Úkimet tsıfrlandyrý men jasandy ıntellektini damytýdyń aýqymdy josparyn iske asyryp jatyr

2026 jyl Memleket basshysy Qasym-Jomart Kemeluly Toqaevtyń tikeleı tapsyrmalaryna sáıkes jarııalanǵan Tsıfrlandyrý jáne jasandy ıntellekt jyly aıasyndaǵy irgeli is-sharalar keshenin júzege asyrý kezeńiniń bastaýyna aınaldy. Bıyl 8 strategııalyq baǵyt pen 100 bastamadan turatyn is-sharalar josparyn júzege asyrýǵa basymdyq berildi. Búginde Úkimet memlekettik qyzmetterdi túpkilikti tsıfrlandyrý jáne GovTech 3.0 modeline kóshýmen qatar, telekommýnıkatsııalyq ınfraqurylymdy damytyp, IT salasyna júıeli qoldaý kórsetýde, serpindi salalyq jobalardy iske qosyp keledi.

Atalǵan jumystyń negizi – Aýqymdy tsıfrlandyrýdyń jáne jasandy ıntellekt tehnologııalaryn jappaı endirýdiń 2029 jylǵa deıingi «Digital Qazaqstan» jalpyulttyq strategııasy. Qujat ozyq tájirıbeni júıeleýge jáne ony ekonomıkanyń barlyq negizgi salasyna keńinen engizýge baǵyttalǵan. Jasandy ıntellektini tolyq engizý, ónerkásipti, jer qoınaýyn paıdalaný salasyn, logıstıka men energetıkany tsıfrlyq transformatsııalaý nátıjesinde 2029 jyldyń sońyna qaraı jalpy ishki ónimniń jyldyq ósimine qosymsha orta eseppen 1,5 paıyzdyq tarmaq deńgeıinde úles qosady dep kútilýde. Sonymen qatar Úkimet baǵalaýynsha, úsh jyldyq kezeńdegi salystyrmaly naryqtyq ınvestıtsııalardyń boljamdy kólemi $10,5 mlrd-tan $16,5 mlrd-qa deıingi aralyǵynda bolady.

Shymkent qalasynda «Indýstrııa 5.0: Ózara árekettesýdiń kúshi» taqyrybynda ótken Digital Qazaqstan 2026 halyqaralyq tsıfrlyq forýmy tabysty aıaqtaldy. Іs-shara memlekettik organdardyń, bıznes qaýymdastyqtyń, ınvestorlar men sarapshylardyń basyn qosyp, el ekonomıkasyn tehnologııalyq jáne jasandy ıntellekt negizinde damytý máselelerin talqylaıtyn negizgi alańǵa aınaldy.

Tsıfrlandyrý, ınnovatsııalar jáne aeroǵarysh salasyn damytý baǵytyndaǵy negizgi nátıjeler men aldaǵy josparlar týraly Primeminister.kz redaktsııasynyń sholýynan oqı alasyzdar.

Instıtýtsıonaldyq orta jáne tsıfrlyq quqyqtardy qorǵaý

Jańa quqyqtyq negiz qalyptastyrýdaǵy mańyzdy qadam – aımaqtaǵy alǵashqy mamandandyrylǵan akt sanalatyn Jasandy ıntellekt týraly zańnyń qabyldanýy. Qujat memlekettik basqarý, áleýmettik saıasat, bilim berý jáne densaýlyq saqtaý sııaqty salalarda JI paıdalaný kezinde algorıtmderdiń ashyqtyǵyna, táýekelderdi basqarýǵa jáne azamattardyń quqyqtaryn qorǵaýǵa qoıylatyn negizgi talaptardy aıqyndaıdy.

Osy baǵyttaǵy júıeli jumystyń jalǵasy retinde 2026 jylǵy 9 qańtarda Tsıfrlyq kodeks qabyldandy. Kodekstiń qabyldanýymen el jekelegen tsıfrlyq sheshimderden júıelik tsıfrlyq transformatsııa kezeńine kóshýde. Alǵash ret tsıfrlyq quqyqtar keshendi túrde zańnamalyq deńgeıde bekitildi. Azamattarǵa derbes derekterdi joıý, anonımızatsııalaý jáne olardy óńdeýdi shekteý quqyǵyna zań deńgeıinde kepildik beriledi. Bıometrııalyq sáıkestendirýdi qoldanýǵa tek zańnamada qatań kózdelgen jaǵdaılarda ǵana jol beriledi.

