Úkimet turǵyn úı qurylysyn damytý máselesin qaraıdy
ASTANA. KAZINFORM — Búgin Úkimet otyrysy ótedi. Onda Mınıstrler kabınetiniń músheleri turǵyn úı qurylysyn damytý men tsıfrlandyrý máselesin pysyqtaıdy.
Úkimet otyrysynyń qorytyndysy boıynsha baspasóz konferentsııasy uıymdastyrylady. Onda Ónerkásip jáne qurylys mınıstri Ersaıyn Naǵaspaev, «Otbasy bank» AQ basqarma tóraǵasy Lázzat Ibragımova, «Qazaqstandyq turǵyn úı kompanııasy» AQ basqarma tóraǵasy Altaı Kúzdibaev otyrystyń kún tártibine shyǵarylǵan máselege qatysty BAQ ókilderi tarapynan týyndaıtyn saýaldarǵa jaýap beredi.
Ulttyq statıstıka bıýrosynyń deregine sáıkes, 2025 jyldyń qańtar–jeltoqsan aılarynyń qorytyndysynda paıdalanýǵa berilgen turǵyn úılerdiń jalpy aýdany 2024 jylmen salystyrǵanda 5,1 paıyzǵa artyp, 20 099,1 myń sharşy metrdi qurady.
Onyń ishinde:
— 13 523,7 myń sharshy metr — kóppáterli turǵyn úıler;
— 6 416,2 myń sharshy metr — jeke turǵyn úıler.
Paıdalanýǵa berilgen turǵyn úı kólemi boıynsha kóshbasshy óńirler:
— Astana — 4 812,5 myń sharshy metr.
— Almaty — 2 607,7 myń sharshy metr.
— Shymkent — 1 381,9 myń sharshy metr.
2024 jylmen salystyrǵanda eń joǵary ósim Jetisý (+11%), Almaty (+10,2%) jáne Qaraǵandy oblystarynda (+9%) tirkeldi.
Turǵyn úılerdiń negizgi bóligi, ıaǵnı jalpy kólemniń 90 paıyzy nemese 18 098,8 myń sharshy metr jeke qurylys salýshylar tarapynan paıdalanýǵa berildi. Sonymen qatar halyqtyń óz kúshimen salǵan turǵyn úıleriniń kólemi 7 120,6 myń sharshy metrdi qurady.
Jalpy, ótken jyldyń 12 aıynda 37 219 turǵyn úı ǵımaraty paıdalanýǵa berildi, onyń ishinde — 2 591-i kóppáterli turǵyn úı (185,8 myń páter).
Jyl basynda qurylys salasyn tsıfrlandyrýdyń 2026-2027 jyldarǵa arnalǵan jospary bekitildi. Qujat qurylys salasyn tsıfrlyq transformatsııasynyń negizgi maqsattaryn anyqtaıdy jáne qurylys jobalarynyń búkil ómirlik tsıklin — josparlaý men jobalaýdan bastap qurylysqa, paıdalanýǵa berýge jáne ǵımarattar men qurylystardy keıinnen paıdalanýǵa deıingi kezeńderdi qamtıdy.
Josparda qurylys protsesterin jeńildetýge jáne jedeldetýge baǵyttalǵan birqatar praktıkalyq sharakózdelgen.
Basymdyq baǵyttarǵa mynalar kiredi:
• mindetti BIM jobalaýyn engizý,
• qurylys salasyndaǵy memlekettik qyzmetterdi avtomattandyrý,
• nysandardyń tsıfrlyq pasporttaryn jasaý,
• qurylys normalary men standarttaryn mashına oqıtyn formatqa túrlendirý.
Esterińizge sala ketsek, ótken aptadaǵy Úkimet otyrysynda avtojol salasyn damytý máselesi jan-jaqty talqyǵa tústi. Kún tártibindegi negizgi másele boıynsha negizgi baıandama jasaǵan Kólik mınıstri Nurlan Saýranbaevtyń dereginshe, Qazaqstanda 95 myń shaqyrym avtomobıl joldary bar. Onyń ishinde 25 myń shaqyrym — respýblıkalyq joldar. Bul joldar Kólik mınıstrligine qaraıdy. Normatıvtik jaǵdaıy 94 paıyzdy quraıdy. Al 70 myń shaqyrym oblystyq jáne aýdandyq joldar jergilikti organdarǵa qaraıdy. Onyń normatıvtik jaǵdaıy — 91 paıyz. Respýblıkalyq mańyzy bar joldarda normatıvtik jaǵdaı shamamen bir deńgeıde saqtalǵan. Al jergilikti joldar boıynsha batys óńirinde joldardyń normatıvtik deńgeıi tómendeý.
