Úkimet ulttyq múddelerdi qorǵaýda belsendi áreket etýi kerek – Prezıdent EAEO qysymy týraly
QYZYLORDA. KAZINFORM – Eýrazııalyq ekonomıkalyq odaq aıasynda Qazaqstandaǵy aýyl sharýashylyǵy taýarlary negizsiz qysymǵa ushyrap otyr. Memleket basshysy Qasym-Jomart Toqaev ulttyq múddelerdi qorǵaý úshin belsendi áreket etýge keńes berdi.
– Taǵy bir ózekti másele — halyqaralyq shıelenister jaǵdaıynda Qazaqstannyń strategııalyq ekonomıkalyq seriktesterimen tıimdi ózara árekettestigi bolyp otyr. Bizdiń ustanymymyz aıdan anyq: Qazaqstan ekonomıkalyq ıntegratsııany qoldaıdy, bul protseske belsendi qatysady, biraq ol bizdiń múddelerimizge ádil sıpatta bolýy kerek. Qazaqstan bıyl Eýrazııalyq ekonomıkalyq odaqtyń tóraǵasy bolady. Bizdiń basymdyqtarymyzdyń biri — eýrazııalyq ıntegratsııanyń tıimdiligin arttyrý úshin jasandy ıntellektini keńinen engizý, – dedi Qasym-Jomart Toqaev Ulttyq quryltaıdyń V otyrysynda.
Prezıdenttiń aıtýynsha, saýdadaǵy kedergilerdi joıý men negizsiz protektsıonızmge qarsy jumys jalǵasady.
– Mysaly, Qazaqstandaǵy aýyl sharýashylyǵy ónimderin óńdeý salasynyń negizsiz qysymǵa ushyraýy qalypty jaǵdaı dep aıtýǵa bolmaıdy. Otandyq tamaq ónerkásibiniń ókilderi EAEO qatysýshy memleketterden sýbsıdııalanǵan taýarlar saldarynan óndiristi azaıtýǵa májbúr bolyp otyr. Al bul biz úshin azyq-túlik qaýipsizdigine qatysty másele, – dep atap ótti Q.Toqaev.
Memleket basshysy Úkimetke ulttyq múddelerdi qorǵaý úshin belsendi áreket etýge keńes berdi.
– Ózara múddelerdiń ádil teńgerimin taýyp, Qazaqstannyń ustanymyn sheber jáne dáleldi túrde qorǵaý kerek. Osylaı ǵana elimizdiń ekonomıkasyn halyqaralyq naryqta básekege qabiletti ete alamyz, – dedi Qasym-Jomart Toqaev.
Aıta keteıik, Ulttyq quryltaıdyń V otyrysynyń mátin translıatsııasyn Kazinform saıtynan oqýǵa bolady.