Úkimet tórtinshi munaı óńdeý zaýytynyń máselesin basqa tásilmen sheshpekshi
ASTANA. KAZINFORM — Premer-mınıstr Oljas Bektenov Senat depýtatynyń saýalyna joldaǵan jaýapta elge qajet tórtinshi munaı zaýytynyń ornyna boı kóteretin munaı óńdeý kesheniniń bir bólshegi Mańǵystaý óńirinde oryn tebýi múmkin ekenin aıtty.
— Úkimet qaýlysymen 2025-2040 jyldarǵa arnalǵan munaı óńdeý salasyn damytý tujyrymdamasy bekitildi. Tujyrymdamaǵa sáıkes 2028-2030 jyldary aldyn ala tehnıkalyq ekonomıkalyq negizdeme, 2030-2032 jyldary jobalyq smetalyq qujattama ázirleý, 2032-2040 jyldary qýaty jylyna 10 mln tonna bolatyn jańa munaı óńdeý zaýytyn salý kózdelgen. Qazir Energetıka mınıstrligi «Qazaqstan Respýblıkasynda biriktirilgen munaı óńdeý jáne munaı-hımııa keshenin salý» jobasynyń tehnıkalyq-ekonomıkalyq negizdemesin ázirleýge arnalǵan tehnıkalyq tapsyrma jobasyn ázirledi. Jobaǵa qatysýshylardy aıqyndaý jáne keminde tórt áleýetti ornalasý ornyn zertteý bólimderi engizilgen. Onyń ishinde Mańǵystaý oblysyn da qarastyrý josparlanyp otyr, — dep jazady Úkimet basshysy.
Atalǵan joba Qazaqstandy avıaotyn ımportyna táýeldilikten qutqarady degen esep bar.
— Bul óz kezeginde TS-1/Jet A-1 sapasyndaǵy avıakerosın óndirýdi qamtamasyz etedi. Sizderdiń saýaldaryńyzǵa sáıkes Mańǵystaý oblysynda qýattylyǵy jylyna 5 mln tonna jańa munaı óńdeý zaýytyn salý aldyn ala ınvestıtsııa tartýdy talap etedi. Sonymen qatar ınvestıtsııanyń ótelýin qamtamasyz etý úshin avıaotynnyń ózindik quny joǵary bolatynyn eskergen jón. Osylaısha, Mańǵystaý oblysynda shaǵyn munaı óńdeý zaýytyn salý «Qazaqstan Respýblıkasynda biriktirilgen munaı óńdeý jáne munaı-hımııa keshenin salý» jobasyn iske asyrý aıasynda qarastyrylady, — delingen Premer-mınıstrdiń jaýabynda.
Eske salsaq, Senat depýtaty Súıindik Aldashev Úkimetke Mańǵystaý oblysynda shaǵyn munaı óńdeý zaýytyn salýdy usynǵan bolatyn.