Jasandy ıntellekt salasyndaǵy uzaqmerzimdi memlekettik saıasatty úılestirý maqsatynda 2025 jyly Qazaqstan Respýblıkasy Prezıdentiniń janynan qurylǵan Jasandy ıntellektini damytý jónindegi keńes jumys isteıdi. Onyń quramyna ǵylym, bilim jáne bıznes salalaryndaǵy álemge tanymal kóshbasshylar engen. Olar:

Jasandy ıntellekt salasynyń sarapshysy K. Lı:

Tıýrıng syılyǵynyń ıegeri Dj.Hopkroft;

San-Dıegodaǵy Kalıfornııa ýnıversıtetiniń rektory P.Khosla;

MIT Media Lab zertteý tobynyń dırektory S.Brızel;

Mashınalyq oqytý tásilderiniń sáýletshisi P.Norvıg;

Halyqaralyq uıymdardyń ókili E.ál-Mazrýı;

Halyqaralyq uıymdardyń ókili O.ál-Olama.

Keńestiń ekinshi otyrysy Memleket basshysynyń tóraǵalyǵymen GITEX AI Kazakhstan 2026 tehnologııalyq forýmy aıasynda ótti.

Jahandyq reıtıngter jáne esepteý egemendigi

Úkimettiń júrgizip otyrǵan saıasaty halyqaralyq baǵalaýlar arqyly óz tıimdiligin kórsetýde. OpenAI taldaýyna sáıkes, Qazaqstan Ortalyq Azııa elderinen kósh ilgeri ozyp, jasandy ıntellektini engizý deńgeıi joǵary memleketterdiń qataryna endi (Qyrǵyzstan 52-shi, Ózbekstan 58-shi orynda). Sonymen qatar Dealroom baǵalaýy boıynsha otandyq IT-ekojúıe Rising Stars sanatyndaǵy eń qarqyndy damyp kele jatqan on ekojúıeniń qataryna kirdi. Sońǵy bes jyl ishinde Astana Hub rezıdentteriniń jıyntyq tabysy $4,9 mlrd-ty qurady, al tartylǵan ınvestıtsııalar kólemi $910 mln-nan asty.

2025 jylǵy mańyzdy oqıǵalardyń biri Ulttyq esepteý ınfraqurylymyn iske qosý boldy. Memleket basshysynyń tapsyrmasy boıynsha Jasandy ıntellekt jáne tsıfrlyq damý mınıstrliginiń «Ulttyq aqparattyq tehnologııalar» AQ bazasynda qurylǵan Alem.Cloud ulttyq sýperkompıýterlik klasteri álemdegi eń qýatty esepteý júıeleriniń halyqaralyq TOP500 reıtınginde 104-shi orynǵa turaqtady. Arhıtektýra eń jańa NVIDIA H200 údetkishteri bar 64 HPE Cray serverlerine negizdelgen (ónimdiligi shamamen 2 ekzaflop). «Qazaqtelekom» kompanııasynyń kommertsııalyq sýperkompıýteri jıyntyq esepteý áleýetin kúsheıte otyryp, 122-shi orynǵa ıe boldy. Úkimet bul esepteý resýrstaryn barlyq memlekettik organdardyń paıdalanýyn qamtamasyz etti.

Bıyl Úkimet qýaty keminde 1 GVt bolatyn álemdik deńgeıdegi jasandy ıntellekt haby – «Derekter ortalyqtarynyń alqabyn» salýǵa kiristi. Jasandy ıntellekt jáne tsıfrlyq ınfraqurylym salasynda jalpy quny $10 mlrd bolatyn kelisimderge qol qoıyldy. Kelissózderge:

NVIDIA basshysy R.Lebaredıan;

Firebird negizin qalaýshylarynyń biri R.Ovakımıan;

Firebird negizin qalaýshylarynyń biri A.Esaıan qatysty.

JITsDM men Firebird arasynda Alem.ai bazasynda Firebird Labs Kazakhstan ortalyǵyn qurý týraly kelisimge, sondaı-aq «KT-TELEKOM» JShS men Firebird arasynda «Derekter ortalyqtarynyń alqaby» jobasy aıasyndaǵy yntymaqtastyq týraly kelisimge qol qoıyldy.