— Kele jatqan úsh jyldyń ishinde jergilikti organdarmen birge óńirlik joldardyń jumystaryn 5 ese kóteremiz. Jumystyń nátıjesinde 32 myń shaqyrym óńir joldaryn normatıvtik deńgeıin 95 paıyzǵa deıin kóteremiz. Bul jumystardy atqarý úshin vedomstvolyq normatıvterge tıisti ózgerister qabyldandy. Qazirgi ýaqytta standarttarǵa ózgerister engizý jumysy aıaqtalyp jatyr. Sonymen qatar, ótken aptada ákimshilikterdiń ókilderimen jınalys ótkizildi. Túsinistik bar, jergilikti organdar jumystaryna kirisip jatyr, — dedi Nurlan Saýranbaev.
Onyń aıtýynsha, Qaraǵandy-Jezqazǵan jáne Ortalyq-Batys baǵyttaryn damytý da erekshe nazarda. Atalǵan jobalar boıynsha jumystar jasalyp jatyr. Qurylys jumystaryn osy jyldyń mamyr aıynda bastalady. Qyzylorda-Aqtóbe eń mańyzdy dálizdiń ishine kiredi. Bul ýchastok Batys-Eýropa — Batys-Qytaı jáne Reseı men Ortalyq Azııa baǵyttarynyń qosylatyn arnasy bolyp esepteledi.
— Qyzylorda-Aqtóbe jobasy 3 ýchaskege bólingen. Aqtóbe-Ulǵaısyn jáne Sekseýil-Qyzylorda qurylysy osy jyly bastalady. Al Ulǵaısyn-Sekseýildi kelesi jyly bastaımyz. Jospar boıynsha úsh ýchaskiniń jumystaryn bir ýaqytta bitirýimiz qajet, — dedi ol.
Al «Jol aktıvteriniń ulttyq sapa ortalyǵy» RMK bas dırektory Bolatbek Aıtbaevtyń sózine qaraǵanda, byltyr jol qurylysy tehnologııasynyń buzylýyna qatysty 4,2 myń derek anyqtaldy.
— 2025 jyldyń qorytyndysy boıynsha Jol aktıvteriniń ulttyq sapa ortalyǵynyń jol qurylysy jumystaryn qamtýy 99 paıyzdy qurady. Kásiporyn 47 myńǵa jýyq materıal synamasyn ótkizdi. Onyń ishinde 32,5 paıyz nemese 15,3 myń synamany qoldanýǵa jol berilmedi. Sondaı-aq, 4,2 myńnan astam jumys tehnologııasynyń buzylýy men aqaýlar anyqtalyp, 3,5 myńy joıyldy. Ortasha jóndeý obektilerine arnalǵan vedomstvolyq saraptama aıasynda 1,7 myń oń qorytyndy berildi. Onyń ishinde respýblıkalyq jeli boıynsha — 79 joba jáne jergilikti joldar boıynsha — 1,6 myń joba, — dedi ortalyq basshysy.
«QazAvtoJol» UK» AQ basqarma tóraǵasy Darhan Imanashev Aqtóbe-Ulǵaısyn, Saryaǵash jəne Qyzylorda qalalarynyń aınalma joldaryn qaıta jańartý boıynsha otandyq merdiger uıymdar anyqtalǵanyn atap ótti.
— Bıylǵy jol-qurylys maýsymynda shamamen 12 myń arnaıy tehnıka, 25 myń jol mamany jəne 193 asfaltbeton jəne beton zaýyttary jumyldyrylady. Prezıdent tapsyrmasyna səıkes bıyl 3400 shaqyrymdy quraıtyn jańa qurylys jəne qaıta jańartý jobalary josparlanyp otyr. Qazirgi ýaqytta Aqtóbe–Ulǵaısyn, Saryaǵash jəne Qyzylorda qalalarynyń aınalma joldaryn qaıta jańartý boıynsha otandyq merdiger uıymdar anyqtaldy, osy aıda qurylys jumystary bastalady, — dedi Qazavtojol basshysy.
Otyrysty qorytyndylaǵan Premer-mınıstr Oljas Bektenov jol qaýipsizdigi máselesi ózekti bola túskenin, 1 mamyrǵa deıin jol qozǵalysy qaýipsizdigi boıynsha birlesken is-qımyl josparyn jańartý qajettigin erekshe atap ótti.
— Kólik ınfraqurylymyn keshendi damytý júrgizýshilerge qolaıly jaǵdaı jasaýmen tikeleı baılanysty. Kólik mınıstrligi ákimdiktermen birge tıisti standarttar men bıznesti yntalandyrý sharalaryn qamtamasyz etip, 1 mamyrǵa deıin ár óńirde jol boıyndaǵy servısti damytýdyń egjeı-tegjeıli kartasyn ázirlesin, — dedi Oljas Bektenov.
