Úkimet tsıfrlandyrýdyń aýqymyn keńeıtip, ony ekonomıkanyń barlyq salasyna engizýge tıis - Toqaev
ASTANA. KAZINFORM - Prezıdent Qasym-Jomart Toqaev Ulttyq quryltaıdyń úshinshi otyrysynda sóılegen sózinde syrtqy saýda men aqparattyq tehnologııalar salasyna qatysty máselelerdi sóz etti.
«Biz elimizdiń aýmaǵy arqyly ótetin kólik dálizderin birtindep damytyp, syrtqy saýda aınalymynyń ulǵaıýyna barynsha jaǵdaı jasaýymyz kerek. Sol úshin logıstıka ortalyqtary men qoımalar salyp, temir jol qurylysynyń qarqynyn arttyramyz. Sondaı-aq teńiz tasymalynyń ınfraqurylymyn jaqsartyp, ózgertýge yńǵaıly tarıf saıasatyn júrgizemiz. Munyń bári elimizdiń turǵan jerin barynsha tıimdi paıdalanýǵa múmkindik beredi. Ekonomıkanyń kóptegen salasyn damytýǵa septigin tıgizedi»,-dedi Prezıdent.
Sondaı-aq ol bolashaǵy zor taǵy bir baǵyt – IT-tehnologııalar salasyna da toqtaldy.
Qazaqstanda osy jyldyń sońyna deıin sýperkompıýter jasap, jańa data-ortalyqty iske qosý josparlanǵan. Biz Kaspıı teńiziniń túbi arqyly talshyqty-optıkalyq baılanys jelisin salýdy kózdep otyrmyz. Bul joba Eýropa men Azııa arasynda taǵy bir tsıfrly dáliz ornatýǵa jol ashady.
«Men jaqynda «Qazaqstan temir joly» kompanııasynyń Innovatsııa ortalyǵynda boldym. Ortalyq qyzmetiniń arqasynda eńbek ónimdiligin arttyrýǵa, shyǵyndardy azaıtýǵa múmkindik betetin ozyq tehnologııa osy salaǵa engizilip jatyr. Bul jumysqa elimizdiń jáne sheteldiń bilikti IT-mamandary jumyldyryldy. Temir joldyń ótkizý qabiletiniń artýy, janar-jaǵarmaıdyń únemdelýi jáne kompanııa tabysynyń kóbeıýi – tsıfrlandyrý isiniń naqty ári kózge kórinetin nátıjesi. Tsıfrly ekojúıeni osylaı qalyptastyrý kerek. Úkimet osy jumystyń aýqymyn keńeıtip, ony ekonomıkanyń barlyq salasyna engizýge tıis»,-dedi Qasym-Jomart Toqaev.