Adamı kapıtal jáne JI ekonomıkasy úshin kadr daıarlaý

Kadrlyq áleýetti damytý barlyq deńgeıje júzege asyrylýda. Sonyń ishinde AI-SANA bastamasy aıasynda 2026 jyldyń I toqsanynda ákimdikter, aýdandar jáne ortalyq memlekettik organdar qyzmetkerlerine arnalǵan oqytý boıynsha 16 is-shara ótkizildi. Oqytý Astana Hub platformasynda uıymdastyrylyp, derekterdi taldaý jáne tildik modelderdi qoldanýdyń praktıkalyq modýlderin qamtıdy. Memlekettik jáne kvazımemlekettik sektordyń 100-ge jýyq top-basshysy AI Governance 500 baǵdarlamasy boıynsha bilim aldy. Al AI Leaders baǵdarlamasy aıasynda 800-den astam memlekettik qyzmetshi men kásipker oqytyldy. (Stanford University, OpenAI Academy jáne Silkroad Innovation Hub birlese iske asyrylýda).

Memlekettik organdar men kvazımemlekettik sektor uıymdary arasynda AI Governance Cup aýqymdy baıqaýy uıymdastyryldy (184 joba usynyldy). Baıqaý «AI Azamattarǵa qyzmet», «AI Ekonomıka», «AI Áleýmettik saıasat», «AI Qaýipsizdik», «AI Óńir» jáne «AI Kvazısektor» sııaqty 6 nomınatsııa boıynsha ótkizildi.

Bıylǵy 24 sáýirde jalpy aýdany 22 myń sharshy metr bolatyn alem.ai halyqaralyq jasandy ıntellekt ortalyǵy iske qosyldy. 8 qatty ortalyqta salalyq ınfraqurylym shoǵyrlanǵan.

1 qabatta qoǵamdyq keńistik, AI-kınoteatr jáne Ortalyq Azııadaǵy alǵashqy ınteraktıvti AI murajaıy ornalasqan.

Ekinshi jáne úshinshi qabattarda balalarǵa arnalǵan TUMO Astana kreatıvti tehnologııalar ortalyǵy jumys isteıdi. Munda tsıfrlyq ónimder portfolıosyn ázirleýge múmkindik beredi (alem.ai ortalyǵynda 1300 bala bilim alýdy bastady).

Tórtinshi qabatta baǵdarlamalaý men jasandy ıntellekt salasyndaǵy óńirdegi alǵashqy peer-to-peer formatyna negizdelgen Tomorrow School jobasy keńeıtilýde (21 myńnan astam ótinimkelip tústi).

Besinshi qabatta Apple Training Center, Playrix kompanııasymen birlesken GameDev Center jáne bolashaqtaǵy AI Research University ornalasqan

Altynshy qabatta ai’preneurs startap-kampýsy jumys isteıdi (1 400-den astam ótinim qabyldandy, 35 jańa startap iske qosyldy).

Jetinshi qabatta jetekshi halyqaralyq tehnologııalyq kompanııalardyń AI-zerthanalary ornalasqan.

Segizinshi qabatta ekonomıkanyń túrli salalaryna engiziletin sheshimderdi irikteıtin AI Governance Office qyzmet etedi. Ortalyqqa jyl saıyn shamamen 100 myń kelýshi keledi dep josparlanýda.

Qyrkúıek aıynda JI ýnıversıtetin iske qosý josparlanýda. Qazaqstandyq joǵary oqý oryndary «AI-Enabled University» modeline kóshýde, al 200 myń muǵalim ChatGPT Edu-ǵa qol jetkizdi. Al Qazaqstannyń robototehnıkadan ulttyq mektep quramasy FIRST Global Challenge halyqaralyq jarysynyń tórt dúrkin álem chempıony atandy.

Ulttyq platforma jáne memlekettik basqarýdy tsıfrlyq transformatsııalaý

Jasandy ıntellektiniń ulttyq platformasy – AI ekojúıesiniń negizgi elementteriniń biri. Bul platforma jasandy ıntellekt sheshimderin ázirleýge, synaqtan ótkizýge, engizýge jáne aýqymyn keńeıtýge arnalǵan biryńǵaı tehnologııalyq orta retinde qarastyrady.

Platforma sonymen qatar esepteý resýrstaryna, tildik modelderge jáne jasandy ıntellektige negizdelgen qoldanbaly sheshimderdi ázirleý quraldaryna qol jetkizýdi qamtamasyz etedi.

