Úkimet Torǵaı óńirindegi áleýmettik-ekonomıkalyq jobalardy iske asyrýǵa basymdyq berdi

Qujat Memleket basshysy Qasym-Jomart Toqaevtyń «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýynda aıtylǵan tapsyrmalaryn júzege asyrý aıasynda Úkimet qaýlysymen bekitildi. Atalǵan Joldaýda Torǵaı óńirin keshendi áleýmettik-ekonomıkalyq turǵydan damytý qajettigi belgilengen bolatyn.

Úsh jyldyq jospar 10 negizgi baǵyt boıynsha 51 is-sharany qamtıdy. Bular ónerkásip jáne kólik, týrızm jáne sport, agroónerkásiptik keshen, bilim berý, densaýlyq saqtaý, áleýmettik qorǵaý, jylý jáne elektrmen jabdyqtaý, sý burý, azamattyq qaýipsizdik.

Іs-sharalar óndiristik áleýetti damytýǵa, ınjenerlik jáne áleýmettik ınfraqurylymdy jańǵyrtýǵa, halyqtyń ómir súrý sapasyn jaqsartýǵa, sondaı-aq ınvestıtsııa tartý jáne jańa jumys oryndaryn ashý úshin jaǵdaı jasaýǵa baǵyttalǵan.

— Josparda agroónerkásiptik keshendi, onyń ishinde mal sharýashylyǵyn damytýǵa, ınfraqurylymdyq jobalardy iske asyrýǵa, sondaı-aq kásipkerlik jáne ınvestıtsııalyq belsendilikti qoldaýǵa erekshe nazar aýdaryldy. Atap aıtqanda, Arqalyq qalasynda birqatar iri ınvestıtsııalyq jobalardy iske asyrý kózdelip otyr. Olardyń ishinde 6 myń bas iri qara malǵa modýldik reprodýktor qurý, jelatın jáne bıoaktıvti súıek matrıtsasyn shyǵaratyn zaýyt salý, 10 myń bas qoı úshin mal sharýashylyǵy keshenin, 6 myń basqa arnalǵan bordaqylaý alańyn salý. Budan basqa, qurama jem zaýytyn paıdalanýǵa berý, qýattylyǵy jylyna 300 mln jumyrtqa shyǵaratyn qus fabrıkasyn keńeıtý jáne jańǵyrtý josparlanǵan, — delingen habarlamada.

Qostanaı oblysynyń ákimi Qumar Aqsaqalov aǵymdaǵy 2026 jylǵa jalpy somasy 78,4 mlrd teńgege 33 is-sharany iske asyrý josparlanǵanyn habarlady. Qazirgi ýaqytta is júzinde 39,2 mlrd teńge bólindi.

— Biz barlyǵynyń josparly merzimde iske asyrylýy úshin qajettiniń bárin jasaımyz. Osy jyly oblystyq bıýdjetten 8,8 mlrd teńge bólindi. Bul negizgi jobalardy tolyq kólemde qarjylandyrýǵa múmkindik berdi. Olardyń eń bastysy — Arqalyq áýejaıynyń qurylysy. Búgingi kúni qarjylandyrýmen áýeaılaq ınfraqurylymyn qaıta jańartý, jolaýshylar termınalyn salý jáne qajetti jabdyqtardy satyp alý tolyq qamtamasyz etildi. Jumys qatań túrde keste boıynsha júrgizilýde. Osy jylǵy tamyzda nysan paıdalanýǵa beriledi. Áýejaıdy iske qosý áýe qatynasyn qalpyna keltirip qana qoımaı, kólik qatynasy, ınvestıtsııalyq tartymdylyqty aıtarlyqtaı arttyryp, óńirdi damytýdyń jańa kezeńin ashady, — dep atap ótti Qumar Aqsaqalov.

Sonymen qatar Arqalyqta abattandyrý jumystary júrgizilýde, bos turǵan ǵımarattar qalpyna keltirilip jatyr, aýlaishilik aýmaqtar men vokzal mańyndaǵy alańdar jóndelýde. Qalada ýnıversıtet ǵımaratyn qaıta jańǵyrtý jumystary aıaqtaldy, sondaı-aq Jezqazǵan-Arqalyq avtojolyn jóndeý jumystary sońǵy kezeńge ótti.

«Arkalyk QUS» JShS qus fabrıkasynyń teń quryltaıshysy Maksım Bojko kásiporyndy eki satyly jańǵyrtý jobasyn tanystyrdy. Bul óndiris kólemin eki esege – jylyna 150 mln-nan 300 mln jumyrtqaǵa deıin ulǵaıtýǵa múmkindik beredi.

— Bıyl biz 70 mln jumyrtqaǵa arnalǵan jańa qus qoralaryn paıdalanýǵa berýdi jáne ózimizdiń qurama jem zaýytyn salýdy josparlap otyrmyz. Kelesi jyly taǵy 80 mln dana qus úıi iske qosylady. Eki kezeńdi júzege asyrý qorytyndysy boıynsha qus fabrıkasynyń qýaty jylyna 300 mln jumyrtqaǵa jetedi. Qazir bizde shamamen 250-270 adam jumys isteıdi. Shtatty 370 qyzmetkerge deıin kóbeıte otyryp, 100-den astam qosymsha jumys ornyn qurýǵa múmkindik bar, — dedi Maksım Bojko.

Keńes qorytyndysy boıynsha vıtse-premer Serik Jumanǵarın memlekettik organdarǵa oblys ákimdigimen birlesip qarajatty ýaqtyly ıgerý máselesin qatań baqylaýda ustaýdy jáne ınvestorlarǵa josparlanǵan jobalardy naqty iske qosý úshin barlyq qajetti qoldaý kórsetýdi tapsyrdy.

Al jaqynda Qostanaı oblysynyń ákimi Qumar Aqsaqalov Torǵaı óńiriniń áleýmettik-ekonomıkalyq damýyna túsinik bergen edi.