Úkimet úlesker aqshasyna salynǵan páterlerdi satatyn kompanııalardyń jaýapkershiligin arttyrmaqshy

ASTANA. KAZINFORM – Qurylys kompanııalary «Turǵyn úı qurylysyna úlestik qatysý týraly» zańnyń normalaryn aınalyp ótetin jol taýyp alǵan. Premer-mınıstrdiń orynbasary – Ulttyq ekonomıka mınıstri Serik Jumanǵarın osy olqylyqty joıý úshin zańnamaǵa taǵy túzetý engiziletinin málim etti.

— Zań jobasynyń jetinshi baǵyty turǵyn úı qurylysyna úlestik qatysý máselelerin retteýdi kózdeıdi. Qazirgi tańda «Turǵyn úı qurylysyna úlestik qatysý týraly» zańy aıasynda bir tarap kóppáterli turǵyn úıdiń qurylysyn qamtamasyz etýge jáne qurylys aıaqtalǵannan keıin osy páterdi ekinshi tarapqa berýge mindetti, ıaǵnı eki ǵana tarap bar, — dedi ol.

Bul qurylys kompanııalaryna zańdy aınalyp ótý múmkindigin qaldyryp otyrǵan kórinedi.

— Alaıda is júzinde turǵyn úıge aqsha tartqan kompanııa qurylysty bir úlestes kompanııa arqyly salady da, azamattarǵa basqa bir úlestes kompanııanyń kómegimen satady. Osylaısha, úshinshi tarapty qosý arqyly «Turǵyn úı qurylysyna úlestik qatysý týraly» zańmen retteletin talaptardy jaltarý yqtımaldyǵy týyndaıdy. Sondyqtan, zań jobasynda osy olqylyqty boldyrmaıtyn norma kózdelgen. Endi úleskerlerdiń aqshasyn tartyp, satýmen aınalysatyn kompanııalarǵa da zań talaptary qoldanylatyn bolady, — dedi Serik Jumanǵarın.

Jyl basynda Almatydaǵy qurylys kompanııalary úleskerlerdiń 2,5 mlrd teńgesin aldap alyp ketkeni málim bolǵan edi.