Sondaı-aq aǵymdaǵy sát emes JI agentteri men tsıfrlyq kómekshiler ártúrli baǵyttarda qoldanylady: ótinishterdi óńdeý, azamattarǵa keńes berý, quqyqtyq kómek, densaýlyq saqtaý, memlekettik qyzmetshilerdi qoldaý jáne kúndelikti protsesterdi avtomattandyrý.

eGov AI ıntellektýaldy keńesshisi 2 mln-nan astam suranysty óńdep, baılanys ortalyqtary men Halyqqa qyzmet kórsetý ortalyqtaryna túsetin júktemeni aıtarlyqtaı azaıtty. Aldaǵy ýaqytta eGov AI men AlemGPT platformalaryn damytý azamattar men memlekettiń ózara is-qımylyn barynsha yńǵaıly etýge baǵyttalady. Bul úshin paıdalanýshylar qajetti qyzmetti nemese portaldaǵy bólimdi ózdiginen izdemeı-aq, tabıǵı dıalog arqyly memlekettik qyzmetterdi alyp, qajetti aqparatqa ońaı qol jetkize alady.

Jasandy ıntellekt agentterin engizýdiń naqty mysaldary retinde gaz eseptegishteriniń kórsetkishterin avtomatty túrde tirkeý, terapevt dárigerlerge kómek kórsetý, quqyqtyq keńes berý, sondaı-aq memlekettik qyzmetshiler men azamattarǵa arnalǵan qoldanbaly tsıfrlyq quraldar atap ótiledi. Memleket basshysynyń qoldaýymen Astana Smart City qalalyq basqarý júıesine jasandy ıntellekt tehnologııalaryn engizýge baǵyttalǵan AI-Driven Government jobalyq keńsesi iske qosyldy.

Qazaqstan BUU-nyń Elektrondyq úkimetti damytý ındeksinde álem boıynsha 24-shi orynda tur. Búginde memlekettik qyzmetterdiń 90,4%-y elektrondyq formatta kórsetiledi, al 95,9%-yn smartfon arqyly alýǵa bolady. Sondaı-aq qaǵaz qujattardyń tolyq balamasy bolyp sanalatyn 39 túrli tsıfrlyq qujat engizilip, azamattardyń memlekettik qyzmetterdi alýyn burynǵydan da jeńil ári qoljetimdi etti. 2025 jyldyń basynan beri 51,5 mln-nan astam memlekettik qyzmet kórsetildi. Tamyz aıynda eGov Mobile mobıldi qosymshasy eGov AI ıntellektýaldy izdeý júıesimen jańartyldy. Sonymen qatar eGov.kz portaly arqyly 25,7 mln-nan astam memlekettik qyzmet kórsetildi, eGov Business servısi 4,6 mln suranysty óńdedi.

2025 jyly ekonomıkanyń 72 salasyn qamtıtyn 20 tsıfrlyq transformatsııa kartasy bekitildi. Sondaı-aq biryńǵaı Smart Region modeline kóshý júzege asyryldy. Onyń aıasynda óńirlerdiń tsıfrlyq damýyn baǵalaıtyn ulttyq standart engizildi. Bul standart 16 negizgi baǵyt pen tıimdiliktiń 90 kórsetkishin qamtıdy.

IT-sektordy, startaptardy jáne krıptoındýstrııany damytý

Búginde Astana Hub ekojúıesinde 2 myńnan astam kompanııa jumys isteıdi. Elde 20 óńirlik jáne 4 halyqaralyq hab qyzmet kórsetýde. 2025 jyldyń qorytyndysy boıynsha IT-qyzmetter eksportynyń kólemi $1,1 mlrd-qa jetip, otandyq IT salasynyń halyqaralyq naryqtaǵy básekege qabilettiliginiń artqanyn kórsetti. Sondaı-aq 2025 jyly Qazaqstanda alǵashqy tehnologııalyq «syńarmúıiz» (unicorn) kompanııa – Higgsfield.ai paıda boldy.

Astana Hub Ventures qory Zypl.ai, Grand Games, Uniblock, Axellero.io jáne Clarity Flo jobalaryna ınvestıtsııa saldy. Investıtsııalyq qorlardyń alǵashqy qarjylandyrý kezeńinde (first closing) $115 mln kólemindegi qarajat tartyldy. Bul baǵytta Alem Ventures Fund jáne Alem Crypto Fund qorlary jumys isteıdi. Іske qosylǵan Digital Nomad Residency baǵdarlamasyna 30 elden 700-den astam ótinim tústi. 2030 jylǵa deıin jasandy ıntellekt salasynda 10 000 maman daıarlaý, IT-qyzmetter eksportyn $5 mlrd-qa deıin jetkizý josparlanyp otyr.

