Úkimet tyńaıtqyshtardy sýbsıdııalaýǵa 48 mlrd teńgeden astam qarajat bóldi

ASTANA. KAZINFORM – QR Úkimetiniń rezervinen tyńaıtqyshtardy (organıkalyq tyńaıtqyshtardy qospaǵanda) sýbsıdııalaý úshin 48,4 mlrd teńge bólindi. Premer-mınıstr Oljas Bektenov tıisti qaýlyǵa qol qoıdy.

Qaýly Memleket basshysynyń 2024-2028 jyldarǵa arnalǵan aýyl sharýashylyǵy óniminiń jalpy kólemin 2 esege ulǵaıtý jáne topyraqqa mıneraldy tyńaıtqyshtar engizý deńgeıin ǵylymı negizdelgen qajettiliktiń 50%-na deıin arttyrý jónindegi tapsyrmalaryn júzege asyrý aıasynda qabyldandy.

Qujat tyńaıtqyshtardyń qunyn sýbsıdııalaýǵa aǵymdaǵy nysanaly transfertter túrinde Abaı, Aqmola, Shyǵys Qazaqstan, Jambyl, Qaraǵandy, Qostanaı, Pavlodar, Soltústik Qazaqstan jáne Túrkistan oblystarynyń ákimdikterine qarajat aýdarýyn kózdeıdi.

Birinshi kezekte, qarajattyń negizgi kólemi mıneraldy tyńaıtqyshtardy avanstyq sýbsıdııalaý tetigin iske asyrýǵa baǵyttalǵan.

Ótken jyldyń naýryz aıynda AÓK-ni qoldaý sheńberinde tyńaıtqyshtardy avanstyq sýbsıdııalaý tetigi engizilgeni belgili. Bul rette bıýdjettik sýbsıdııalar aýyl sharýashylyǵy taýaryn óndirýshilerge arzandatylǵan tyńaıtqyshtardy jetkizý úshin otandyq zaýyttardyń arnaıy shottaryna aldyn ala aýdarylady.

Qabyldanǵan sharalar esebinen alǵash ret tyńaıtqyshtardy qoldaný deńgeıi ǵylymı negizdelgen qajettiliktiń 40%-na jetti (2024 jylǵa deıin 21%-dan aspaǵan).

Kóktemgi egis jumystaryna daıyndyq kezeńinde Úkimettiń ýaqtyly qarjylyq qoldaýy aýyl sharýashylyǵy taýar óndirýshilerin tyńaıtqyshtarmen ýaqtyly qamtamasyz etýge múmkindik beredi, bul saıyp kelgende joǵary ári sapaly ónim alýǵa múmkindik beredi.