Úkimet úıindegi qarbalas: Keńeıtilgen otyrystyń obektıvke ilikken sátteri
ASTANA. KAZINFORM – Úkimettiń búgingi keńeıtilgen otyrysynda ne aıtylǵanyn búkil BAQ jarysa jazyp, talqylap ta tastady. Kazinform osy mańyzdy jıynǵa fotograf obektıviniń áıneginen qaraǵanda qalaı ótkenin oqyrmanǵa sezindirý úshin shaǵyn reportaj usynýdy jón kórdi.
Ótken jyldyń kórsetkishterin baǵamdap, aldaǵy jospardy pysyqtaıtyn Úkimettiń keńeıtilgen otyrysyna mınıstrler kabıneti men aımaq basshylary túgel jınaldy.
Jıyn bastalar sátti kútken sheneýnikterdiń júzinde alańdaý men ýaıymnan góri kóterińki kóńil kúı basym tárizdi kórindi.
Astana men Almaty qalasynyń, Almaty, Jetisý oblystarynyń ákimderi búkil mınıstrdiń basyn qosqan jıyndy tıimdi paıdalanýǵa tyrysty.
Joǵary aýdıtorlyq palata tóraǵasy Álıhan Smaıylov pen Qaýipsizdik keńesiniń hatshysy Ǵızat Nurdáýletovtiń túrine qarap asa mańyzdy taqyrypta sóılesip tur-aý dep boljaýǵa bolar edi.
Al Kólik mınıstri Nurlan Saýranbaev ózi buryn basshylyq etken «Qazaqstan Temir joly» ulttyq kompanııasynyń basshysy Talǵat Aldybergenovpen jyly shyraıda pikir almasyp úlgerdi.
Jetisý oblysynyń ákimi Beıbit Isabaevtyń «Atameken» ulttyq kásipkerler palatasynyń jýyqta ǵana saılanǵan tóraǵasy Qanat Sharlapaevtyń qolyn yqylaspen qysqan sáti qyraǵy kameradan tys qalmapty. Soǵan qaraǵanda ol Qanat Bısembaıulyn buǵan deıin jańa laýazymymen quttyqtap úlgermegen syńaıly.
Prezıdent Ákimshiligi Basshysynyń orynbasary Erbolat Dosaev Astana ákimi Jeńis Qasymbektiń aıtqanyn bir qulaǵyn tosa tyńdap tur.
Densaýlyq saqtaý mınıstri Aqmaral Álnazarova men «Qazposhta» basshysy Baǵdat Súleımenovtiń áńgimesi jumys tóńireginde bolǵan sııaqty.
Tótenshe jaǵdaılar mınıstri Shyńǵys Árinov pen Prezıdenttiń halyqaralyq ınvestıtsııa jáne saýda yntymaqtastyǵy jónindegi kómekshisi Murat Nurtileý erekshe kóńildi.
Bas prokýror Berik Asylov qaı kezdegideı búkil emotsııasyn ishine saqtap qana salqynqandy júrdi.
Prezıdenttiń shtattan tys keńesshisi Raıymbek Batalov Sý resýrstary jáne ırrıgatsııa mınıstri Nurjan Nurjigitovke áldebir máseleni ynty-shyntysymen túsindirip jatyr.
Jeńis Qasymbek Qarjy mınıstri Mádı Takıevpen de tildesip úlgerdi.
Atom energııasy jónindegi agenttiktiń tóraǵasy Almasadam Sátqalıev Qarjylyq monıtorıng agenttiginiń basshysy Janat Elımanovpen kóńildi ráýishte sóılesip tursa da, qolyn baýyryna qýsyryp, jabyq mımıkadan shyǵa almady.
Al Oqý-aǵartý mınıstri Juldyz Súleımenova sabaq bastalar sátti kútken muǵalimdeı saǵatyna qaraı berdi.
Prezıdent otyrysty bastaǵan sátten bastap ákimderdiń bári qoldaryna qalam alyp, aıtylǵan ár máseleni úlgili oqýshydaı qoıyn dápterlerine túrtip alyp otyrdy. Aralaryndaǵy Astana men Almaty ákimderiniń jumysy jaqsy úlgi retinde de ataldy.
Sońǵy kezde sarapshylar densaýlyq saqtaý salasyn tsıfrlandyrý jumystary «Myń bir tún» ertegisine uqsap ketkenin kóp synap júr. Sol syn Aqordaǵa da jetse kerek, Memleket basshysy osy iske jaýapty vedomstvo basshylaryn ornynan turǵyzyp, qadaý-qadaý tapsyrma berdi.
Buǵan deıingi keńeıtilgen otyrystarda Premer-mınıstr men Ulttyq bank basshysynan keıin ekonomıkaǵa jaýapty vıtse-premer sóıleıtin. Bul joly Úkimet basshysynyń orynbasary – Jasandy ıntellekt jáne tsıfrlyq damý mınıstri Jasulan Mádıev sóz aldy. Osydan-aq el saıasatynda tsıfrlandyrýǵa qanshalyqty kóńil bólinip otyrǵanyn ańǵarýǵa bolady. Prezıdent bul saladaǵy problemalarǵa kóbirek toqtalyp, berilgen ádemi ýaǵdalar men tanystyrylǵan órshil bastamalardyń aıaǵy sıyrquımyshaqtanyp bara jatqanyn synady.
Agrarlyq saıasatqa jaýapty Aýyl sharýashylyǵy mınıstri Aıdarbek Saparov ta bul otyrystan syn estip shyqty.
Premer-mınıstr Oljas Bektenov Úkimet tarapyna aıtylǵan synnyń bárin tunjyrap tyńdaǵandaı áser qaldyrdy.
Aıta keteıik, búgin Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip, eldiń 2025 jylǵy áleýmettik-ekonomıkalyq damýy qorytyndylandy, Úkimettiń aldaǵy kezeńge arnalǵan negizgi mindetteri aıqyndaldy.