Krıptoındýstrııada tsıfrlyq maınıngke qatysty erejeler jeńildetildi, Solana Super Team KZ ókildigi ashyldy jáne lıtsenzııasy joq 6 myń saıtqa qoljetimdilik shekteldi. 2026 jyldyń mańyzdy jetistikteriniń biri – Binance Kazakhstan blokcheın ekojúıesi men Alatau City Bank ıntegratsııasy arqyly tsıfrlyq aktıvterdi paıdalanyp alǵashqy tarıhı tranzaktsııanyń júzege asyrylýy boldy.

Naqty sektordaǵy ınnovatsııalar, aeroǵarysh jáne telekommýnıkatsııa

Qazaqstan Ortalyq Azııa óńirinde alǵash bolyp jasandy jańbyr tehnologııalaryn qoldanýǵa kóshti. Bul joba 2026 jylǵy 17 mamyrda iske qosyldy. Sonymen qatar Astana Smart City jobasy aıasynda jol qozǵalysy erejeleriniń buzylýyn avtomatty túrde anyqtaý jáne tirkeý úshin jasandy ıntellekt negizindegi beıneanalıtıka engizilýde.

2026 jyldyń ekinshi jartysynda Jasandy ıntellekt jáne tsıfrlyq damý mınıstrliginiń qoldaýymen ushqyshsyz taksı boıynsha pılottyq joba iske qosylady. Joba Yandex Qazaqstan jáne inDrive kompanııalarymen birlesip júzege asyrylady. Sonymen qatar Alatau City alańynda Alatau Advance Air Group Ltd. kompanııasynyń AutoFlight Prosperity ınnovatsııalyq elektrli aerotaksıiniń demonstratsııalyq ushýy ótti. Jobaǵa salynatyn ınvestıtsııa kólemi $300 mln-ǵa baǵalanady.

Sońǵy 3 jylda telekommýnıkatsııa salasyna salynǵan ınvestıtsııa kólemi 1 trln teńgeden asty. Osy kezeńde tirkelgen baılanys abonentteriniń sany 19%-ǵa ósti, uıaly baılanys abonentteriniń sany 12%-ǵa artty, mobıldi ınternet jyldamdyǵy 75%-ǵa kóbeıdi. Sonymen qatar elde 3G baılanys tehnologııasynan kezeń-kezeńimen bas tartý jumystary jedel júrgizilýde. 2027 jyldyń sońyna deıin 3 myńnan astam aýyldy joǵary jyldamdyqty ınternetke qosý josparlanyp otyr. Sonyń nátıjesinde talshyqty-optıkalyq baılanys jelisi (TOBJ) 5 myńnan astam eldi mekendi qamtıdy. El boıynsha joǵary jyldamdyqty ınternettiń qoljetimdilik deńgeıi 99%-ǵa jetedi. Qazirdiń ózinde aýyldyq jerlerdegi 600-den astam memlekettik nysan ınternet jelisine qosyldy. Onyń ishinde 592 nysan spýtnıktik baılanys arqyly, al 23 nysan talshyqty-optıkalyq baılanys jelisi (TOBJ) arqyly qosylǵan.

«Digital Nauryz» tujyrymdamasy aıasynda poıyzdarda ınternet engizý jumystary júrgizilýde. 2025 jyly eki Talgo poıyzynda pılottyq joba sátti júzege asyrylǵannan keıin, 2026 jyldyń tamyz aıynyń sońyna deıin «Transtelekom» AQ-pen 120 jolaýshylar poıyzyn OneWeb spýtnıktik ınternetimen qamtamasyz etý týraly kelisim jasaldy. Sonymen qatar Direct-to-Cell tehnologııasyn kommertsııalyq paıdalanýǵa berý josparlanyp otyr. Bul tehnologııa uıaly baılanys qyzmetin spýtnık arqyly tikeleı smartfondarǵa jetkizýge múmkindik beredi.

2026 jylǵy 30 sáýirde Baıqońyr ǵarysh aılaǵyndaǵy «Báıterek» ǵarysh zymyran kesheninen orta klasty «Soıýz-5/Sunkar» zymyran-tasyǵyshy sátti ushyryldy, bul ulttyq ushyrý ınfraqurylymynyń daıyndyǵyn rastady.

