Úkimet uzaq merzimdi óndiristik qabilettilikti joǵarylatýǵa basymdyq bermek
ASTANA. KAZINFORM — Bul óz kezeginde jalpy ishki ónim ósýi men jalaqynyń artýy arasyndaǵy alshaqtyqty birtindep joıýǵa alyp keledi.
Bul týraly Úkimet otyrysynda makroekonomıkalyq turaqtandyrý jáne halyqtyń ál-aýqatyn arttyrý jónindegi birlesken is-qımyl baǵdarlamasyn tanystyrǵan Premer-mınıstrdiń orynbasary — Ulttyq ekonomıka mınıstri Serik Jumanǵarın aıtty.
— Ekonomıkalyq ósýdiń sapasy týraly aıtatyn bolsaq, Úkimet tek jalpy ishki ónim qurylymy salalaryndaǵy ósýdi ǵana maqsat etpeıdi. Ósýdi qamtamasyz etýde adamı kapıtal, negizgi kapıtal, tabıǵı resýrstar, eńbek ónimdiligi jáne tehnologııalar sııaqty mańyzdy faktorlardyń úlesi eskeriletin bolady. Osyǵan baılanysty áleýetti jalpy ishki ónim boıynsha ekonomıkalyq ósýdiń dekompozıtsııalanýy ózekti bolyp otyr. «Jıyntyq ónimdilik» ósýdiń eń mańyzdy faktory sanalady. Ol ekonomıkalyq ónimdi qurý protsesinde eńbek pen kapıtal sııaqty barlyq óndiris faktorlaryn paıdalaný tıimdiligin ólsheıdi, — dedi vıtse-premer.
Onyń aıtýynsha, jıyntyq ónimdiliktiń ósýi tıimdiliktiń jaqsarǵany men tehnologııalyq progresti kórsetedi. 2001-2024 jyldar kezeńinde osy faktordyń ekonomıka ósýine qosqan úlesi orta eseppen 2,4 paıyzdyq tarmaqty qurady. Kapıtal salymy orta eseppen — 1,8 paıyzdyq tarmaq, al eńbek salymy — 1,3 paıyzdyq tarmaq.
— Eńbek ónimdiligin, tıimdi jumyspen qamtýdy jáne kapıtaldyń tehnologııalyq deńgeıin arttyrý arqyly uzaq merzimdi óndiristik qabilettilikti joǵarylatýǵa basymdyq beriledi. Bul óz kezeginde jalpy ishki ónim ósýi men jalaqynyń artýy arasyndaǵy alshaqtyqty birtindep joıýǵa alyp keledi. Ulttyq ekonomıka mınıstrligi Halyqaralyq valıýta qorymen birlesip, qazirgi zamanǵy ádisterdi paıdalana otyryp, osy faktorlardyń jalpy ishki ónim ósýine qosqan úlesin turaqty baǵalaýdy júrgizetin bolady, — dedi Serik Jumanǵarın.
Aıta keteıik, Mınıstrler kabınetiniń músheleri halyqtyń ál-aýqatyn arttyrý jónindegi birlesken is-qımyl baǵdarlamasyn talqyǵa salyp jatyr.