kúsheıtýge, sondaı-aq otandyq aýyl sharýashylyǵy taýaryn óndirýshilerdiń eksporttyq múmkindigin keńeıtýge múmkindik beredi.

Budan buryn habarlaǵanymyzdaı, Qazaqstannyń veterınarııa salasyndaǵy tájirıbesi Dúnıejúzilik assambleıada tanystyrylady.