Jahandyq yqpaldastyq: Qazaqstannyń jasandy ıntellekt salasyndaǵy álemdik orny

El ishindegi tehnologııalyq serpilister Qazaqstannyń halyqaralyq arenadaǵy nyq ustanymymen tyǵyz baılanysty. Elimizdiń jasandy ıntellekt salasyndaǵy jahandyq kompanııa retindegi mártebesin aıqyndaǵan mańyzdy oqıǵalardyń biri – 2026 jylǵy 17 shildede Shanhaıda ótken Jasandy ıntellekt jónindegi dúnıejúzilik konferentsııada Qazaqstan Prezıdenti Qasym-Jomart Toqaevtyń sóz sóıleýi boldy.

Memleket basshysy konferentsııa minberinen «Jasandy ıntellekt – ıgilik úshin, jasandy ıntellekt – barshaǵa» tujyrymdamasyn jarııalaı otyryp, jasandy ıntellekt adamnyń sanaly basqarýymen ádiletti damýdyń qozǵaýshy kúshine aınalýy tıis ekenin atap ótti. Qazaqstan ishki bastamalardy tabysty júzege asyrýǵa súıene otyryp – salalyq zańnamany qabyldaýdan bastap, Ortalyq Azııadaǵy erekshe konstıtýtsııalyq-quqyqtyq rejımi bar tolyq ıntegratsııalanǵan alǵashqy tsıfrlyq qala – Alataýdy qurýǵa deıingi jetistikterin negizge ala otyryp, álemdik qaýymdastyqqa birqatar órshil jobany usyndy.

Qazaqstan Jasandy ıntellekt salasyndaǵy yntymaqtastyq jónindegi Dúnıejúzilik uıymnyń teń quryltaıshysy retinde osy ınstıtýttyń ınaýgýratsııalyq otyrysyn Astanada ótkizýdi jáne Ortalyq Azııa boıynsha óńirlik ókildigin Qazaqstan astanasynda ornalastyrýdy usyndy. Buǵan qosa, Almatyda BUU ESKATO janyndaǵy Turaqty damý úshin Azııa-Tynyq muhıty tsıfrlyq sheshimder ortalyǵy ashylady.

Erekshe nazar tsıfrlyq ekonomıkalardy jahandyq seriktestermen yqpaldastyrýǵa aýdaryldy. Memleket basshysy «Qazaqstan — Qytaı tsıfrlyq kópirin» qurý bastamasyn kóterip, kelesi jyldy eki el arasyndaǵy jasandy ıntellekt salasyndaǵy birlesken bastamalar jyly dep jarııalaýdy usyndy. Sonymen qatar halyqaralyq yntymaqtastyq barlyq qurlyqtarda keńeıip keledi. C5+1 formaty aıasynda Vashıngtonda álemdik tehnologııalyq alpaýyttarmen, onyń ishinde OpenAI, Microsoft, NVIDIA jáne Cisco kompanııalarymen 14 strategııalyq kelisimge qol qoıyldy.

Tehnologııalyq egemendikti nyǵaıtý

Búginde jasandy ıntellekt múmkindikteri álemdik ekonomıkanyń qurylymyn túbegeıli ózgerte alatyny aıqyn. Memleket basshysy aıqyndaǵan jáne Úkimet júıeli túrde júzege asyryp otyrǵan tsıfrlandyrý baǵyty Qazaqstanda biregeı ınnovatsııalyq ekojúıeniń qalyptasýyna negiz bolyp, eldiń tehnologııalyq egemendigin nyǵaıtýǵa jáne jahandyq básekege qabilettiligin arttyrýǵa jol ashýda.

Orasan zor energetıkalyq áleýetke, zamanaýı kólik jelisine jáne ozyq telekommýnıkatsııalyq ınfraqurylymǵa ıe Qazaqstan qazirgi zamannyń tehnologııalyq syn-qaterlerine beıimdelip qana qoımaı, tsıfrlyq damý men ınnovatsııanyń jańa úlgisin qalyptastyryp keledi.

Qazaqstan naqty ınfraqurylymdyq sheshimdermen nyǵaıtylǵan jumys istep turǵan tsıfrlyq ekonomıkany qurýda. Qabyldanǵan zańdar, sýperkompıýterlerge ınvestıtsııalar jáne jahandyq tehnoalpaýyttarmen ıntegratsııa elge aımaqtaǵy táýelsiz tehnologııalyq mártebeni qamtamasyz etedi. Jasandy ıntellekt Úkimet naqty mindetterdi sheshýge baǵyttaıtyn negizgi quralǵa aınalady: ulttyq ındýstrııany damytý, derekterdi qorǵaý jáne azamattardyń ekonomıkalyq turaqtylyǵyn qamtamasyz etý.