Úkimet úsh aı ishinde arnaıy ekonomıkalyq aımaqtardy damytýdyń jańa úlgisin bekitýi kerek — Prezıdent
ASTANA. KAZINFORM — Eldegi arnaıy ekonomıkalyq aımaqtardyń tıimdiligi áli kúnge deıin tómen. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.
— Men Joldaýda arnaıy ekonomıkalyq aımaqtardyń áleýetin tolyq paıdalaný qajettigi týraly aıttym. Qytaıda jáne Vetnamda mundaı aımaqtar ekonomıkanyń qozǵaýshy kúshi sanalady. Al bizdiń eldegi arnaıy ekonomıkalyq aımaqtardyń tıimdiligi áli kúnge deıin tómen. Bul mekemeler ekonomıkanyń qurylymyn ózgertýge qaýqarsyz. Shırek ǵasyrǵa jýyq ýaqyttan beri arnaıy ekonomıkalyq aımaqtardyń ishki jalpy ónimge qosqan úlesi 1 paıyzdan sál ǵana asady. Onyń 0,3 paıyzy — eksportqa, 0,9 paıyzy — shetel ınvestıtsııasyna tıesili, — dedi Memleket basshysy.
Prezıdenttiń aıtýynsha, arnaıy ekonomıkalyq aımaqtardyń qazirgi jumys tásili múlde jaramsyz deýge bolady. Olar ınvestıtsııa tartatyn alań bolýy tıis. Jańa normalar, quraldar, servıstik sheshimder sol jerde synaqtan ótip, odan ári keń taralýy qajet.
— Arnaıy ekonomıkalyq aımaqtardyń qazirgi ınfraqurylymyn damytýǵa úsh jyl ishinde bir trıllıon teńge zaım qarajatyn jumsaý usynylyp otyr. Aldymen olardyń damý modelin qaıta qurý kerek dep sanaımyn. Onsyz mundaı aýqymdy ınvestıtsııa júıedegi qordalanǵan máselelerdi sheshe almaıdy. Túptep kelgende, eger naqty nátıjege jetemin degen nıet bolsa, bul máseleni Túrkistan oblysynyń burynǵy ákimi Darhan Satybaldy sııaqty qolda bar qarjymen de sheshýge bolady. Astanada da jaqsy tájirıbe bar. Úkimet úsh aıdyń ishinde arnaıy ekonomıkalyq aımaqtardy damytýdyń jańa úlgisin bekitýi kerek, — dedi Qasym-Jomart Toqaev.
Buǵan deıin Prezıdent memleket jeke kapıtal rólin ózine alýdan bas tartýy qajettigin aıtqan edi.
